Inalpan hiya hin usa nga panhunahuna. Ha butnga han mga kasamok ug mga kagubot dida an mga magraot in buhat pagpapahimulos han mga kahadlok ug mga kaluya han babayi; ngatanan nagdadadlagan ug nag-iilinilikayan, waray nag-aatap han igkasi, diri hinbabatian an gugliat, nagkakauunop an kababayin’an, nagsusurunggo, nagkakapupuklid, an kalisang ug kahadlok nakakabagi han paghirot han kaaluhan, ngan labi na kun gab-i...ngan kun nagsisihigug-ma! Sugad hin kinikita niya hi Crisostomo nga nagkukugos kan Maria Clara, nauunop, ngan napakawara ha mga kasisidman.
Linmusad hiya, linayat la an hagdanan, waray kalo, waray tungkod, ngan sugad hin buang tinmadong ngadto ha plasa.
Iginkita hiya didto han kakatsilaan nga namamagbinusa han mga sundalo, sinmiplat hiya ngadto han pinanlilingkuran nira Maria Clara ug han iya kasangkayan ngan kinita niya nga waray na nanlilingkod.
— Padre, padre!— ginuliatan hiya han kakatsilaan, kundi waray hiya pag-asa, dinmalagan hiya tipakadto han balay ni Kapitan Tiyago. Didto nakaginhawa hiya; kinita niya nga nasilhag dida han kapis in usa nga lambong, an maambong nga lambong nga puno hin katahom ug kabaysay, an lambong ni Maria Clara ug an iya dada nga nakakadara hin mga kopa ug mga tasa.
— Ah ! maupay!— nakasiring, — inabutan man la ngayan hin sakit!
Tinakpan ni Dada Isabel an kapis ngan an mahusay nga lambong waray na kitaa.
Linmakat didto an padi, waray pakakita han kadam’an
Say niya nakikita in usa nga mahusay nga dagway hin daraga nga nakaturog ug matam-is an pagginhawa; marabong an iya mga pirok ngan makaruruyag an pagbawod sugad han mga pirok han Virgen ni Rafael;(3) nahiyom an gutiay nga baba; ngan an bug-os nga nawong amo an ladawan han kauray, kahingpit ug kaputli; adto nga nawong amo an matam-is nga inop nga nahabubutnga han magbusag nga tabon ha iya higdaan, daw ulo hin kerubin ha butnga han mga dampog.
May iba pa hini nga iya nakikita. . . kundi, hino in makakagsurat han lunlon mahirimo hin usa nga hunahuna nga nagsusukob?
