— Nagsasayop ka! sinmagbang in lain; — hi Neron usa nga dako nga artista, hi P. Damaso usa nga gimarauti nga magwarali.
Lain man la an hiruhimangraw han mga gurugurang na ha panuigon.
Dida han naghihinulat hira han Capitan General didto hin usa nga balay ha gawas han bungto, nagsiring an gobernadorsilyo:
— An pagsiring kun hino an may katadungan ngan kun hino man an sayop diri kay masayon la; kundi, kun hi Go. Ibarra nagpugong pa hin madaliay...
— Kun hi P. Damaso nagpugong hin sugad la han katunga han pagpinugong ni Sr. Ibarra, karuyag mo sidngon? sinundan ni D. Filipo. An maraot nakada han pagkabalyo han panulos; an batan'on say nagpakalagas ngan an lagas amo in nagpakabatan'on.
— Nasiring ka nga waray may nagkiwa, waray may dinmaop pagbulag labot han anak ni Kapitan Tiyago?— nagpakiana hi Kapitan Martin, waray bisan usa han mga prayle, bisan an Alcalde? Hm! maraot! Diri ngahaw ako manunubos hito nga batan'on. Waray ha iya magpapasaylo hiton pagkahahadluki ha iya. Maraot, maraot! Hmm!
— Tuod ito? —nag-usisa hi Kapitan Basilio.
— Naglalaom ako, nagsiring hi D. Filipo nga nakigsiplatay han usa, —nga diri hiya pagpapabay'an la han bungto. Angay kita maghunahuna han nabuhat hadton iya mga kag-anak ngan hiton iya man liwat binubuhat. Pananglit an bungto umukoy la, mahadlok, aadi an iya kasangkayan...”
— Kundi, kaginuuhan, binmul-ang an gobernadorsilyo, ano in mabubuhat ta? Ano in mahihimo han bungto? Magkadautdaot, an mga prayle gihapon an may katadungan!
— Asya gihapon an may katadungan kay asya man gihapon an tinatagan ta hin katadungan, —binmaton hi D. Filipo nangangalas na, kinurukusog an pagluwas niya han 'gihapon," pangatadungi ta makausa ngan asya na in aton paghiruhimangraw!
An gobernadorsilyo kinmalot han ulo, hinmangad ha atop ngan mamulong hin masakit nga pulong:
— Hay! an kapaso han dugo! Baga sugad hin diri kamo maaram kun ano nga tuna inin aton hinmumutangan; diri kamo nakilala hinin aton igkasi dinhianon. An mga
