a kinanginada, adadda a nalablabes, no adadda ti kinadaanda,
ad-ado, dagiti pigpigisda ket nganngani saanda a mabalin a yusungen. Isuratmi daytoy ania ta adda nasingpet nga agbasa a makasapol kadagita sagrada a relrelikia, wenno adda maysa a nasikap
nga agririgis sadi Europa a kayatna ti bumaknang, ta mangipan
sadi Pilipinas iti sangasasakayan nga abito a napunno kadagiti
sarsarait ket nakamurmureng, ta sadiay madanunda ti pateg ti sangapulo ket innem a pisos wenno nasurok pay, kas ti adadda
wenno nakurkurang a kinarigisda.
Ni San Diego de Alcalá nailugan iti maysa a karro a nakalupkupan iti napitpit a pirak. Ti Santo, nakuttong, nadeggang ket nangayed ti rupana a marpil, numan pay napuskol ti naipalawlaw iti ulona a buok a kulot, kasla buok ti pugot. Ti aruatna, raso a naburdaan iti balitok.
Ni pagdaydayawan nga Ama tayo a San Francisco iso ti simmaruno, sa ni Apo Birjen, a kas met la idi kalman, isuna la a ti padi nga adda iti salinong ti palio ita, iso ni Padre Salvi ket saan a ni nataer a Padre Sibyla a naipadpaduma unay dagiti gunggunayna. Ngem no ni Padre Salvi agkurang iti kinataer ti takder, napalalo ket di ti kinasingpet ti gunayna; nagakob dagiti imimana nakaal-alumamay laeng, dagiti matmatana sikikitada iti baba ket kasla agkubbo bassit a magna. Dagiti nagiggem iti palio isuda met la dagiti kabesas nga aglinglinget iti rag-o, a ta abos man pay ta kas da sakristan, agsingsingirda pay iti buis, isuda ti mannubbot kadagiti tattao a bayanggudaw ken napanglaw, ket iti kasta, maysa da met a Krísto a mangted iti dara da gapo kadagiti basbasol dagiti sabsabali. Ti koadjutor, a nakasobrepelyis, agalla-allatiw kadagiti karkarro a siiggem iti insensario, a pasaray inna paasukan ti agong ti kura, nga iso met tay yadadda toy ti inna panangpatalna ken panangpadeggang iti takderna.
Kasta ti pannagna ti libot a nabannayat ken nainayad a mapakuyugar. kadagiti palpaltog, kankanta ken tugtugtug a sinisimbaan dagiti musiko nga adda iti likudan ti tunggal karro. Ti met Ermano Mayor kasta unay a gagarna nga agibunong iti kandela, ta ado dagiti nakilibot a nakayawid kadagiti balbalayda iti kandela a umanay a pagsilawda iti uppat a rabii, no inda agsusugal. Dagiti agbuybuya, agparintumengda a sisisingpet no lumabas ti karro ti Ina ti Dios ket aglualuda a si-isnek iti Mamatiak
ken Salbe-Ari.
