— Aada ito ha bukid pananagsalag nga mga tamsi? — nagpakiana hiya han mag-urulin, diri la kay tuyo mahabaro kundi papagyakan ha iya.
— Bangin la, senyora, — binmaton; — kundi waray pa ngada yana may nakakita han ira salag.
— Waray ito salag nga katamsihan?
— Sabuot ko may ada gad, kay kun waray magpakaluluoy daw.
Hi Maria Clara waray sabot han tingog nga masamdong nga iginluwas han mag-urulin hini nga mga pulong.
—Ta, ano man?
— Nasiring, gining, — binmaton an batan’on, — nga an mga salag hito nga katamsihan diri pinanngingita, ngan nakakahatag hin gahom hin diri paghikit i han makadara ha ira ngan sugad han kalag nga dida la hikikit'i han salaming han tubig.
Hi Maria Clara nagpainuino.
Hadto ngahaw naabot hira ngadto han bunuan: an tigurang nga taga baluto hinmigot dida hin usa nga usok.
— Ayaw anay! — ngani Dada Isabel han pakakita han anak hadto nga tigurang nga nasaka ngadto ha daydayan dara in usa nga sikpaw; — maupay mag-andam na la rigadaan hin tulaan basi an isda magdayon na la tikang ha tubig ngadto ha sabaw.
— Kaupay hini nga Dada Isabel! — nakasiring ani tipagparadi; — diri karuyag nga an isda lumiot man la :mausa kadali han tubig.
Hi Andeng, an bugto ha gatas ni Maria Clara, bisan la kun mahamis an iya huyayag nga nawong, bantugan nga parapanluto. Nag-andam ngadaan hin kiniris, kamatis ngan iba, binubuligan hiya, o ginsasamok ba, hin pipira nga ulitawo nga tingali nagsisiring ha iya pakisangkay. An kadaragan'an nanmamaspas hin mga ugbos hin karubasa, mga balatong; nag-uutud-utod hin haglipot han mga paayap tigsugad kahaglaba hin sigarilyo.
Dapit pagliaw han namamaghinulat pag-ikinikitaan kun tiunano an isda nga nagkikisikisi pa nga nahuhukad didto han ira bilangguan, an mahusay nga Iday kinmapot hin harpa:(7) diri la kay maupay hiya kumablit hadto nga turunggon kundi kay mag-upay pa liwat an iya mga tudlo.
Ginpakpakan hiya han mga batan’on ngan hinadkan hiya ni Maria Clara: an harpa asya an turunggon nga labi
