prayle mga salapian ngan nag-uurusa, kita nag-aarantaw ngan mga kablas. Oo! sari kamo pag-ugop ngan kikitaon niyo nga pagpapabay’an la kamo.
— Oo! — sinmiringihi D. Filipo bin mapait nga pulong: —asya ito an hananabo kun sugad hito an panhunahuna, kun an kahadlok igpariho han paghirot. Say gin-aatap an talagudti nga karat’an, diri an kasuruk’an nga kaupayan; say nadangop an kahadlok, diri an pagtapod; an tagsatagsa ha aton naghihin-iyaiya, diri naghuhunahuna han iba, sal it kita maluya!
— Ta, panhunahuna han iba sano ka magtamo han imo kalugaringon, ngan kitaa kun diri ka ba pagpabay'an la !(3) Diri kamo maaram han kasiringanon han katsila: An buhat ha kaluoy dida titikang ha kalugaringon.(4)
— Siring lugod— binmaton an tenyente mayor, nangangalas na, —nga an katalaw dida titikang han kaisipan ngan natatapos ha kawaray alo! Yana ngahaw masiring ako ha Alcalde nga maiwas ako ha katungdanan; tinmakas na ako hin pagminakaaalo hin diri ginpupulsan han igkasitawo. . . Makadi ako!
Lain man la an panhunahuna han kababayin’an.
— Agi!— nagharoy in usa nga babayi nga kanan maupay in kaburut’on an pamayhon; — amo gihapon ito inin mga batan on. Kun buhi pa an iya buutan nga iroy umunano daw la? Hay, Ginoo! Nakakahunahuna ngani ako nga in sugad nga hinabo mahananabo man hinin akon bata nga mapaso liwat in kaulo ... ay Jesus! haros ikinaaawa ko iton kahimtang hadton iya nanay... mapatay ako hin kasakit!
— Ako,— sinmagbang in usa nga babayi; —diri ko ikasasakit kun ito hanabo hinin akon duduha nga anak.
— Ano nganimo, Kapitana Maria?(5)— nakapakiana an una magyakan gintakpo an duha nga kamot.
— Karuyag ko nga an mga anak umunong han ngaran han ira mga kag-anak, Kapitana Tinay; maunano ka kun mga sano, balo ka na, mabati mo in libak nga maraot hadton imo bana ngan iton imo anak hi Antonio tumakmod la, diri mag-aringasa?
— Diri ko hiya bibindisyunan!— pinmur-ak in ikatulo nga amo hi Hermana Rufa, —kundi. . .
— Diri bibindisyunan diri ako hito!— nagsiring an maluluuyon nga Kapitana Tinay, —diri angay magyakan hito
