nga hangin nga mamara nangunguy-og han mga tarimpungayan han kakahuyan ngan napainagutiot han kakawayanan.
Hi Ibarra naglilinakat waray kalo; waray naturo nga luha dida han iya mata, waray nagawas nga haroy didto han iya dughan. Naglilinakat baga sugad hin may iya ginlilikyan, tingali an lambong ni iya tatay, tingali an nagtitidangan nga bagyo. Gintara niya an bungto ngan napasingadto hiya ha may ligid, ngadto han daan nga balay nga maiha na nga mga tuig waray niya sasak’a. Libot hin kuta nga tinutubuan hin mga eucaliptus, baga sugad hin nagkakampay ha iya: an mga tangbuanan mga bukas; an burak(3) malipayon nag-aaruabyog han iya mga sanga nga tugob hin bukad; an mga sarapati namamaglinupadlupad pasalibot dida han tais in bubong nga ira urukyan nga natitindog ha butnga han tanaman.
Kundi an batan’on waray hini pakakasiplat nga mga kaliawan nga sugat han nabalik han daan nga kalugaringon; ngadto isisiplat an iya mga mata hin usa nga padi nga nagtitipasugat ha iya. Asya an padi ha San Diego, an mapinainuinuhon nga padi nga aton na hinkit’an nga kaaway han alperes. An hangin nakakapilo han halapad nga paldiyas han iya kalo; an iya sutana nga ginggon nahadudukot ha iya lawas ngan napahataw han iya mga gamay ug dapit pingkaw nga mga tiil.(4) Ha too nga kamot nakakabitbit hin usa nga tungod nga parasan(5) nga may karaptan nga marpil. Siyahan pa adto nga pagkakita nira ngan hi Ibarra.
Han paghitapo nira inmukoy an batan’on ngan tutukon an padi; hi Fr. Salvi linmingiw ngan baga sugad hin waray la pakasiplat ha iya. Usa la kadali an gin-alngan: dinangkulos dayon ni Ibarra, pinigungan niya ha mga sugbong an padi, han iya mga kamot, ngan pakianhan hin tingog nga an tuman la nga nasasayuran:
—Ano in binuhat mo han akon amay?— ginpakianhan niya. Hi Fr. Salvi, ginduduas ngan nangungurog, han pakasabot la han hilig han batan’on nga inaabat dida han iya nawong, waray pakabaton: baga sugad hiya hin binaliw.
—Gin-ano mo an akon amay? — liniwatan pagpakiana hin pagaw nga tingog.
