- Vox populi vox Dei
Gibiyaan ta si Isagani nga nagdasig sa iyang mga higala. Sa taliwala sa iyang pakigsulting madasigon, gidool siya sa usa ka kapista aron pagsulti kaniya nga si Pari Fernandez, usa sa mga magtutoon sa taas nga basahon, buot makigsulti.
— Si Isagani giabut ug kabalaka. Si Pari Fernandez maoy usa ka tawo nga talahuron kaayo: ang tawo nga dili gayud niya ipalakip, kon duna may mosultig dautan batok sa mga prayli.
— Ug unsa may tuyo kanako ni Pari Fernandez, nangotana siya.
Ang kapista igo . lamang nga mipakibo sa iyang abaga. Apan si Isagani minunot kaniya nga wala layhi.
Si Pari Fernandez, kadtong prayli nga nakita ta sa Los Banos, naghulat sa iyang lawak nga maugdang ug masolob-on, nagkisdum ang iyang agtang, sama sa nagpalandong. Mitindog siya sa pagsulod ni Isagani, gihimamat kini niya, gilamano ug dayon gisirhan ang pultahan. Unya nagsuroysuroy pagbalikbalik sa lawak. Si Isagani, nga nagtindog, naghulat nga sultihan siya:
— Ginoo Isagani, namulong sa tingog nga daw nagkurog. Sukad sa bintana hidunggan ko ikaw nga nagdasig sa imong mga higala, kay ako, tungod kay sugpaon, mag-igmat kaayo ang akong mga dalunggan, ug maoy hinungdan nga gipatawag ko ikaw aron ako makigsulti kanimo. Kanunay gayud akong mahigugma sa mga batan-on nga maayong mosulti ug mosulti sa walay lipodlipod sa ilang mga hunahuna, bisan kining mga hunahunaa supak sa ako. Kamo, sumala sa akong hidunggan, may panihapon kagabii, ayaw paglimod ...
— Ako dili molimod!, misagbat si Isagani.
