kun diri ba haglarom an kuta nga sinasarigan! Tutulo kametros may kapituan kaglima kasentimetros! May ada ini mga bodega, may mga ruwang ha ilarom han tuna, mga bilangguan hadton diri buot magtuon, nga aada harani, haraniay gud kaupay han mga uruyagan ug han himnasyo, basi an mga ginpapahimaan magpakabati han mga magtinuunon nga namamagkalipay. Nakita kamo hiton iito nga haluag nga napapawangan? Asya ito an magigin-uruyagan nga pagdadadlaganan ug pagluluksuhan han kabataan. An kababayin'an mamamay-ada tanaman nga may mga lingkuran, tarabyugan, pakayidingan han liníkom nga uway, tubig nga namamag-ambak, mga kurungan hin tamsi ug iba pa. Magmamakaruruyag ini!
Ngan hi Nyor Juan dagos paghaharuhapyod han iya kamot ha pagpinanumdom han bantog nga iya ha urhi dadangaton. Magpapakanhi adto in mga taga lain-tuna pagkita ngan manmamakiana: "Hino an bantugan nga nagtukod hini nga balay?" "Diri kamo nakilala? Uraura man nga diri kamo kumilala kan Nyor Juan! Kun sugad tikang kamo ha hirayo!" mabaton an kadam'an.
Dara hini nga panhunahuna napakadto, napakanhi, naguusisa han ngatanan, nanginginano han ngatanan.
— Baga damo ko nga kahoy ito nga ginhihimo nga balayan!—iya sinisiring in usa nga madarag nga tawo nga nangungulo hin pipira nga magburuhat. Igo ko la hito in tulo nga haglaba nga gipat nga paninindugon, pupunguton didto ha igbaw, ngan tulo liwat nga ikikipit!
— Tara!)12( —nabaton an madarag nga tawo nga dapit nahakakatawa hin lain;-kun darudamuon ta in gamiton nga kalap labi kamaupay pagkit'on. Labi nga dadayawon nga magpapakasiring: "Kadako man gud hini nga buruhaton!" Inawa, inawa niyo kun diri ba maupay nga balayan in akon mahimo! Ngan unina akon panmumutangan hin mga bandira, mga pinungpong nga bukad ug mga dahon . . . ngan makakasiring ka unina nga maupay man gud nga imo ako pinabulig dinhi, ngan hi senyor Ibarra waray sadang unina ungaraon!
Ngan an tawo nahiyom, natawa; hi Nyor Juan nahiyom man liwat ngan napiling han ulo.
Ha uruunhanay tikang didto may duduha nga kiyosko nga gindukot hin usa nga tulay nga inatpan hin mga dahon hin saging.
