gundawayna kadagiti tattao, isuda nga mangidaydayaw kenkuana.
Saan ko a rebbeng a baybay-an a di ibaga nga iti daydiay
nabaknang a balay pinainum dakam iti champain ken nakaim-imas
a liklikor a kasta unay nagado, ta iso ngad ti pakaidumdumaan toy
nalatak a baknang ti ayatna nga agsangaili.
"Napankam nagbuya. Am-ammuyon dagiti artista tayo, da Ratia, Carvajal ken Fernandez; dakam laeng ti nakaawat iti kinalaingda, ta dagiti kadduan awan uray bassit a inda naawatan. Da Chananay ken Balbino, naimbagda, nupay adda bassit paraw da: ti naudi nakaibbet iti maysa a kiak, ngem ti nakapupukanna, nakaskasdaaw, kasta met ti ayat ti nakenna. Dagiti indio, nangruna ti gobernadorsilio, naayatanda unay ti komedia a tagalog; ti naudi uray na la pinagrisrisiris dagiti im-imana ket kunkunana kadakami a nakail-ilala ta saan da a pinakigubat ti princesa iti jigante a nagitalaw kenkuana, iso nga adadda a nakaskasdaaw kan man kuman iti panagkunana, ket nangruna man la ngaruden no ti jigante saan a kapten ti sugat ti bagina, malaksid ti pusegna, a kas ken Ferragus a saritaen ti Biag dagiti "Dose Pares." Ni M. R. P. Fr. Dámaso, iti daytay imbag ti puso a mañgipalpalasin kenkuana, kasta met ti kunana, sana inayon a iti kasta, ti princesa kano makaammunto a mangsapol iti puseg ti jigante ken mangudor kenkuana iti ipatayna.
"Saan a masapol a sawek a iti bayat ti panagbuya, awan nagkurang a pinagayat ti Rothschild a pilipino: sorbete, limonada, pagpalamiis, sinamit, arak, kdmpy., ti kasta unay a naipaay kadakami nga adda sadiay. Dinillawmi unay nga agpayso ti kaawan ti nalatak ken naimbag ti sursurona a bumaro, ni don Juan Crisóstomo Ibarra, a kas ammuyon, isunto ti mangidaulo no bigat iti pannakabendision ti umuna a bato ti naindaklan a pakalaglagipan a inna
ipatakder a siáayat unay. Toy maikari a kapututan dagiti Pelayo ken Elcano (ta, kas naammuak, maysa kadagiti appona a lakay iti ama naggapo kadagiti maingel ken natakneng a probinsia tayo iti Amianan, nalabit maysa kadagiti kinadua ni Magalianes wenno ni Legaspi), kaskasdi met a saan a nagpakita iti amin ti nagmalem gapo iti sangkabassit a sagubanitna. Ti naganna paggiinnallawatan dagiti bibbibig ket isuna la nga inda baliksen a ipadpadayaw, iso a maipapilit a pakaidayawan met ti Espania ken dagiti pudpudno a kakastila a kas kadatayo nga uray kaano saan tay a paglikudan ti dara, nupay kasano nga inna pannakailalaok.
