Tingali an korresponsal han pahayagan, kay tinapusan niya hin sugad hinin masunod an iya ginsurat mahatungod han ngatanan nga nahinabo hadto nga kaadlawan:
"Salamat makayukot pa, salamat nga diri matapos har sayo ug maabtik nga panabag han M. R. P. Fr. Bernardo Salvi nga waray pagtagad han mga kataragman, ha butnga han naglililigsa nga kapangon, ha butnga han kadam'an nga waray na nakakapugong, waray kalo, waray tungkod, say nakagpaisol han kapintas han kadam'an, tungod la han iya makabigon nga mga pulong ug han gahom ngan kamakatarag-ob nga diri nahabubulag han padi hin usa nga Tuluuhan ha Pagkadait. An matadong nga padi, dara han pangalinsakob nga waray makaduduha, tinmalikod han murayaw nga pagpahuway ha iya higdaan, nga batasan han sugad ha iya nga malinis an kasingkasing, tungod la ha pagtalinguha nga waray mahanabo nga maraot han iya nasasakupan bahin ha tuluuhan. An mga umurukoy ha S. Diego diri hangangalimot hini nga darayawon nga buhat han ira bantog nga Amay ha kalag ug sadang hira managbalos ha iya, ha kadayunan!"
Sugad hadto nga kahimtang han pamurubuot hi Ibarra waray mahangangaturog; salit, unay pagliawliaw niya ug pagkuha ha hunahuna han mga kasamdong nga kun gab-i nadugang, nagbinuhat hiya didto han iya mamingaw nga gabinete. Naagahan hiya pagpinanarusampod ug pagsinarusalakot hin mga bulong nga iya anay sinarihan hin mga sipak ug iba pa nga butang ngan dayon niya ipanulod hin mga garrapa ngan dayon titigamni hin mga ihap ngan sarupon hin lakre.
Usa nga suruguon sinmulod pagpasabot nga may sinmaka nga umanhon.
— Pasudla! —nagsiring, waray lumingi.
Sinmulod hi Elias nga nagtinukdaw la anay, waray aringasa.
— Aw! hi ikaw ngayan? — nagmugo, hi Ibarra ha tinagalog han pakakilala ha iya; — pasaylua ako nga pinapag-
