a bigat, no daytay mapan makimisa dagiti nakautang kaniak!
¡Kitaenyo, kitaenyo langen ni Padre Dámaso no kasano ti panaglukmegna iti bin-ig a panagung-unget ken panagkabkabil!
Agpayso ta idi, sumungad ni Padre Damaso, a ti pagnana kas ti kadawyan dagiti nalukmeg, kasla makais-isem ngem dakes unay a isem, ta ni Ibarra apaman a inna nakita, dinan nasurutan ti saona.
Ni Padre Dámaso kinablaawanda a siraragsak, isuda amin, nupay nasdaawanda: ni laeng Ibarra ti saan a kimmablaaw. Ngannganida malpas idi a manganen, ket ti champain agsibsibon kadagiti tagtagayan.
Ti isem ni Padre Dámaso nagbalin a pungtot idi nakitana ni María Clara a nakatugaw iti makanawan, ni Crisóstomo; ngem timmugaw iti abay ti Alkalde, ket sinaludsudna iti let-ang ti maysa nga ulimek a nabagas:
—Adda masarsarita, appo?—¡ituluyyo!
—Agbibrindiskam man itay—insungbat ti Alkalde,-Ni apo Ibarra ibagbagana itay dagiti amin a timmultulong kenkuana itoy naayat nga aramidna, ket sasawenna, itay dimtengkayo, ti arkitekto...
—Siak a ket diak maawatan ti arkitektura,—kinuna ni Padre Dámaso, ―ngem katawa-ak dagiti arkitekto ken dagiti ang-ang a mapmapan kadakuada. Addayta, siak ti nangyugis iti plano dayta simbaan ket nasayaat ti pannakabangonna: kasta ti kinuna kaniak ti maysa nga ingles nga agtagtagilako iti balitokna nagdagos iti naminsan nga aldaw iti konbento. ¡Umanayen ti kaadda ti dua ramayan a muging, tapno makayugis datao iti plano!
—Nupáy kasta,—insungbat ti Alkalde, idi makitana nga agulimek ni Ibarra, —no balay, a kas toy a Pagadalan, kas pagarigan, ti ipatakder, masapol ti maysa a mannakaammo, maysa a perito...
¡Ania a perito kada perita!-kinuna a silalais ni Padre Dámaso.— Ti makasapol iti perito (mannakaammo), maysa a perrito (uken). ¡Masapol nga agbalin datao a nadulduldog pay ngem dagiti indio nga isuda met laengen ti mangbangon kadagiti balbalayda, ta dida ket ammo a patakderenen ti uppat a diding sa parabawan iti maysa a tapanko, nga iso amin dayta
ti maysa a Pagadalan!
