nga isarabong ha purtahan.
Kundi an duro kamarugyaw, nga haros magigin-aringasa, aadto ha usa nga pungtod nga halapad ha uruunhanay la han balay ni Ibarra. Nagliligot nga mga muton, naggugugliat an mga tawo, natinagiktik an bato nga gintitipkan, an palo nga nahamamakmak ha raysang, an daldag nga nagsasaksak han mga pamalay. Kadam'an nga tawo in namamagkutkot dida hin usa nga haluag ug halarom nga luong; an iba namamagturupad han mga bato nga tumikang didto ha panirip-akan, may ginhahawas ha karreton, may nagtatambak hin baras, may nag-aandam hin mga likisan ug mga karalingan...
— Didi! Didto ito! Dagmit!— naguliat in usa nga tigurang nga kanan may pagsabot an pangahimo, nga nabitbit hin usa nga tungkod nga may uusa kametro an kahalaba, nga linikupan hin tumbaga ha mga katapusan ug say nasa sangburan han lubid nga ikurutod. Asya hiya an magturutdo han buruhaton, hi Nyor Juan (11) nga paratukod ug paratindog hin balay, parakuta, panday, parapamusag, paraayad hin mga yawihan, parapintar, parapamuong hin bato ngan usahay parapanhimo hin ladawan. — Kinahanglan humanon yana ngahaw! Buwas diri makakagbuhat ngan isangbuwas amo na an kaadlawan! Dali! Talinguhaa niyo nga iton kutkot ighiigo hini nga bato nga malison!— natudlok hiya ngadto han namamagtiktik hin usa nga bato nga kantuhan. Ha sakob hini nga bato hihipuson an aton mga ngaran!
Ngan dayon isusumat han mga diri didaanon nga nagpapanaop han nakausa na kayukot niya ipanumat.
— Maaram kamo kun ano inin amon gintitindog? Ada, asya in usa nga liburan nga waray pa may sugad hini bisan diin, ngan sama ini han liburan didto ha Alemania, mauruupay pa ngani! An mga plano hini gintukod ni Go. Rojas an parapanindog hin dagko nga balay, ngan hi ako, hi ako an nagpapalakat han buhat! Oo, kitaa la, baga ini in palasyo, ngan may duduha nga sugbong; usa nga kanan kabataan nga kalalakin'an, usa man kanan kababayin'an. Dinhi ha butnga may usa nga dako nga tanaman nga may namamag-ambak nga tubig; ha mga kagiliran may kakahuyan, may gudti nga sakob nga panananman han kabataan hin lunlon mga taranmon kun uras han urugyag, basi pagpahimulusan an panahon, diri pagkaragan. Kitaa daw,
