ang kahimtang natong tanan ug dagway dili kaayo pagsultihan ...
— Ug ingna usab siya — midason si Isagani nga wala lamang magatagad sa mga siko sa iyang higala — nga ang tubig matam-is kaayo ug mosugot lamang nga imnon siya, apan molumos sa alak ug sa serbesa ug mopalong sa kalayo; nga kon initon siya mahimong alisngaw, kon mobukal mahimong halapad nga lawod ug nga makausa niana gilumsan niya ang katawhan ug gipakurog niya ang tibuok nga kalibutan!
Si Simoun miyahat, ug bisan wala maila ang iyang tinan-awan kay gisalipdan man sa iyang antiyohos, sa iyang nawong masabut nga nahingangha siya.
— Maanindot nga tubaga kana! — miingon siya; — apan natahap ako nga si P. Camorra nagatiaw-tiaw lamang ug mangutana unya kanako kon kanus-a ang tubig mahimong alisngaw ug kanus-a mahimong halapad nga lawod. Kana da bang paria makuli nga motuo ug tigbiay-biay kaayo.
— Mahimong alisngaw ang tubig kon initon sa kalayo, mahimo siyang lawod kon ang tubig sa kasapaan nga karon nagkatibulaag pa managtipon na unya, tinukmod sa dautan nga palad, diha nianang bung-aw nga ginakalot karon sa katawhan — mitubag si Isagani.
— Dili, ginoo Simoun — misumpay si Basilio sa paningog nga matiawon. — Asoyi lamang hinoon si P. Camorra niining mga balak nga sinulat da usab ni higala Isagani:
- Agua somos, decis, vosotros fuego;
- Como lo querais, jsea!
- ¡Vivamos cn sosiego
- Y el incendio jamas luchar nos veal
- Sino que unidos por la ciencia sabia
- De las calderas en el seno ardiente,
- Sin coleras, sin rabia,
- Formemos el vapor, quinto elemento,
- Progreso, vida, luz y movimiento.
— Mga damgo, mga damgo nga walay kahimoan! — mitubag si Simoun; — ang makina wala pa ngani hingkaplagi . . . ug samtang pangitaon pa siya moinom lamang una ako ug serbesa.
