Maysa a siled a sangapulo ket dua wenno sangapulo ket lima a metro ngata ti katiddagna ket ti subana, walo wenno sangapulo met a metro. Dagiti diddidingna a napapudawda iti apog. napunnuda kadagiti nayug-uged a tiring, a nakalalaad ken nakaal-alas, ket adda pay surat da a mangilawlawag la ngarod iti kayat da a sawen. Iti maysa a suli ket naurnusda a nairaked iti diding, addada makita a sumagsangapulo a palpaltog a kadaanan iti babaet dagiti naglatlati a sabsable, es-espadin ken taltalibong: isuda dagiti ig-igam dagiti kuadriliero.
Iti maysa a murdong ti siled, a naramenan iti narugit a dalingding a nalabaga, adda nga aglemlemmeng a naibitin iti diding, ti ladawan ti Ari; iti babaen ti ladawan, a naiparabaw iti batay a kayo, maysa a daan a tugaw a dakkel ti mangiwayat kadagiti nadadaelen a im-imana; iti sango, adda maysa a dakkel a lamisaan a kayo, narugitan iti tinta, nategteg ket nakitkitikitan iti ado a kita, a kas kadagiti lamlamisaan dagiti ti-tianggi sadi Alemama a masansan a pappapanan dagiti agad-adal. Bangbangko kada tugtugaw a daan ti mainayon kadagiti al-alikamen. Iso daytoy ti siled a pagpurukan, pangukuman, pagdusaan, kdmpy. Ditoy iso ti pagsarsaritaan ita dagiti agturturay ti il-ili ken dagiti barbarrio: ti gunglo dagiti lallakay saan a makilaok iti gunglo dagiti agtutubo, ket maysan maysa kadakuada saan da a makapaggiinnanos isuda kuma ti partido konserbador ken partido liberal, isuna la a napalalo dagiti panagdadangadangda kadagiti il-ili.
—¡Dakes ti panagawat ko iti aramid ti gobernadorsilio! — kunkuna ni don Filipo, ti pangulo ti partido liberal, kadagiti gagayyemna; — adda nalpasda a kayat nga aramidenen iti daytay inda panangyud-udi iti pannakausig ti pagbusbusan. Kitaenyo ket apaman la ta adda pay sangapulo ket maysa nga aldaw.
