Isuda amin kimmita da iti yan ni Ibarra, ngem toy, nupay
bimsag, intuluyna ti kas la makisarsarita ken María Clara.
—Ngem panunutenyo, Reberensia, nga . . .
—Kitaenyo, —intuloy daydi pransiskano, a dina ket pinatuloy ti sao ti Alkalde, —kitaenyo no kasano ti namayan ti maysa lego mi, ti kaduldugan, a namatakder iti maysa nga ospital a nasayaat, nataraki ket nalaka. Pagbannugenna idi a nalaing dagiti pagaramidenna ket walwalo la a kuarta ti pangbayadna iti maysa nga aldaw uray kadagidi aggapo kadagiti sabsabali nga il-ili. Daydi, ammuna ti pamayan kadakuada, saan a kas kadagiti ado a suplado kada mestisilio a mangdadael kadakuada ta inda ket ida bayadanen iti saggitlumbagi, wenno sagsasalapi.
—¿Kunayo a walwallo a kuarta ti inna kadakuada panangdan? ¡Saan a mabalin!—kinuna ti Alkalde a pinanggepna nga inturong ti masarsarita iti sabali a banag.
—Wen, apo, ket dayta iso kuma ti rebbeng a tuladen dagiti agkunkuna a naimbag a kakastila. Makitam, nanipod idi nalu katan ti Canal de Suez, ti dakes immay ditoy. !ldi, idi masapol a lawlawen ti Kabo (de Buena Esperanza), awan unay ado a dakes a tattao a makaumay ditoy, ket awan met mapan sadiay a mailasbong iti dakes!
—Ngem, Padre Dámaso...!
—Ammuyon no kasano ti indio: apaman nga adda bassit ammona aginsisiriben. Amin dagiti dida pay ammo a punasen ti angedda a mapan sadi Europa
—¡Ngem, denggenyo, Reberensia! . . . —insengngat ti Alkalde a madanaganen iti katadem dagidi a sasao.
—Isuda amin dagita indanto manungpal, kas kaikarianda,— intuluyna;—ti ima ti Dios makita a maisengngat, masapol ti agbalin a bulsek tapno saan a makita. Ditoy a biag awatenda ti dusa da dagiti nagannak kadagiti kakasta nga ul-uleg... matayda iti pagbaludan je! je!, kas kuma no kunatayo, awan pay a. . .
Ngem dina natuloy ti saona. Ni Ibarra, a limmabbaga ti rupana, inna sinipsiputan; idi nangngegna ti pasagid iti daydi amana, timmakder, limmagto, ket iti apagdarikmat, inna indisso ti nabaneg a imana iti ulo daydi padi, iso a natuang, a napadata, ket
napamulengleng.
