66
hi nga bahandianon na uyamut ug higala sa mga punoan? Niadtong kaagiha adunay butang nga tulokibon ug ang tinon-an, dala ang iyang kinaiyang kalinaw sa buot, misaad nga kadtong tanan iya gayud nga tinoon, ug nagahulat ug usa ka maayong higayon.
Samtang ang tinon-an nagapalandong niining tanan, si Simoun nagapadayon pagkalot, apan nakita ni Basilio nga ang karaang kabaskog sa lawas sa magbabaligyag alahas mikunhod na; si Simoun gikutasan, nagahagal ug sa taud-taud lamang mapilit siya kanunay sa pagpahulay.
Sa kahadlok ni Basilio nga hisusihan siya, sa kalit lamang nakahunahuna siya pagbuhat ug usa ka butang, mitindog sa iyang gilingkoran ug sa tingog nga mabugnawon uyamut:
— Makahimo ba ako pagtabang kanimo, ginoo . . . ? — nangutana siya nga migula sa dapit nga iyang gitagoan.
Si Simoun mituyhakaw ug milukso sama sa usa ka tigre nga awayon pagkalit, mikuot sa bulsa sa iyang amerikana ug, maluspad ug makahahadlok, mitan-aw sa tinon-an.
— Napulog-tulo na ka tuig karon nga dinhi niining dapita, ginoo, — mipadayon pagsulti si Basilio nga wala maluba — imo akong gitabangan paglubong sa lawas nga patay sa akong inahan, ug mabulahan unta ako kaayo kon ning bigayona karon makaalagad kanimo.
Si Simoun, nga mitutok gayud pagtan-aw sa batan-on mi kuot sa iyang bulsa ug usa ka rebolber. Nabati ang usa ka hinagtik nga sama sa madungog inigbingat sa usa ka hinagiban nga pabuthon.
— Kinsa man ako sa imong paghunahuna? — miingon siya nga misibog ug duha ka lakang.
— Alang kanako ikaw mao ang usa ka tawo nga minahal uyamut — mitubag si Basilio nga gikulbaan ug diyutay, nagdahum nga niadtong higayona matapus na ang iyang kinabuhi; — Alang kanako ikaw mao kadtong tawo nga, gawas kanako, gituhoan sa tanan nga patay na ug nga ang mga kadaut nga mingdangat kaniya gikasub-an ko sa kanunay.
Kahilum nga makahahadlok maoy mibanus ning mga pulonga, kahilum nga alang sa batan-on maagid-agid sa kahilum nga mabati sa usa ka kinabuhi nga dayon. Bisan pa niini, si
