sabali a nakaadal iti biag ken milmilagro ni San Diego, — ti kura,
pudno nga ammuna, ngem iso met ti agmisa,— amin dagiti dadduma a papadi nasarakanda a ti timek ni Padre Dámaso awan
mañgatiw iti kinasayaat ket nakail-ilala unay a saan a maibitla ti
ingget nagsayaat a sermon kas ti nalpasna a naisurat ken naadal.
Gapona a daydi daan a despensera insaganaanna iti limonada,
sinapsapuanna ti barukong ken tengngedna iti ungguwento ken
lana, binungunna iti lupot a napudot inilutna, kdmpy., kdmpy.
Ni Padre Dámaso imminom iti iplog a di naluto a nailaok iti arak,
ket iti bayat daydi a bigat, saan a nagsao ket saan met a nangan;
isuna la nga imminom iti sanga baso a gatas, sangatagyan a sokolate ken nangan iti sangapulo ket dua a biskocho, ket simamaingel a di nangsagid iti manok a pinirito ken kagudua ti maysa
a keso nga aramid sadi Laguna a kanayon a pamigatna, ta, kas
kuna ti despenseria, ti manok ken ti keso adda asin ken tabada ket
mabalin a paguyekenda.
—¡Amin dagita, tapno la no intay magun-od ti langit ket innatay mapagbabawi!—kunkuna a sisasainnek dagiti Ermanas ti V. O. T. idi naammuanda dagitoy a rigrigatna.
—!Dusaen ni Apo Birjen de la Paz! — indayamudom met dagiti Ermanas ti Santísimo Rosario, a dida mapakawan ti yaabay ni Padre Damaso kadagiti kabusorda.
Iti uras a maikawallo ket gudua rimuar ti libot iti linong ti palapala. Kas met la ti daydi libot idi kalman, ngem adda baro a nainayon: dagiti Ermanos ti V. O. T. Lallakay, babbaket ken sumagmamano a babbai a bumabbaketen siaaruatda iti atiddag nga abito, a ginggon; dagiti marigrigat, lupot a nagubsang, dagiti nabaknang, seda, wenno ti naganenda iti ginggon pransiskano, gapo ta iso ti adadda nga ar-aruaten dagiti Reberendos Prailes a Pransiskano. Amin dagidi sagrado nga ab-abito, napaypaysuda, aggapuda iti konbento sadi Manila, iso a mapan panglimusan dagiti tattao, a sukatanda iti pirak prix fixe (saan a matawaran), no mabalin a tuladen ti pagsasaoda iti maysa a paglakuan. Ti pateg a naitudingen mabalin a manayunan, ngem saan a mabalin a maksayan. Kas kadagitoy nga ab-abito, addada pay sabsabali a lako da idiay met la a konbento ken idiay Monasterio ni Santa Clara, ababito nga addaan saan la nga iti naisagsaguday a grasia a mangted iti ado nga induljencia kadagiti natnatay a maaruatan kadakuada,
no di pay ket ti adadda manen a naisagudayan a grasia ti nalabes
