ha amon nga pagkiritaan.
“Napirit kami pag-alagad han makadadara nga pangabiabi, bisan haros ko gapilan an pagpahuway ha mga butkon ni Morfeo, pagpahalibway han mag-ul-ol ko nga kalawasan dara han paghiuruuntad dida han sarakyan nga ipinagamit ha amon han gobernadorsilyo ha bungto ha B.(2)
“Nagkalusad kami ngan napakadto pagbiling han amon kaupdanan nga nakadto naninihapon ha balay, didi, han madiniyuson ngan manggaranon nga D. Santiago de los Santos. An padi didi, an M. R. P. Fr. Bernardo Salvi ug an M. R. P. Fr. Damaso Verdolagas, nga tungod han kaluoy han Gihataasi naghiuli na dida han maul-ol nga iginhatag ha iya hin usa nga kamot nga tampalasan, kaupod han M. R. P. Fr. Hernando de la Sibyla ngan han matadong nga padi ha Tanauan ug iba pa nga mga kakatsilaan, asya an mga sumasaka didto ha balay han Creso nga Pilipino. Didto namon igkapalad hin pagtan-aw, diri la an kamanggaranon ug kamakairindig manulos han mga tagbalay, nga diri kasahiran han mga didianon, kundi sugad man an maanyag, gimahusayi ug tinamo nga sumurunod nga daraga nga usa ngayan nga tul-id nga tinun’an ni Sta. Cecilia(3) kun natuktok han iya makawiwili nga piyano, katuktok nga nakakapahanumdom ha akon kan Galvez(4) ngan han mag-upay nga turuktukon ha Alemania ug Italia. Kanugon pa la nga ini nga mabaysay nga daraga uraura kaupay hin kamapinaubsanon, ginhihinipos la iton iya hibaro, diri ipi najhahayag ha kadam’an nga waray napupulong ha iya kun diri pagdayaw. Diri ko hingangalimtan paghinabihi nga didto ha balay han nanagtawo pinapanginom kami, hin patakas, hin tsampan ug lunlon magrasa nga irinmon, sugad han nababatasan hin usa nga kilala nga manggaranon.
“Nagkita kami han paguwa. Kilala mo na an aton mga artistas, hira Ratia, Carvajal ngan Fernandez; han ira mga kilos nga magpakalilipay kami la an sinmabot, kay an diri mag-aram nga namagkita waray hadto sumantop bisan mausa kapulong.(5) Hira Chananay ngan hi Balbino mag-upay bisan kun mga parupagaw: ngani inin urhi tinmikwi,(6) kundi an kabug-usan ngan han kaburut’on pangahas sadang dayawon. Say naruruyagan han mga indiyos, labi na han gobernadorsilyo, an komedya nga tinag-alog: an gobernadorsilyo nagpapaharuhapyod han iya mga kamot ug nagsisiniring ha amon nga kanugon nga waray papag-awaya
