— Dida han imo hinbabaruan nga mga katigayunan, waray ta na lain nga sadang pagsundon kun diri ini la nga uraura kamakuri?
Kinaptan hiya ha butkon han tigurang ngan tugwayan hiya ngadto ha tangbuanan. Usa nga hangin nga mahagkot, mag-uruna han Amihan, inaabat ha gawas; ha ira mga mata nabibitad an tanaman nga napaabot ngadto ha kagurangan nga say dapit nagiginpangaranupan.
— Kay ano nga diri kita magsusugad hito nga malubay nga tanom nga puno hin rosas ug mga biyuos? — nagsiring an pilosopo itinututdo in usa nga alehandriya nga bukaran. — Kun an hangin napuros, iginlalapdos salit hiya naduyok dapit pagtago han iya makaruruyag nga dinara. Kun iton iya lawas tumikig la babarion hiya han hangin ngan magtatalbo an iya mga bukad ug makakarag an mga biyuos. Han paghihilabay han hangin nabalik liwat hiya pagtindog, dara an iya makawiwili nga manggad, hino in masuson ha iya nga dinmuko hiya han ulo tungod kay kinahanglan? Ngadto ha unhan kitaa iton aadto nga dako nga makupa nga nagbabay-og hin parayaw hiton iya bulawanon nga kamarabong, nga ginsasalagan han mga agila. Haliton ko ito didto ha kagurangan maluyahay pa nga udlot, akon anay pinangusukan hin kawayan basi umilob an iya lawas hat sulod hin pira kabulan. Kun dako na ito nga akon dad'on nganhi, daan la dayag nga diri nabubuhi kay iginhahapos han hangin nga diri pa nakakagamot ug diri pa kaupay nakakagupot ha tuna hin igo han iya kadako. Asya man ito in aabutan mo kay tanom ka nga hinalit tikang ha Europa nganhi hinin batuon nga tuna, kun diri ka anay mamiling hin sadang sarigan ngan diri ka anay magpakagutiay. Maraot iton imo hinmumutangan kay hataas ngan uusa ka la: an imo tinutukdawan malumo pa, ha langit may igindadampog nga bagyo ngan an mga tarimpungayan han mga kahoy dida ha imo katulinan, sugad han kinita na dinhi, daraupon hin linti. Diri kay kaisog, kundi pagtagya an pagato han ngatanan kun nag-uusaan la; waray nasuson han magsarakay nga napasalipod ha usa nga luok kun naabat nga may ada taragman nga hangin. An pag-ubo kun may nalabay nga bala diri kay katalaw; an maraot asya an pagpaabong basi unina matumba ngan diri na makabuhat.
— Ngan madadangat ko dinhi hini nga pagpaumaya an bunga han akon ginhihingyap? —nagpakiana hi Ibarra. —
