tong babayhana, iya untang gibutang sa usa ka “beaterio,” sa
Santa Clara pananglitan?
Si P. Sibyla nahitingala niini ug mitan-aw kang P. Salvi nga nagapangurog ug mipasigpat kang Simoun.
— Kay dili kabtang sa usa ka tawo nga may pamatasan — — mipadayon si Simoun nga malinawon ug buot — ang pagpapuyo sa usa ka langob sa babaye nga atong gilimbungan; supak sa mga sugo sa tinuhoan ang paghiklin niadtong babayhana sa usa ka langob, sa tampi sa usa ka suba diin pagatintalon ug magaungaw siya sa daghang mga kahilayan; maagid-agid kana sa buhat sa mga ingkantohanon. Labing maayo unta kadto, labing mahauyon sa mga sugo nga kristohanon, labing makapahinuklog ug labing mah.angay sa mga pamatasan dinhi, ang pagbutang sa iyang hinigugma sulod sa Santa Clara, sama sa usa ka bagong Heloisa, aron usahay pagduawon ug pagalig-onon niya ang iyang kalag. Unsay pulong mo niini?
— Ako dili makahimo ni angayan nga mohukom sa pagabuhaton sa mga arsobispo, — mitubag nga wala layhi ang pransiskano.
— Apan ikaw nga mao ang “gobernador eclesiastico,” ang nahailis sa atong arsobispo, unsay imong buhaton kon kana mahitabo kanimo?
Si pari Salvi igo lamang mipalihok sa iyang mga abaga, ug misulti sa dakung kalinaw sa buot:
— Walay hinungdan ang paghunahuna sa butang dili mahitabo . . . Apan kay nagahisgot man gayud kita ug mga “leyenda,” ayaw ninyo hikalimti ang “leyenda” nga labing maanindot, kay mao may labing matuod, ang sa “milagro” ni S. Nicolas, kausang simbahan nga naguba na dagway inyong nakita. Kanhi daw ang suba, ug ingon man usab ang lanaw, ginapunsisokan sa mga buaya nga labihan ka dagku ug ka gutom nila kay mohasmag sa mga bangka ug lolundon nila kini sa usa ka paglabtik sa ilang ikog. Ginasugid sa among “cronica” nga usa ka adlaw niana, usa ka insik nga walay bunyag nga hangtud niadtong higayona wala gayud pasakop sa atong tinuhoan, nahiagi sa atbang sa simbahan, ug dinhi, sa kalit lamang mitungha kaniya ang yawa nga nagpakahimong buaya, ug gilunod ang iyang bangka aron pagtukob ug pagdala kaniya ngadto sa sulad. Linamdagan ni Bathala, ang insik misangpit gilayon kang S. Nicolas
