325
Ug ingon sa nakasabot, nanlimbawot ang iyang balhibo.
— Oo, nitro glicerina! — misubli paghinay si Simoun nga mipahiyom ug bugnaw, ug nagsud-ong nga mahinamon sa botelya; — labaw pa sa nitro-glicerina! Maoy mga luha nga init, mga pagdumot nga pinuga ug mga paglupig ug pagdaugdaog! Mao ang labawng katarungan sa mahuyang, kusog batok kusog, paglugos batok paglugos... Dili pa dugay nagpanuko ako, apan ikaw karon mianhi ug ikaw kanako ang nakapalukmay! Karong gabii manlupad nga madugmok ang mga mamimiot mga labing makadaot, ang mga mamimiot nga way alamag, kanang nanagtago sa luyo ni Bathala ug sa Ka gamhanan, ug kanang ilang mga pagpatuyang wala kasiluti tungod kay kanila walay makahimo pag-usisa! Karong gabii makabati ang Pilipinas sa binuto, nga makapulpog sa baol nga bungdo nga ang iyang kadugta akong gihinanali!
Si Basilio ingon sa nabuang; ang iyang mga ngabil nanglihok nga walay migula nga tingog, gibati niya nga mikubol ang iyang dila, nga namad-an.ang iyang tutonlan. Mao pa kadtoy iyang pagpakakita sa makagagahom tubig, nga sa makadaghan na niya hibati-i, ingon sa sinala sa kangitngitan sa mga tawong subo nga nakiggubat sa dayag batok sa katilingban. Karon anaa na sa iyang atubangan, masihag ug madalag ug diyutay, gibubo niya sa labihang pagbantay sa sulod niadtong matahom nga granada. Si Simoun nagpakita kaniya ingon sa alamagon sa Mil y una Noches nga motunga sa ibabaw sa dagat; adunay gidak-on nga kabugan, nasungko sa langit ang iyang ulo, nabungkag ang balay ug natay-og ang tibuok siyudad sa usa lamang ka pagkibo sa iyang bukobuko. Ang granada adunay panagway sa usa ka daku nga malingin, ug ang iyang liki, ingon sa usa ka katawang ispidnohanon diin manggula ang mga baga ug siga. Mao pa kadtoy hitabo si Basilio nadala sa kahadlok ug nawad-an siya sa hingpit sa kabugnaw sa iyang dugo. Bisan pa niana, si Simoun, nagahugot sa tornilyo sa usa ka makapahibulong ug malisod nga kasangkapan, gibutang ang usa ka tubo nga bildo, unya ang bom ba, ug ang tanan iyang gilukongan sa usa ka matahom nga pantalya. Unya mipalayo ug diyutay aron pagsid-ing kon igo' na ba, ug iyang gisulingsuling sa masigkakilid aron gayod paghukom ug sa maayo sa iyang dagway ug katahum.
