papakahimos hin tinagribo nga derems. Dida hini iyo inaabat in Purgatoryo nga masugadsugad hinin aton, an ginkakalainan la an pagkaiba han tuluuhan.
Usa nga kikidlat nga sinundan hin dalugdog nga nakapamungol, nakapabuhat kan Duray dida han iya linilingkuran ngan nakapamulong, nangungudos:
—Jesus, Maria y Jose! Babayaan ta kamo anay; magsusunog ako hin palma bendita(8) ngan magdadagkot ako hin mga kandila nga perdon.
An uran nanuro baga in busay. Hi Pilosopo Tasyo nagpadayon han iya pamulong, hamtang iya ginkikinita an batan’on nga ginang nga nagtitiantaw:
—Yana kay waray dinhi makakaghimangraw kita mahatungod hini nga bahin hin waray makauulang. Hi Duray, bisan la kun may gutiay nga kamatinuuron hin diwata, maupay nga katolika, ngan diri ako hiara magbungkag han pagtoo didto ha sakob han kasingkasing: usa nga uray ug waray labyaw nga pagtoo nalutod didto han sinisiring nga fanatismo, sugad han paglutod han laga dida han aso; an mga lurong ug an mga buta diri hito maaram maglain. An ha aton nga bahin, makakahimo kita pagsiring nga an pagtoo han Purgatoryo maupay, banal ngan may katadungan; asya in hindadayunan han pagkausa hadton nagkakamatay na ngan han mga buhi pa, ngan nakakaaghat hin uray nga pag-ukoy. An maraot aada ha paghilasngi. Kundi kitaa ta yana kun naunano nga nahitampo ini nga pagtoo han katoliko nga tuluuhan hin waray man ini hinanabihi han Biblia ug han mga Santos Evangelios. Bisan hi Moises, bisan hi Jesucristo waray gud hinabi magutiay man la mahatungod hini, ba man an hinnanabihan dida han kanan mga Macabeos diri igo, labot pa, ini nga basahan ginhukman nga waray pulos han Concilio ha Laodicea, ngan an Santa Iglesia Catolica diri pa la maiha nga natugot hini nga basahan. An tuluuhan han mga paganos waray liwat hinanabi mahatungod hini. An hinnanabihan ni Virgilio nga Aliae panduntur inanes(9) nga asya in nakaaghat kan S. Gregorio el Grande hin pamulong mahatungod han mga kalag nga nagkakalulumos, ngan asya an iginpahayag hin sayod ni Dante dida han iya Divina Comedia, diri say magigintinikangan hini nga pagtoo. Bisan an mga brahmanes, an mga budistas ug an mga taga Egipto nga asya an naghatag han Grecia ngan han Roma han ira Caronte ug
