maghihimangraw kita hin kasuruk’an gud nga himangrawon; tana ngadto ha imo buruhatan nga sulod.
Hi Kapitan Tiyago baga waray na bimutang, waray na hipagyakan, kundi sinmugot na la ngan sinmunod ha luyo han dako in lawas nga padi nga nagsada dayon han agian paghisakob la nira ngadto ha sulod. Kay naghihimangraw pa man hira hin tago, usisaha ta anay kun ano an inabutan ni Fr. Sibyla. An makinaadmananon nga dominiko waray didto han iya kombento: sayo pa, katima la pagmisa, mapakadto han kombento han iya Orden nga aadto ha pagsulod ha Puerta ni Isabel II, kun usahay ni Magallanes, alagad la kun hino an hadi didto ha Madrid.
Hin waray magtagad han mahamot nga baho han si kulate, sugad man han aringasa han mga kahon ngan han hinarantiyaw hin salapi tikang ha Procuracion,(1) ngan an tuman nga binmaton han ubos nga paghatag hin katalahuran han hermano procurador, hi Fr. Sibyla sinmaka han kom bento, gintara an mga ruwang ngan tumuktok han iya kamaoo ha sadhanan hin usa nga sulod.
—Dayon! — an baton hin usa nga nagharoy tikang didto ha sakob.
—Ibalik unta sa Dios kan V.R. an maupay nga lawas!
—asya an pagtahod nga iginhatag han batan’on nga do miniko han iya pagsulod. Nagliliningkod didto hin usa nga dako nga lingkuran in uusa nga tigurang nga padi nga magasaay, madaragdarag, masugadsugad hiton mga santos nga ginpintar ni Rivera. Nanlulunod na an mga mata dida han haluag nga pangirayan nga tinutungbawan hin mga kiray nga magrabong nga, tungod kay unob la nga iginkikinuriot, napadugang han kamag-inggat han himaratyon na nga mga mata.
Hi P. Sibyla nagkinita anay han masakit, kinukugos an kamot ha tungod han talahuron nga eskapularyo ni Santo Domingo. Katima, itinungok an ulo, waray pagyakan, baga in naghuhulat.
—Ay! Hernando, pinapapag-operahan ako; operasyon hini nga akon na panuigon! Ini nga tuna, ini nga makaharadlok nga tuna! Angay mo pagtigamnan ngan pagmaanan inin akon kasugad, Hernando!
Ihinangad ni Fr. Sibyla hin hinayhinay an iya mga mata ngan ngadto siplat han nawong han masakit.
—Ta, ano man an imo inaayunan? — nagpakiana.
