Duha nga sibil nga tig-usa hin balbag sinmulong han orkesta ngan nagsiring nga ira karuyag ig-ukoy an paguwa; kinadto han tenyente mayor, hin pagdakop, upod an iya mga kuwadrilyeros nga nagpapakataklos hin mga samsil, ngan ira nagkadadakop bisan kun duro an pangato.
— Dad'on niyo ha tribunal! — nagsugo hi D. Filipo; —bangin niyo pamuhian !
Binmalik hi Ibarra nga nagpipinamiling kan Maria Clara. An nagkakahahadlok nga kadaragan'an nanngapot ha iya, nanngungurog ngan ipinamamagduruas; hi Dada Isabel sinmalikamo pagletaniya hin linatin.
Han panhiulii han mga tawo han kalas ngan kasayod kun ano an nahinabo, an kangaralson han ngatanan binmuto. Inmuran in bato ngadto han mga kuwadrilyeros nga nagdudulong han duduha nga sibil; may ada ngani nagsiring hin pakisurit han kuwartel pagtubod didto kan Da. Consolacion ngan han alperes.
— Amo la ito in maupay nira! — nasiring in usa nga babayi, dako an tingog, nga nanlululo ngan iginbabarabad an mga butkon: pagsamok han bungto; diri an iba say ginpapasiparahan kundi an mga tawo nga buutan! Muon iito iton mga tulisan ngan hiton mga parasugal! Hala, suriti ta inin kuwartel!
May uusa nga naghihinilot han iya butkon ngan nangangaro hin kompesyon; may pagharoy nga nababati tikang ha ilarom han mga bangko nga nagkatutumba: amo in usa nga musiko. An paguruwaan napuno hin mga artistas ug mga bungtuhanon nga nagsasarabat pagyakan. Nakadto hi Chananay nga may sul-ot pagka-Leonor dida han El Trovador, nga nakikiglinangka pagkinatsila kan Ratia nga may sul-ot man hin pagkamagturutdo ha liburan; hi Yeyeng, nga nakakakurugpos han iya panyolon nga seda, iginkakahimangraw kan prinsipe Villardo; hi Balbino ngan han mga moros namamagliaw han mga musiko nga may nagkapipiulan. May mga katsila nga namamagtaratara han kadam'an namamagyinakan ngan dayon pagwawali han bisan hino nga igkita.
Kundi may ada na nakapangon nga tawo. Hi D. Filipo sinmabot dayon han ira tuyo salit dinmalagan ngadto pagpugong ha ira.
— Ayaw niyo pagsamuka an bungto! — an guliat niya; —buwas han aga mangangaro kita hin katuhayan hini nga
