hinabo, pamamatian gad kita ako in maaram nga diri pagkumukumuon la an aton katadungan!
— Diri mahihimo! — may namagbaton; — amo ito gihapon an binuhat ha Kalamba; sugad man hito an iginsaad, kundi an Alcalde waray binuhat nga ano man! Karuyag namon nga kami an maghukom! Tana ha kuwartel!
Kawang la an mga pamulong han tenyente mayor; an kapangon waray pasalang. Linmingi hi D. Filipo ha iya mga luyo pangita hin makakatabang ngan say niya hinkit'an hi Ibarra.
— Sr. Ibarra, pag-alayon kita! Ipugong ako anay hini nga mga tawo hamtang makuha ako hin mga kuwadrilyeros!
— Ano in mabubuhat ko? —nagpakiana an batan'on nahapapahungat. Kundi an tenyente mayor nakadto na ha hirayo.
Hi Ibarra naniplat man ha iya luyo pamiling hin mananabag, waray hiya sasabot kun hino la. Palaran kay hinsiplatan niya hi Elias nga nakadto, waray pagbabantad, nagkikinita han kiwa han nakapangon nga tawo. Say dinaop ni Ibarra, kinaptan ha butkon ngan sidngon hin kinatsila:
— Tungod sa Dios, buhata an imo mahimo! Ako, waray ko gud mabubuhat nga bisan ano la!
An paraulin sinmabot ada kay nawara dayon dida han kadam'an.
Hinbatian in magbaskog nga lantugi, in magkusog nga mga pulong; katapos, hinayhinay, an kapangon nagtikang pagsarang ug an tagsatagsa naghinturos han kasinahon.
Iginkaigo la, kay hadto ngahaw naguwa man an mga sundalo nga nanal-ob hin bayoneta ha ira mga pusil.
Hamtang naririgumok, nag-aano man an padi?
Hi P. Salvi waray higda. Nagtitinukdawon ha tungod han mga persiyana, waray kiwakiwa, nagkikinita ngadto ha plasa ngan danay kun usa magpanhayhayon. Kun diri la uraura kamaarupaop an iya suga tingali hikit'an ta nga luhaon an iya mga mata. Nahagusan hiya dida hini hin usa kauras.
Ug asya ini an iya kabutang nga magubot didto ha plasa. Ginkinita niya an nagsasalamok nga ngadto-nganhi han mga tawo nga an aringasa ug mga gugliat an tuman la nga napaabot ngadto ha iya. Usa han iya mga suruguon, nga sinmaka naghihingahinga, asya an nakaghatag ha iya hin kasayuran han hinabo.
