hi an ngatanan nga magtam-is ko nga hinumduman, hinihigugma ko tungod kay inutangan ko ngan uutangan ko han akon kapalaran!
―Ngan ako tungod kay inutangan ko han kawaray palad, ― namulong hi Elias.
―Oo, sangkay ko, sayod ako han imo mga pag-antos, sayod ako nga waray mo kapalaran ngan ini amo an nakakasugad nga maitom an pagkita mo han kabubwason ngan asya man ini an nakakadara han imo panhunahuna salit gintitirutimbang ko hin pamati han imo mga sumbong. Kun masasayuran ko la an gintikangan, an bahin hito nga kaagi...
―An mga nasugaran ko lain an gintikangan; kun maaram la ako nga may ada himurulsan; igsusumat ko ha imo, kay labot la nga diri ko ini ginhihilom, kilala kaupay han kadam'an.
―Bangin, kun hibaruan ko na ibhon ko an akon panhunahuna; sayod ka nga diri ako natapod han mga yakan la, say ko ginmamatuuran an mga buhat.
Hi Elias namurubuot anay nadaliay.
―Kun asya ito, senyor, ―nganiya, ―pag-aasuyan ta ikaw hin halipot han akon kaagi.
―Makaunman na katuig ngada yana tikang nag-uukoy an akon apoy ha Manila, tenedor de libros ha tindahan hin usa nga komersiyante nga katsila. Batan'on pa hadto an akon apoy, inasaw'an ngan may uusa nga anak nga lalaki. Usa kagab-i, waray sabuta kun ano in hinungdan, nagdukot an tindahan, an sunog nakaluob han bug-os nga balay ngan nagdalait ngadto han kadam'an nga mga higrani. Dako kaupay an nakarag nga salapi, ginbiling an makasasala ngan say iginsumbong han komersiyante an akon apoy. Kawang la an pamaribad, tungod kay kablas ngan waray ipinakakabayad han mga bantugan nga abogado, ginhukman nga paglambahon ha atubangan han kadam'an ngan igsusudoy ha sakob han Manila. Diri pa la maiha nga hinngangalimtan ini nga makaaalo nga sirot, nga ginngangaranan nga paglibod, (caballo y vaca) ngan labi pa kamapait han kamatayon. An akon apoy, nga tinalikdan han ngatanan, labot han iya
