14
—Hi Schwartz(27) an karuyag mo sidngon, ginang?—pinmakiana hi Fr. Sibyla, waray ha iya sisiplat.
—Ambot, hi Fr. Damaso. nasiring nga Savalls; nasubad la ako!
—Ta! Savalls o Chevas,(28) ano in kuri hito? Usa nga kurit nga pagkalainan diri magigin-insik(29) — an pulong han pransiskano nga maraot an buot.
—Ngan ha siglo ikanapulo kag-upat, diri ha ikapito, —dinugngan han dominiko hin pagsuyat, pagpahaubos han duro nga pagpalabilabi han usa.
—Ta, usa nga siglo nga hadugang kun usa man nga maiban diri man gihap magigindominiko!(29)
—Ta! diri masina hi V,. R.! —ngani P. Sibyla na man, naghihipahiyom. —Labi na nga maupay nga hiya in say nahauna kay waray na ito nga buruhaton hingadto han iya kabugtuan.
—Ngan nasiring ka P. Sibyla nga hanabo ito hadton siglo ikanapulo kag-upat?— nagpakiana hi Da. Victorina dako kaupay an tuyo nga masayod;— una pa, kun urhi na, kan Kristo?
——————
II
HI CRISOSTOMO IBARRA
Pinalad an ginpakianhan kay may nagkaabot nga duha katawo ngada han ruwang.
Diri kay maghusay ngan magpakaruruyag in pamanapton nga kadaragan’an nga nakapahungat han ngatanan pati kan Fr. Sibyla; diri hi S.E. an Kapitan Heneral ngan han iya mga kasugbong nga nakapabuhat han tenyente didto han iya hilom nga kalingkod ngan nakaaghat ha iya hin pira kapitad tipadaop pagsugat, ngan hi Fr. Damaso man baga in binaliw; diri iba kundi an ginsubaran la han retrato nga may sul-ot nga prak nga upod hin kinakaptan niya ha butkon nga batan’on nga luto hin lubos an pamanapton.
—Maupay nga gab-i, mga kaginuuhan! Maupay nga gab-i, padre! — asya an siyahan nga naluwas ni Kapitan Tiyago, layon an pagharok han mga kamot han kapadian nga nanhingalimot han kabatasanan nira nga panuhol han ira kamaoo. An dominiko pinmalos han iya salaming ha mata basi makakita hin maupay han batan’on nga pagaabot pa la, ba man hi Fr. Damaso ginduduas ngan nabuburarat an mga mata.
