Ug mibiya sa iyang mga higala wala lamang ngani manamilit.
— Apan naunsa ba ikaw karon nga mahagiton man kaayo?
— nangutana si Basilio.
— Wala man, ambut lamang, apan malisang ako, mahadlok ako nianang tawhana.
— Gisiko ko ngani ikaw; wala ka ba masayud nga kana siya ginatawag ug “el Cardenal Moreno”?
— “Cardinal Moreno”?
— Kun “Eminencia Negra” ba, sumala lamang sa hing-uyonan mo. — Wala ako makasabut sa imong sulti!
— Si kardenal Richelieu kanhi adunay magtatambag nga paring “capuchino” nga gihinganlan ug “Eminencia Gris;” kana si Simoun usab mao karon ang magtatambag sa Heneral . . .
— Tinuod?
— Tinuod mo lamang? Hidunggan ko gayud kana sa baba sa usa ka tawo . . . nga kanunayng molibak kaniya sa likod, ug unya moulog-ulog kon anaa sa iyang atubangan.
— Moduaw ba usab kana siya kang Kapitan Tiago?
— Oo, sukad pa gayud sa unang adlaw sa paghiabut niya dinhi, ug sa pagkatinuod giisip siya sa usa ka tawo nga kailog niya . . . sa kabilin ni Kapitan Tiago . . . Ug nagatuo ako nga makigkita siya karon sa Heneral aron pagkigsulti kaniya bahin sa pagtudlo sa kinatsila.
Niadtong higayona usa ka binatonan nahitungha aron pagpahibalo kang Isagani nga gitawag siya sa iyang uyoan.
Sa usa sa mga bangko sa ulin ug tipon sa ubang mga sumasakay, nagalingkod ang usa ka pari nga “clerigo” nga nagasudong sa mga kaumahan ug kayutaan nga nanglabay sa iyang mga mata. Ang iyang mga katupad dili modip-ig kaniya; kon ang mga lalaki moagi sa iyang duol, motukas sa ilang kalo, ug ang mga sugarol dili mangahas pagbutang sa talad nga sugalan duol sa dapit nga iyang lingkoran. Kadtong paria talagsa dang mosulti, dili motabako ni mopatikig sa liog, makigtipon-tipon siya sa ubang mga tawo ug mobalus sa dakung kahinangop sa mga yukbo nga iyang madawat, daw isipon kini niya nga pagpasidungog ug pag-ila kaniya. Tigulang na siya, ang iyang ulo hapit na maputos sa mga uban, apan malig-on gihapon ug lawas, ug bisan
