Pasaylua ako, senyor, kundi, an ha akon, ito nga iyo Pamunuan lurong ngan tarugkaya kay nalilipay la hito nga iya kahimtangan! Salamat la han imo pakig-angay; ngain ta ikaw idudulong?
―Ayaw,― ngani Ibarra; ― paglantugi kita, kinahanglan ta sabuton kun hino an may katadungan dida hini nga turuhayon.
―Pasaylua ako, senyor, ― binmaton hi Elias, napiling; ―diri ako kaupay hag-id ha pamulong nga makakabig ha imo; bisan kun nakagtuon ako hin gutiay, usa la ako nga indiyo, inin akon pagkatawo ruhaduhaan, ngan inin akon mga pulong diri pagmamatuuran. An namagpahayag tipa hini kakatsilaan ngatanan ngan bisan pa mga kalinurungan la an ipinamagpahayag, tutuuron kay an tingog, an mga kadungganan, an pagkakatsila, nakakahatag hin kadigon, salit diri na la ako mangangahas pagsupil ha ira. Labot pa, yana nga kinikita ko ikaw nga nahagugugma hinin imo tuna, ikaw nga may amay nga napahuway ha salad hini nga danaw, ikaw nga gin-ayat, ginpasipad'an ngan iginsumbong, amo ini an imo panhunahuna, waray mo sapayan an ngatanan, pati an imo kinaadman, inaalpan ako hin pagruhaduha han akon mga katadungan ngan itinutugot ko nga tingali man gud nagsasayop an bungto. Sisidngon ko ito nga mga waray palad, nga natapod han mga tawo, nga say nira tapuran an Dios o an ira mga butkon. Ibinabalik ko ha imo pagpasalamat ngan pagsugo kun ngain. ta ikaw dadad'a.
―Elias, inin imo magpait nga mga pulong natugkad ha akon kasingkasing ngan nakakapagruhaduha ha akon. Mag-aano ako? Diri ako dinhi pag-aram ha sakob hinin aton bungto salit tingali diri ko kinikilala an iya mga kasuruk'an; didto ako pagtubo ha kolehiyo han mga hesuwitas, didto ako dumako ha Europa, nagintawo ako ha mga basahan ngan say ko la nabasa an gindara ha kapaw'an han mga tawo: an nahabilin ha kasisidman, an waray hipahayag han mga manunurat, diri ko hinbabaruan. Kundi, bisan la hinihigugma ko an aton tuna sugad han imo man ha iya paghigugma, diri la tungod kay katungdanan han ngatanan nga tawo an paghigugma han tuna nga nautangan niya hin kinabuhi ngan mauutangan tingali han urhi nga puruy'anan; diri la tungod kay igintutdo ha akon han akon amay ngan tungod kay indiya an akon iroy, ngan tungod kay aan-
