waray kiwakiwa; an iya mata nag-iinggat didto han masirom nga lungag nga iya luk’anan. Waray tatakas pagkinita
han magbusag ug maglison nga mga butikon, han makawiwili nga liog nga tinitikangan han dughan; an gudti ug magpulahay nga mga tiil nga nagtitinara han tubig nakakahatag
han nanhihingas niya nga lawas hin usa nga pamalatian nga
makatitingala, ug nakakapagpainop han iya mapaso nga
ulo hin mga bag-o nga durumdumon.
Han paghilipot hin usa nga kapihikan han salog, ha luyo hin magrampag nga kakawayanan, magkatatago adto nga magtahom nga mga lawas ngan waray na hibatii an ira makasisina nga hiruhimangraw. Kinukughan, nag-aalang, ginmuwa hiya, hi P. Salvi, didto han iya tinataguan ngan maniplat paluyuluyo hin paniplat nga waray tultol. Inmukoy hiya anay, nagruhaduha; inmanduroy hin pira kapitad pagsunod han kadaragan’an, kundi binmalik liwat ngan magsulsog han ligid han salog, say bilngon an iba nga magbarakasyon.
Ngadto ha aruantaw tikang dida han iya tinutukdawan kinita niya in karigusan ha butnga han sapa, nga inalad hin maupay ngan inatpan hin marampag nga kakawayanan : hinbabatian tikang didto in mga maglipayon ngan batan’on nga mga tingog hin kababayin’an. Sinabngan adto hin mga dahon hin anahaw ngan hin mga bukad ug mga bandera nga gudti. Ngadto ha unhan hinkikit’an niya in usa nga latayan nga kawayan ngan ngadto ha antaw nakadto an kalalakin'an nagpipinangarigos hamtang nagsusulatsugat in kadam’an nga suruguon, babayi, lalaki, ha tungod hin mga kalan ug mga gid-angan nga pinanhimo ha tuna, nangingihaw hin mga manok, nagkikiris hin bugas, nagbibirik han inasal ug iba pa. Ngan ngadto ha tabok, ngadto hin usa nga hinadsan, didto katitirok in kadam’an nga tawo, babayi, lalaki, ha tungod hin usa nga handong nga Iona nga ipinanhigot ha mga sanga hin kahoy ug ha mga usok. Nakadto didto an alperes,(4) an kuwadhutor, an gobernadorsilyo, an tenyente mayor, an magturutdo ha liburan ngan hin damo nga namagkapitan ngan namagtenyente anay, pati hi Kapitan Basilio, an amay ni Sinang, una nga katugbang ni adton D. Rafael ha usa nga kalipungan. Ginsiring hiya ni Ibarra: “Naglalantugi kita ha katadungan; paglantugi diri karuyag sidngon nga pag-away.” Salit an bantugan nga tigpamulong han mga konserbadores kinmarawat han
