nga isinusumat ni P. Girard. Waray sapayan an hinmumutangan.
Yana: hira hino man an nagkakatutubod didto
hadto nga mga kalayo nga namamaglinaga tikang han katikang hinin kalibutan? An kamaiha na bin duro nga may
Purgatoryo dida ta sasabuta han Filosofia han aton tuluuhan nga nasiring nga an Dios waray na ginlarang nga bisan ano tikang pumahuway.
—Tingali may ada na hadto in potentia, diri in actu!(7) —sinmumpay an tenyente mayor.
—Kun asya man! Lugaring pagsusumatan ta kamo nga may ada nakakilala nga hadto may ada na Purgatoryo in actu, usa ha ira amo hi Zarathustra o Zoroastro, nga asya in nagsurat hin bahin han Avesta ngan nagtukod bin usa nga tuluuhan nga may ada ginkakasamasamahan hinin aton; ngan hi Zarathustra, nasiring an mga makinaadmananon, nag-ukoy ha tuna kapin hin walo kagatos katuig anay ugsa matawo hi Hesukristo. Nasiring ako nga kapin kay hi Gaffarel, katima niya basaha han mga sinurat nira Platon, Xanto de Lidia, Plinio, Hermipos ngan Eudoxo, nagmamatuod nga labaw pa ngani hin kanan duha kayukot katuig anay ugsa umabot hi Kristo. Bisan pa ito kun ano, an kamatuuran gud hini amo nga hi Zarathustra nahamamangraw na hin usa nga Purga toryo ngan nagtututdo hin paagi basi mahagawas didto. An mga buhi makakahimo pagtalwas han mga kalag han nagkamamatay ha sala kun magbasa han Avesta, magsunod han mag-upay nga mga buhat, kundi kinahanglan nga an mangangadi urupod han minatay tubtob ha ikaupat kalito. Binubuhat ini ha sulod hin lilima kaadlaw, makausa ha ikinatuig. Unina han nakakadukot na ha bungto ini nga pagtoo, an kapadian hadto nga tuluuhan inmabat nga may ada didto usa nga maupay nga pagpakabuhi, salit ira ginpahimulusan adto nga mga “bilangguan nga haglarom ug magsirom nga ginugup’an han mga pagbasol”, siring pa ni Zarathustra. Iginlagda na ngahaw nira nga an usa kaderem, salapi ini nga sinisiring hadto nga gutiay la in pulos, makakahimo pag-iban han usa nga kalag hin usa katuig nga kasakitan; lugaring kay didto hadto nga tuluuhan may ada mga sala nga sinisirutan hin tag-300 o tag-1000 katuig nga pag-antos, sugad pananglit han pagbuwa, an paglimbong, an diri pagtuman han saad ug iba pa; an nahananabo unina nga adto nga mga banyaga nag-
