pa? Kita ngahaw nagpakakita na kita nga an nagwawali nagtitinudlok pagpakita ha kadam’an hin usa nga panyo nga
duguon, dida han pagtanggal han Krus ngan naipagturuok
na unta kita hin kaaghop kun waray igkapalad hin maraot
para han aton kalag nga an sakristan nagdig-on gud ha aton
nga adto diri tuod, dugo la adto hin usa nga manok nga
gin-ihaw gin-asado ug hadto ngahaw kinaon bisan kun Viernes Santo . . . ngan matambok ngani an sakristan. Salit
hi Kapitan Tiyago kay tawo nga matagam ug makidiyos,
naghihirot gud pagpaharani ngadto han karis ni S. Miguel:
“Angay pumaharayo han mga kataragman”, nganiya pa,
“maaram ako nga usa nga santos nga manulunda, kundi, a,
diri la ako natapod . . . diri ako natapod!”
Waray nalabay nga tuig nga diri hiya kumadto pagduaw han maribhong nga Antipolo dara in usa nga orkesta, ngan didto nabayad hiya hin duha hiton damo nga mga misa de gracia nga nasasakupan hiton tutulo nga nobenaryo, ngan hiton iba nga adlaw nga waray nobena ngan unina nakarigos hiya dida hiton sangyaw nga burabod nga kinarigusan han diyusnon nga ladawan. An mga magsiningbahon naabat pa han tunob ngan han lupot han buhok dida han matig-a nga bato han iya pagdakdak, sugad hiton iba nga babayi nga naghihiso hin lubi, ngan baga sugad hin asero, o diamante, an iya buhok ngan uusa katonelada an bug-at. Hinaot pa unta magwas-ig liwat ini nga makaharadlok nga ladawan hiton iya buhok dida ha tungod hiton mga mata hini nga mga magsiningbahon ngan itunob iton iya mga tiil dida hiton ira dila, kun ulo ba! Dida hiton may burabod aada hi Kapitan Tiyago kakaon han inasal, asado o sinigang(14) nga turungaw(15) nga sinaktan hin dahon hin “alibangbang”(16) ngan hin iba pa nga mga kaluto, may marasa, may diri man kaupay. Iton duduha nga iya pamisa nababaydan ito niya hin kapin hin upat kagatos kapisos, kundi diri na mahal kun paghuhunahunaon an kahimayaan nga kinakarawat han Iroy sa Dios tungod han mga kuwitis, namam agbirik nga kalayo, mga pabuto ngan mga luthang nga ginngangaranan nga bersos, ngan kun pagpapainurubuuton an mga ganansiya nga iya unina nakakarawat ha sulod han tuig tungod hini nga mga pamisa.
Kundi diri la kay an Antipolo an karadtuon niya hiton iya nakakaruntaw nga pagdiyos. Didto ha Binondo, ha Pampanga ngan ha S. Diego, kun may ada niya iburulang nga manok nga pinupustahan hin dako, nagpapadara hiya
