467
han tawo hin mabinay nga tingog:
—Anak ka? Tinmangdo an bata.
Ano in imo nahuhunahuna nga bubuhaton?
—Iglulubong!
—Didto ha lubnganan?
—Waray ko salapi, ngan diri man ngani matugot iton padi.
—Ta, ano man? . . .
—Kun bubuligan mo ako.. .
—Nanluluya ako kaupay, — binmaton an tawo nga pinmakalingkod ha tuna hin hinayhinay ngan mangalinduon han duha nga kamot; — samad ako.. . may duha na kaadlaw nga waray ako kakaon ngan kakaturog.. . Waray may pinmakanhi nga tawo yana nga gab-i?
An tawo inmukoy ngan magpinanmurubuot, ginkikinita an makairindig nga dagway han bata.
—Pamati! — nagsiring hin labi pa kamaluya nga tingog! —bangin diri man ako kapawaan. . . Ha ikakaruhaan kapitad tikang dinhi ngadto ha tabok hiton sapa may tinambak nga isurungo; dad’a nganhi, tambaka dinhi ngan ibawbaw dida inin amon mga lawas; katima tabuni kami liwat hin kahoy ngan suriti, dakua la nga tap-ong basi kami maagbon. . .
Naniid hi Basilio.
—Katapos, kun waray umabot nganhi nga tawo.. . kutkuta ini dinhi kay igkikita ka hin damo nga salapi... imo ito ngatanan. Pagtuon!
An tingog han tawo nagtitika-an-tuman na la nga hinsasabutan.
—Pamiling na hin kahoy nga tarap-ungon.. . bubuligan ta ikaw.
Linmakat hi Basilio. An tawo inmatubang ha Sidlangan ngan mamulong sugad hin nangangaraba:
—Waray na ako.. . Ako mapatay nga diri ko makikita an pagsulhog han kaagahon ha akon tuna . . .! kamo an makakita sauruga niyo . . . ayaw niyo hikalimti an nagkapupuklid ha kasisidman han gab-i!
Ihinangad an mga mata ha langit, an iya mga im-im nagluwas hin usa nga pangamuyo, katapos tumungok ngan maghinayhinay pagtikapuklid ha tuna.. .
Mga ikaduha kauras tikang hadto, hi Hrmana Rufa
