266
— Yati, pastilan usab kalisud nga hinumduman nag lana. Aron pagpasidungog kang Don Custodio, ako siyang bunyagan nga “oprecto de sopa."
Ang bag-ong ngalan giuyonan.
— Mga ginoo, misulti si Makaraig, nga mao ang naghikay sa mga sud-an; duna pa kitay tulo ka sud-an... Lumpia nga ininsik nga sinaktan sa unod sa baboy...
— Ipahinungod ta kang pari Irene....
— Dili. Si Pari Irene dili mokaon sa baboy kon dili kuhaan una sa ilong, mipahimangno ang usa ka batan-ong ilonggo sa iyang katupad.
— Puwes, kuhaon ang ilong...
— Puyra ang ilong ni Pari Irene, misinggit ang tanan...
— Pagtahud, mga ginoo, pagtahud, misulti si Pekson, nga nagpakatarongtarong...
— Ang ikatulo ka sud-an mao ang torta sa lambay kun alimango...
— Nga ipahinangod ta sa mga prayli, misagbat ang bisaya...
— Tungod kay sila kusog nga molinambay .... midugang si Tadiyo.
— Igo gayud, ug kutob karon nganlan tag torta sa mga prayle ... Ang tanan misabat: torta sa mga prayli...
Mosupak ako niana, sa ngalan sa usa, misulti si Isagani...
— Ug ako usab, sa ngalan sa mga alimango, misagbat si Tadiyo.
— Pagtahud, mga ginoo, pagtahud, mibalik pagsinggit si Pecson nga napuno ang baba.
— Ang ikaupat mao ang pansit nga ginisal nga ipahinungod to sa ... kagamhanan ug sa nasud ...
Ang tanan milingi kang Makaraig.
— Hangtud sa dili pa dugay karon, mga ginoo, mipadayon siya, ang pansit gipakaingon nato nga ininsik kun hinapon, apan ang nakaingon kay wala man siya hiilhi bisan sa Tsina bisan sa Hapon, ug maingon ta nga Pilipinhon, apan ang nagluto ug naggisal kaniya ang mga insik; sama sa nahitabo sa kagamhanan ug sa Pilipinas: mao rag mga insik.
