I
SA IBABAW SA KUBYIRTA
Sic itur ad astra[1]
Usá ka buntag niana sa bulan sa Disyembre, ang bapor TABO nag-ilaid pagpanungsong sa liko-likong subá sa Pasig nagdalá ug daghang mga sumasakay padulong sa lalawigan sa Laguna. Ang maong bapor bulalo ug panagway, malingin hapit sama sa kabó diin kuhaa ang iyang ngalan, mahugaw bisan maputiputi, katahaan ug maugdang nga sud-ongon tungud sa pagka-hinay niya nga molakaw. Bisan pa niining iyang mga apan, kadtong bapora gihigugma niadtong mga dapita, kahá tungud sa iyang ngalan nga tinagalóg kun tungod ba kay nagdalá man siyá sa kinaiyang kaugalingon sa mga butang sa Pilipinas, maagid-agid sa usá ka pagdaug batok sa kauswagan, usá ka bapor nga dili gayud kaayo hingpit nga bapor, usa ka butang nga walay pagka-balhin, daghan siyá ug kulang apan dili usab kaduhaduhaan nga bapor gayud siyá, bapor nga bisan tuod miawat ug diyutay sa Kauswagan, igo lamang siya nga gihid-hiran ug diyutay nga pintal nga manipis.
Ug kadtong bapora intawon lubus gayud nga Pilipinhon! Kon nuntan tag diyutayng maayong kabubut-on, hangtud matawag ngani nga sakayán sa Kapunoanan, binuhat ubús sa pagbuút ug pagbantay sa mga tawong Talahuron ug Hamili uyamut (mga prayle)!
Dinan-agan sa Adlaw sa kabuntagon nga nakapakuya sa mga balod sa subá ug nakapaawit sa hangin taliwala sa mga malubayng bulos sa mga kawayan nga nanurók sa masigka-tampi sa subá, makita ang maputing bapor nga nagabugwak sa iyang panghaw ug maitum nga asó: ang sakayán sa Kapunoanan, matud
- ↑ Ingnon niana pagpaagi aron kiti mousbaw ngadto sa kahitas-on, — P. sa Taghubad.
— 1 —
