15
—Nagpapakatakos ako pagpakilala ha iyo kan D. Crisostomo Ibarra, anak hadton akon sangkay nga patay na!— namulong hi Kapitan Tiyago. —Pag-aabot pa la niya tikang ha Europa; amo in linusad ko pagsugat.
Han kaluwas la hini nga ngaran may hinmugumugo dayon; an tenyente nahangalimot na la paghatag hin katalahuran han tagbalay, iya hinaranian an batan’on ngan ginpaituk-itukan hin kita tikang ha tiil ngadto ha ulo. Ini hi Ibarra nakikigbarubalyo na han namamag-alirong han kabatasanan nga mga pulong. Waray didto ha butnga hadto nga ruwang nalutod nga iba kundi an iya la panapton nga itom. Dida han iya kahitaas nga labaw han iba, dida han iya panagway ug pamahungpahong, inaabat in alisbo nga maamyon hin usa nga hingpit nga pagkabatan’on nga an lawas sugad man an kalag ngaduha ginmangnuan. Inaabat dida han iya huyayag ug malipayon nga nawong in talagudti pa nga bilin han katsilan’on nga dugo nga dapit nasilhag dida hin usa nga makaruruyag nga kayumanggi nga panit nga dapit mapulapula ha bayhon dara tingali han iya pag-ukoy didto hin kahagkutan nga tuna.
—Uy ada! — nganiya pa, dapit kinalasan hin kali pay;—an padi didto ha amon! Hi P. Damaso, hinasa nga sangkay hadton akon amay!
Ngatanan an mga mata naniplat ngadto han pransiskano; kundi ini waray pagkiwa.
—Pasaylo, nagsayop ako! — namulong hi Ibarra nga nahakaalo.
—Waray ka pagsayop! — nagbaton an padi hin dapit lubad nga tingog. —Kundi an imo amay waray kakano man maginhinasa ko nga sangkay.
linisol ni Ibarra hin hinayhinay an kamot nga iya ha siyahan iyahan nanadunot nahaduhol ngan gmtmutoK gintinutok an padi ha dako nga paghipausa; kataliwan binmirik ngan say niya dayon naatubang an murusot nga panagway han tenyente nga nagkikinita pa ha iya.
—Batan’on amo ka an anak ni D. Rafael Ibarra?
An batan’on dinmuko.
Hi Fr. Damaso ginmangkaaw didto han iya linilingkuran ngan say pagpaurukurukan hin kita an tenyente.
—Maupay nga pag-abot nganhi ha imo tuna ngan magmaparupalaran ka unta kay han imo amay hinin imo dinhi pag-ukoy!— namulong an militar, nakurog an tingog. —
