- 267
apan kon insik kun dili, ang mga doktor da sa atong Inahan nga simbahan mao ray makatug-an... Ang tanan mokaon kaniya ug lamian, apan magdilidili ug mao rag lud-on; mao usab ang mahitabo sa atong nasud, sa atong Kagamhanan. Ang tanan nabuhi kaniya, ang tanan nagpahimulos sa iyang mga pangilin, ug unya moingon dayon nga walay nasud nga dautan sama sa Pilipinas, walay Kagamhanan nga gubot sama sa ato... Tungod niini, atong ipahinongod ang pansit sa nasud ug sa Kagamhanan...
— Nga ipahinungod ta, misinggit ang tanan.
— Supak ako niana, misulti si Isagani.
— Tahuron ta ang mga gagmay, tahuron ta ang mga dinaugdaug... misinggit si Pecson sa iyang tingog nga pagaw ug pinatindog sa taas ang bukog sa manok.
— Atong ipahinungod ang pansit kang insik Kiroga, usa sa upat ka Gahum sa ka’ibutang pilipinhon, misugyot si Isagani.
— Dili, ipahinungod ta hinoon sa Kardenal nga agta...
— Hilum kamo, misulti ang usa sa usa ka paningog nga mao rag hikulbaan... Sa plasa anaay mga panon nga naminaw kanato ug ang mga paril makadungog...
Tuod man, mga panon sa mga kuryoso nagpundok sa atubangan sa mga bintana, samtang ang kasaba ug ang mga katawa sa mga tindahan nga silingan nahilum sa kalit, sama sa namati silang tanan sa mga hitabo sa panihapon sa mga batan-on. Kadtong kahiluma kahibudngan uyamut.
— Tadiyo, ipamulong na ang imong pakigpulong, gisikdol kini ni makaraig.
Gikasabutan nga si Sandobal, tungod kay mao may maayong mamumulong, maoy motapus sa mga pakigpulong.
Si Tadiyo, nga taspukan sama sa gihapon, walay inandam nga pakigpulong, ug nahimutang sa usa ka malisud nga kahimtang. Samtang nagsuyop sa usa ka taas nga tanghun, naghunahuna kon unsaon niya paggula niadtong kalisura, hangtud nga nahinumdum siya sa usa ka pakigpulong nga nasag-ulo niya sa klasi, ug nakahunahuna siya nga iyang sundon ug awaton.
