Hi P. Salvi tinmago ha luyio bin usa nga puno hin kahoy nga dako ngan namati.
— Karuyag mo sidngon nga imo susugaron hiton binubuhat ha imo hiton padi nga ikaw la in ginbabantayan bisan ka pakain? — sinmumpay in usa nga matawa nga tingog. — Napagasa baya an nagpipinangabugho ngan napalunod han mga mata!
— Diri pangabugho iton akon! Karuyag ko la masayuran kun ano in binubuhat! — nabaton an matil-is nga tingog hamtang an matawa nabalik pagsiring:
—Oo, gad, pangabugho, pangabugho gud! —ngan dayon pagtinawa.
— Kun nangangabugho ako hiya unta, diri ako, an karuyag ko nga diri hikit’an hin bisan hino.
— Oo, kundi diri ka man liwat ha iya makakakita, waray pulos. Maupay pa, kun makaagi kita hito nga salag ihahatag ta hiton padi basi diri ta hikit’an kun magbibinantay ha aton, ano ka hito? — Diri ako natuod hito nga mga salag hin talabong, — sinmumpay liwat in lain nga tingog; — kundi, ako ngani in mangabugho, maaram ako mag-inaw hin diri ako hikikit’an.. .
— Uunanhon mo man? hala daw? Susugaron mo hiton kanan Madre Escucha?
Nanhikatawa hira hini nga hinumduman han mga adlaw ha kolehiyo.
— Sayod na man kamo kun inuunano an paglipat han Madre Escucha!
Kinikita ni P. Salvi, tikang didto han iya tinataguan, hira Maria Clara, Victoria ngan Sinang nga namamagsinulsog han salog. Ngatulo namamagtinamod ngadto ha tubig nagbibiniling han pangasa nga salag hin talabong .. . maghulos tubtob ha tuhod, pinangangabat an maglison nga lirik han ira mga paa dida han haglapad nga kunot han ira mga saya nga ikakarigo. Nanlulugay ngan mga lubas an ira mga butkon, nanmamado hin haglapad in samay nga bado nga magkalainlain an tina. An tututlo nga daraga, labot la han irapagpinamilinghan diri sadang hiangian, nagpipinanguha liwat hin mga bukad gan hin mga utanon dida ha ligid han salog.
Adto nga padi nga nahanunugad kan Acteon,(3) nga nagkikinita hadto nga awdanon nga Diana, ginduduas ngan
