Averno, waray masugadsugad hini nga tinuuhan. Diri ko na hinanabihan an mga tuluuhan hadton mga bungto ha Amihanan han Europa, kay mga tuluuhan adto hin parapangubat, hin mga parasiday ug mga parapanganop, diri tuluuhan hin mga pilosopos bisan kun gintitipigan pa nira an ira mga tuluuhan ug mga turumanon nga kanan mga kristyanos na, waray ini nira mahadara, upod han ira mga kapangon, ngadto han panikas ha Roma, waray nira hilingkod ha Capitolio: an mga tuluuhan didto han mga burong napapapas ha kabuntaagan han adlaw. Masayod kamo: an mga kristyanos han una nga mga panahon waray pagtoo han Purgatoryo: nagkakamamatay hira ha malipayon nga paglaom nga ha gilayon igkakaatubang sa Dios. An siyahan nga kapadian hinin aton tuluuhan nga baga nanhinabi han Purgatoryo amo hira S. Clemente ha Alejandria, hi Origenes ug hi S. Irineo nga tingali nanhihidara pa han tuluuhan ni Zarathustra nga hadto nga panahon nahurak pa ngan samwak ha bug-os nga Sidlangan, naabat man kita han mga suson han kamakisidlanganon ni Origenes. Say igindidig-on ni S. Irineo an pag-ukoy ni Jesucristo hin “tulo kaadlaw ha ilarom han tuna,” tulo kaadlaw nga Purgatoryo, ngan iya dinhi hinuhuman nga an tagsa nga kalag angay anay mag-agi didto tubtob ngada han pagkabanbaw han lawas, bisan kun an Hodie mecum eris in Paradiso(10) baga nariwa ha iya. Hi S. Agustin nahanabi man liwat hin Purgatoryo, kundi bisan la hiya diri gud nagdidig-on nga may ada, nasiring hiya nga tingali may ada, kay ginhuhunahuna niya nga an mga kasakitan nga aton nakakarawat dinhi ha tuna tungod han aton mga sala mahihimo hin pagdayuna didto ha lain nga kinabuhi.
—Kadako hin paso ni S. Agustin! — binmul-ang hi D. Filipo; — diri pa hiya natunga hinin aton gin-aantos dinhi, karuyag pa nga igpadayon didto. —Ada, asya ito an kahimtangan: an iba natuod, an iba diri. Bisan kun gintangduan ni S. Gregorio didto han iya De quibusdam levibus culpis esse ante judicium purgatorius ignis credendus est(5) waray nahimo nga kahumanan tubtob ngada ha tuig 1439; kun asuyon, walo anay kasiglo ngada han Concilio ha Florencia nga naglarang nga kinahanglan nga mamay-ada kalayo nga nakakapurog han mga kalag han nagkakamatay ha kaluoy sa Dios kundi waray pa pakagpakatakos han Kamatadong nga Diyosnon.
