Ti espiritu santo a praile, iti daydi a paset ti sermon a saan a
naisurat, napukawna ti ibarbasana ket nakabaktaw iti tallo a
gunggunglo nga atitiddag idi pasurutanna ni Padre Dámaso, iso a
bumangesbanges nga agin-inana.
—"¿Siasinno kadakayo, managbasol nga agdengdengngeg kaniak, ti makaitured a mangdilpat kadagiti sugsugat ti maysa a nakakaasi ken rutayrutayen nga agpalpalama? ¿Asino? ¡Sumung. bat ket ingatuna man ti imana! ¡Awan! Ammukon nga awan: isuna laeng ti maysa a santo, a kas ken ni Diego de Alcalá, ti makabalin a mangaramid iti kasta; iso inna dinilpatan amin ti rugit ti sakit ket kinunana iti maysa a nasdaawan a kabsat: "Kastoy ti panangagas iti daytoy a sakit!" ¡O, ayat a nakristianuan! O, asi nga awan pumada! !O, naiparungbuan a kinasingpet! !O, pagwadan a di matulad! O, galad nga awanan tulaw!
Ket intuluyna ti kasta unay nagatiddag a panangaw-awag, a pasarayna ideppa dagiti taktakiagna, pasarayna ingato ken ibaba a kas la kayatna ti tumayab, wenno kas la agbugaw kadagiti tumaytayab.
"Kasangwanan ti ipapatayna, nagsao iti sao ti latín, a dina ket ammo ti latín! ¡Agsiddaawkayo, managbasol! ¡Dakayo, nupay inkay ad-adalen, ket indakay babauten gapo iti latín, saan kayto a makapagsao iti latín, mataykayto a di makapagsao! ¡Ti panagsao iti latín, maysa a grasia ti Dios, iso ti gapona a ti Simbaan agsao ti latín! ¡Siak! agsaoak met ti latín! Apay? ¿Ti Dios mabalinna nga ipawil toy a liwliwa ken ay-ayatenna a Diego? ¿Nabalinna kuma ti natay, nabalinna kuma a binaybay-an a natay a di nakapagsao iti latín? ¡Saan a mabalin! ¡Ti Dios saan kuma a nalinteg, saan kuma a Dios! ¡Nagsao, ngad, iti latín, ket ti kasta paneknekan dagiti nagsursurat iti pagbasaan kadagidi nga alaldaw!" Ket inleppasna ti umuna a paset ti sermonna itoy sumaruno a gunglo nga iso ti nagrigatanna unay a insurat ket inna inadaw iti maysa a naindaklan a sumusurat, ni apo Sinibaldo de Mas.
"¡Kablaawanka, ngarod, naslag a Diego, dayaw ti Gimongmi! ¡Sika ti pagtuladan iti kinasingpet, naalumamay nga addaan dayaw; napakumbaba nga addaan takneng; natudio nga addaan tured; nateppel nga addaan agom; kabusor nga addaan nadalos a
puso; naasi nga addaan pammakawan; padi a managtungpal; pasurot a napnuan pasnek; nalaka a mamati nga addaan tarnaw;
