hinulat ta ikaw, waray ako panginginano: may ada ko ginsarihan nga bulong nga kinahanglanon gud. . .
— Diri ko ikaw buot paglibangon! —binmaton an paraulin; nakanhi ako, pagpakiana kun ano in imo tugon ha lalawigan ha Batangas kay ngadto ako ito nga uras; ngan sunod an pagdara ha imo hin usa nga maraot nga sumat...
Ipinakiana ni Ibarra an iya mata ha paniplat kan Elias.
— An anak ni Kapitan Tiyago masakit, —nagpadayon hi Elias hin waray kaalantad, —kundi diri uraura.
— Daan ko na gud ito ginhihinirutan! —nagmugo hin gutiay nga tingog hi Ibarra, —maaram ka kun ano nga sakit?
— Hiranat! Ta, kun waray mo na igsusugo...
— Salamat, sangkay ko; maupay na la nga paglakat... kundi, tuguti ako anay mausa nga pakiana; kun diri angay ha imo ayaw pagbaton.
Hi Elias dinmuko.
— Pinaunano mo an pagpugong kagab-i han kagubot? — nagpakiana hi Ibarra, iya ginkikinita an iya kaatubang.
— Masayunay kaupay! binmaton hi Elias hin kinaiya nga tingog; -an nangungulo han kapangon asya in duduha nga magbugto nga nailo hin amay kay gindabal han mga sibil; usa kaadlaw pinalad ako hin pakapanabag ha ira hin sugad nga kakurian dida ha mga kamot ngahaw han nagpasipara han ira amay, salit hira ngaduha dapit may utang ha akon nga kaburut'on. Say ko hira dinaraon kagab-i ngan hira na an nagsagdon han iba.
— Ngan ito nga duha nga magbugto nga namatyan hin amay kay gindabal?...
— Sugad han kanan amay nira in aabutan, —binmaton hi Elias hin hamubo nga tingog; —kun an kawaray palad nadaraon ha usa nga panimalay ngatanan an mga sulodbalay inaalap; kun an linti napurok ha usa nga kahoy, an bug-os nga kahoy sinusunog.
Hi Elias, han pagsabot nga waray na pagtitingol hi Ibarra, nanamilit.
Hi Ibarra, han nag-uusaan na la, nawad'an han iya maligdong nga bayhon nga iinatubang han paraulin ngan say dayon ha iya ginmuop an kasakit.
— Akon, akon la ginsakit! —nagyakan hiya.
Nagpanapton hin dagmit ngan lumusad.
Usa nga gutiay nga tawo, luto an pamanapton, may dako nga ulat ha wala nga bayhon, sinmugat ha iya ngan
