ꦏꦧꦂꦮꦂꦤꦶꦮꦂꦤꦶ
꧋ꦥꦼꦛꦶꦏꦤ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦱꦤꦺꦱ꧀ꦥ
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦱꦥꦸꦤꦶꦏꦲꦶꦁꦩꦸꦭꦔꦤ꧀ꦕꦭꦺꦴꦤ꧀ꦥꦿꦶꦪꦤ꧀ꦠꦸꦤ꧀ꦲꦶꦁꦨꦤ꧀ꦝꦸꦁꦲꦸꦒꦶꦩꦮꦶꦏꦮꦸꦭꦁꦧꦱꦗꦮꦶ꧈ꦱꦩꦶꦁꦒꦸꦏꦮꦸꦭꦁꦱꦗꦩ꧀꧉
꧋ꦮꦺꦴꦤ꧀ꦠꦼꦤꦤꦶꦁꦲꦢꦼꦒꦶꦥꦸꦤ꧀ꦱ꧀ꦭꦤ꧀ꦏꦱ꧀ꦲꦶꦁꦦꦸꦂꦮꦏꦼꦂꦠ꧈ꦏ꧀ꦭꦱ꧀ꦠꦸ 3 ꦩꦿꦥ꧀ꦥꦩ꧀ꦧꦪꦫꦤ꧀ꦠꦸꦮꦶꦤ꧀ꦲꦔ꧀ꦭꦶꦤ꧀ꦠꦺꦴꦏꦏꦼꦤ꧀ꦩꦤ꧀ꦝꦠ꧀ꦲꦄꦥ꧀ꦝꦺꦭꦶꦁꦦꦸꦂꦮꦏꦼꦂꦠꦭꦤ꧀ꦦꦸꦂꦧꦭꦶꦁꦒ꧈ꦧꦝꦼꦏꦠꦶꦤ꧀ꦢꦏꦏꦼꦤ꧀ꦲꦶꦁꦦꦸꦂꦮꦏꦼꦂꦠ꧈ꦢꦺꦤꦺꦲꦶꦁꦏꦁꦱꦏꦶꦁꦨꦚ꧀ꦗꦂꦤꦒꦫꦝꦠꦼꦁꦏꦱ꧀ꦨꦚꦸꦩꦱ꧀꧉
꧋ꦲꦶꦁꦧꦧ꧀ꦧꦝꦼꦏꦫꦩ꧀ꦥꦸꦔꦤꦶꦁꦉꦩ꧀ꦧꦒ꧀꧈ꦩꦛꦸꦏ꧀ꦲꦸꦠꦮꦶꦧꦺꦴꦠꦼꦤꦶꦥꦸꦤ꧀ꦠꦥ꧀ꦱꦶꦂꦑꦸꦫꦤ꧀ꦢꦩꦼꦭꦤꦶꦥꦸꦤ꧀ꦩꦲꦺꦴꦭ꧀ꦥꦶꦩꦸꦲꦩ꧀ꦩꦢ꧀ꦄꦭꦶ꧈ꦥꦽꦱꦶꦝꦺꦤ꧀ꦄꦃꦩꦢꦶꦪꦃꦲꦶꦁꦆꦤ꧀ꦝꦸꦱ꧀ꦠꦤ꧀꧈ꦲꦶꦁꦏꦁꦢꦶꦥꦸꦤ꧀ꦩꦭꦪꦺꦴꦏꦏꦼꦤ꧀ꦠꦸꦮꦤ꧀꧉ H.O.S. ꦕ ꦏꦿꦲꦩꦶꦤꦠ꧈ꦧꦼꦚ꧀ꦗꦶꦁꦩꦊꦩ꧀ꦱꦼꦠꦸ 27-28 ꦮꦸꦭꦤ꧀ꦥꦸꦤꦶꦏꦧꦝꦼꦢꦶꦥꦸꦤ꧀ꦮꦺꦴꦤ꧀ꦠꦼꦤꦏꦼꦤ꧀ꦝꦼꦧꦠ꧀ꦩꦁꦒꦤꦒꦼꦝꦺꦴꦁꦆꦱ꧀ꦭꦩꦶꦪꦃꦯꦸꦫꦺꦁꦗꦸꦫꦶꦠꦤ꧀꧈ꦦꦏꦸꦮꦭꦩꦤ꧀꧈ꦔꦪꦺꦴꦓꦾ꧉ꦲꦶꦁꦏꦁꦏꦼꦔꦶꦁꦝꦠꦼꦁꦔꦿꦶꦏꦸꦤꦩꦸꦁꦠꦶꦪꦁꦲꦶꦁꦏꦁꦲꦩ꧀ꦧꦼꦏ꧀ꦠꦱꦼꦫꦠ꧀ꦏꦠꦿꦔꦤ꧀ꦏꦢꦺꦴꦱ꧀ꦢꦼꦤꦼꦭꦶꦢ꧀ꦮꦶꦮꦶꦠ꧀ꦱꦥꦸꦤꦶꦏꦠꦶꦪꦁꦱꦩ꧀ꦥꦸꦤ꧀ꦱꦒꦼꦢ꧀ꦠꦸꦩ꧀ꦧꦱ꧀ꦱꦼꦫꦠ꧀ꦮꦲꦸ꧉
꧋ꦏꦮꦂꦠꦺꦴꦱꦏꦼꦤ꧀ꦲꦶꦁꦩꦢꦸꦫꦠꦸꦮꦸꦃꦱꦱꦏꦶꦠ꧀ꦮꦶꦠ꧀ꦗꦼꦫꦸꦏ꧀꧈ꦱꦲꦭꦗꦼꦁꦏꦼꦠꦶꦔꦭ꧀ꦤꦸꦭꦂꦝꦠꦼꦁꦑꦿꦏ꧀ꦱꦲꦤ꧀ꦠꦸꦮꦶꦤ꧀ꦦꦸꦗꦺꦴꦤ꧀꧉ꦱꦱꦏꦶꦠ꧀ꦮꦲꦸꦏꦼꦠꦶꦔꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦏ꧀ꦭꦶꦏꦤꦶꦁꦲꦸꦮꦶꦠ꧀꧉ Dr. Muler ꦲꦶꦁꦏꦁꦠꦶꦤꦁꦒꦼꦤꦃꦚꦶꦂꦤꦏꦏꦼꦤ꧀꧉
꧋ꦥꦏꦼꦩ꧀ꦥꦭꦤ꧀ꦆꦱ꧀ꦭꦩ꧀ꦡꦏ꧀ꦮꦶꦩꦸꦝꦶꦤ꧀ꦲꦶꦁꦔꦪꦺꦴꦓꦾꦏꦂꦠꦔꦸꦚ꧀ꦗꦸꦏꦏꦼꦤ꧀ꦱꦼꦫꦠ꧀ꦝꦠꦼꦁꦝꦶꦫꦺꦏ꧀ꦠꦸꦂꦎꦤ꧀ꦢꦼꦂꦮꦶꦱ꧀꧈ꦲꦱꦸꦫꦲꦺꦴꦱ꧀ꦚꦸꦮꦸꦤ꧀ꦱꦸꦧ꧀ꦱꦶꦝꦶꦏꦁꦒꦼ Standaardschool꧉ ꦩꦁꦒꦺꦤ꧀ꦲꦶꦁꦏꦩ꧀ꦥꦸꦁꦔꦸꦥꦱꦤ꧀꧈ꦔꦪꦺꦴꦓꦾꦏꦂꦠ꧉
꧋ꦩꦶꦠꦸꦫꦸꦠ꧀ꦥꦭꦥꦸꦫꦤ꧀ꦲꦶꦁꦧꦧ꧀ꦧꦼꦤꦧꦮꦃꦄꦥ꧀ꦝꦺꦭꦶꦁꦕꦶꦭꦕꦥ꧀ꦱꦶꦱꦶꦃꦏꦶꦢꦸꦭ꧀ꦏꦶꦭꦺꦤ꧀꧈ꦗꦭꦫꦤ꧀ꦱꦏꦶꦁꦭꦸꦧꦺꦫꦶꦁꦭꦺꦥꦺꦤ꧀ꦕꦶꦠꦤ꧀ꦝꦸꦮꦶꦠꦸꦮꦶꦤ꧀ꦕꦶꦏꦮꦸꦁ꧈ꦏꦭꦮꦸꦭꦤ꧀ꦝꦼꦱꦺꦩ꧀ꦧꦼꦂ 1927꧈ ꦲꦢꦩꦼꦭ꧀ꦏꦥꦶꦠꦸꦤꦤꦶꦥꦸꦤ꧀ꦠꦶꦠꦶꦪꦁꦲꦶꦁꦝꦸꦱꦸꦤ꧀ꦮꦤꦉꦗ꧈ꦩꦢꦸꦫ꧈ꦡꦫꦶꦱꦶ꧈ꦆꦠꦶꦩꦸꦮꦤ꧀꧈ꦩꦭꦧꦂꦠꦸꦮꦶꦤ꧀ꦭꦶꦩ꧀ꦧꦔꦤ꧀꧈ꦏꦥꦶꦠꦸꦤꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ f 10.500꧈ꦱꦏꦶꦁꦫꦶꦱꦏꦶꦁꦠꦤꦼꦩꦤ꧀ꦥꦤ꧀ꦠꦸꦤ꧀꧉
꧋ꦧꦝꦼꦲꦢꦼꦒꦶꦁꦏꦤ꧀ꦠꦺꦴꦂꦥꦺꦴꦱ꧀ꦲꦺꦁꦒꦭ꧀ꦲꦶꦁꦩꦢꦶꦪꦸꦤ꧀ꦏꦧꦺꦴꦫꦺꦴꦔꦏꦼꦤ꧀ꦝꦮꦃꦲꦶꦁꦲꦤꦺꦩꦼꦂꦥꦂꦠꦶꦏꦼꦭꦶꦂꦤꦩꦠꦸꦮꦤ꧀ꦯꦸꦫꦗꦶ꧈ꦉꦒꦶ f 34.400꧉ꦲꦶꦁꦠꦼꦔꦃꦠꦼꦔꦲꦤꦶꦁꦭꦤ꧀ꦥꦸꦤꦶꦏꦢꦶꦥꦸꦤ꧀ꦮꦶꦮꦶꦠꦶ꧈ꦫꦩ꧀ꦥꦸꦔꦶꦥꦸꦤ꧀ꦢꦶꦥꦸꦤ꧀ꦲꦁꦏꦃꦮꦺꦴꦤ꧀ꦠꦼꦤ꧀ꦲꦶꦁꦮꦸꦭꦤ꧀ꦗꦸꦤꦶ 1928꧈ꦥꦥꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦼꦏꦼꦤ꧀ꦱꦼꦥꦸꦂ꧉ꦢꦺꦤꦺꦏꦤ꧀ꦠꦺꦴꦂꦥꦺꦴꦱ꧀ꦭꦩꦶꦧꦝꦼꦏꦁꦒꦼꦏꦤ꧀ꦠꦺꦴꦂꦱ꧀ꦭꦤ꧀ꦏꦱ꧀꧉
꧋ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦮꦂꦠꦺꦴꦱꦏꦼꦤ꧀ꦲꦶꦁꦏꦗꦮꦺꦤ꧀꧈ꦲꦶꦁꦧꦧ꧀ꦲꦩꦏ꧀ꦭꦥꦲꦶꦁꦝꦸꦱꦸꦤ꧀ꦨꦸꦒꦼꦭ꧀꧈ꦑꦸꦭꦺꦴꦤ꧀ꦥꦿꦒ꧈ꦱꦩ꧀ꦥꦸꦤ꧀ꦏꦥꦿꦶꦏ꧀ꦱꦲꦶꦁꦥꦿꦶꦪꦤ꧀ꦠꦸꦤ꧀ꦭꦤ꧀ꦧꦲꦺꦴꦏꦺꦴꦤ꧀ꦱꦸꦭꦺꦤ꧀꧈ꦚꦠꦧꦶꦭꦶꦃꦗꦭꦫꦤꦶꦁꦲꦩꦮꦲꦸꦱꦏꦶꦁꦉꦉꦒꦼꦢ꧀ꦲꦶꦁꦱꦲꦸꦫꦸꦠꦶꦁꦫꦶꦭ꧀ꦥꦧꦿꦶꦏ꧀ꦒꦼꦤ꧀ꦝꦶꦱ꧀ꦯꦺꦮꦸꦓꦭꦸꦂ꧈ꦲꦩꦤꦶꦥꦸꦤ꧀ꦲꦮꦸꦗꦸꦢ꧀ꦮꦔ꧀ꦮꦸꦁꦏꦢꦺꦴꦱ꧀ꦩꦮꦶꦱꦸꦔꦸ꧈ꦲꦸꦊꦱꦶꦥꦸꦤ꧀ꦲꦧꦿꦶꦠ꧀ꦱꦼꦥꦸꦃꦲꦸꦠꦮꦶꦕꦼꦩꦼꦁ꧉ꦠꦶꦠꦶꦪꦁꦲꦶꦁꦔꦿꦶꦏꦸꦏꦝꦮꦸꦲꦤ꧀ꦉꦉꦱꦶꦏ꧀ꦠꦸꦮꦶꦤ꧀ꦤꦼꦒꦺꦴꦂꦮꦶꦠ꧀ꦏꦭꦥꦲꦶꦁꦏꦁꦏꦠꦿꦗꦁꦲꦶꦁꦲꦩ꧉
꧋ꦧꦼꦚ꧀ꦗꦶꦁꦲꦶꦁꦠꦁꦒꦭ꧀ꦏꦥꦶꦁ 1 ꦥꦺꦧꦿꦸꦮꦫꦶꦔꦗꦼꦁꦥꦸꦤꦶꦏ꧈ꦮꦚ꧀ꦕꦶꦗꦩ꧀ꦓꦸ 9 ꦲꦺꦚ꧀ꦗꦶꦁ꧈ꦏꦁꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦤꦥꦼꦂꦤꦸꦂꦗꦼꦤ꧀ꦢꦿꦭ꧀ꦧꦝꦼꦔꦮꦺꦴꦤ꧀ꦠꦼꦤꦏꦼꦤ꧀ꦎꦝꦺꦤ꧀ꦱꦶꦮꦺꦴꦤ꧀ꦠꦼꦤ꧀ꦲꦶꦁꦥꦸꦫꦓꦩ꧀ꦧꦶꦂꦏꦢꦺꦴꦱ꧀ꦲꦢꦠ꧀꧉ꦱꦶꦤ꧀ꦠꦼꦤ꧀ꦲꦶꦁꦏꦁꦧꦝꦼꦱꦺꦴꦮꦤ꧀ꦏꦼꦢꦃꦔꦸꦚ꧀ꦗꦸꦏꦏꦼꦤ꧀ꦥꦤꦸꦮꦸꦤꦤ꧀ꦝꦠꦼꦁꦲꦗꦸꦢꦤ꧀ꦢꦊꦩ꧀ꦮꦶꦮꦶꦠ꧀ꦠꦁꦒ 28 ꦮꦸꦭꦤ꧀ꦥꦸꦤꦶꦏ꧉
꧋ꦱꦼꦢꦾꦠꦩꦩꦂꦠꦺꦴꦱꦏꦼꦤ꧀꧈ꦭꦶꦏ꧀ꦭꦶꦤꦶꦏ꧀ꦆꦱ꧀ꦭꦩꦶꦪꦃꦲꦶꦁꦔꦪꦺꦴꦓꦾꦠꦩ꧀ꦥꦶꦥꦠꦼꦝꦤ꧀ꦢꦊꦩ꧀ꦢꦂꦩꦱꦏꦶꦁꦱꦩ꧀ꦥꦼꦪꦤ꧀ꦢꦊꦩ꧀ꦲꦶꦁꦏꦁꦱꦶꦤꦸꦲꦸꦤ꧀ꦏꦁꦗꦼꦁꦱꦸꦱꦸꦲꦸꦤꦤ꧀ f 200꧉ꦠꦸꦮꦶꦤ꧀ꦱꦏꦶꦁꦏꦁꦗꦼꦁꦓꦸꦱ꧀ꦠꦶꦔꦼꦫꦤ꧀ꦄꦢꦶꦥꦠꦶꦄꦂꦪꦩꦁꦏꦸꦤꦒꦫꦤ꧀ f 100꧉
꧋ꦲꦶꦁꦠꦁꦒꦭ꧀ꦢꦶ 13 ꦮꦸꦭꦤ꧀ꦥꦸꦤꦶꦏꦲꦶꦁꦢꦊꦩ꧀ꦏꦥꦠꦶꦲꦤ꧀ꦔꦪꦺꦴꦓꦾꦥꦸꦤ꧀ꦮꦺꦴꦤ꧀ꦠꦤꦏꦼꦤ꧀ꦥꦏꦸꦂꦩꦠꦤ꧀꧈ꦲꦶꦁꦏꦁꦩꦮꦶꦢꦶꦥꦸꦤ꧀ꦲꦺꦱ꧀ꦠꦿꦺꦤꦶꦲꦶꦁꦥꦢꦸꦏꦠꦸꦮꦤ꧀ꦉꦱꦶꦝꦺꦤ꧀ꦧꦝꦼꦤꦩ꧀ꦥꦺꦏꦏꦼꦤ꧀ꦧꦶꦤ꧀ꦠꦁꦱꦭꦏꦲꦒꦼꦁꦝꦠꦼꦁꦫꦢꦺꦤ꧀ꦔꦧꦺꦲꦶꦢꦟꦸꦢꦶꦤꦠ꧈ꦮꦢꦤꦥꦔꦿꦺꦃꦥꦿꦗꦏꦶꦛ꧈ꦠꦸꦮꦶꦤ꧀ꦧꦶꦤ꧀ꦠꦁꦱꦭꦏꦲꦭꦶꦠ꧀ꦝꦠꦼꦁꦫꦢꦺꦤ꧀ꦯꦭꦩꦸꦤ꧀ꦄꦱꦶꦱ꧀ꦠꦺꦤ꧀ꦮꦢꦤꦥꦸꦭꦶꦱꦶꦏꦶꦛ꧉
꧋ꦒꦺꦴꦭꦺꦴꦔꦤꦶꦁꦧꦺꦴꦁꦱꦡꦶꦪꦺꦴꦁꦲ꧀ꦮꦥꦿꦤꦏꦤ꧀ꦲꦶꦁꦔꦪꦺꦴꦓꦾ꧈ꦧꦝꦼꦢꦩꦼꦭ꧀ꦥꦏꦼꦩ꧀ꦥꦭꦤ꧀ꦆꦤ꧀ꦝꦺꦴꦡꦶꦪꦺꦴꦁꦲ꧀ꦮ꧈ꦤꦔꦶꦁꦧꦺꦴꦠꦼꦤ꧀ꦝꦼꦝꦱꦂꦥꦸꦭꦶꦠꦶꦏ꧀꧈ꦤꦩꦸꦁꦔꦽꦩ꧀ꦧꦒ꧀ꦏꦧꦼꦠꦲꦤꦶꦁꦒꦺꦴꦭꦺꦴꦔꦤ꧀ꦏꦼꦩꦮꦺꦴꦤ꧀꧉
꧋ꦝꦺꦭꦶꦏꦺꦴꦫꦤ꧀ꦩꦂꦠꦺꦴꦱꦏꦼꦤ꧀꧈ꦤꦭꦶꦏꦏꦥ Plancius ꦧꦸꦃꦮꦺꦴꦤ꧀ꦠꦼꦤ꧀ꦲꦶꦁꦨꦼꦭꦮꦤ꧀꧈ꦔꦤ꧀ꦝꦥꦏꦼꦤ꧀ꦠꦶꦪꦁꦏꦺꦴꦩ꧀ꦩꦸꦤꦶꦱ꧀꧈ꦲꦶꦁꦏꦁꦚꦩ꧀ꦧꦸꦠ꧀ꦢꦩꦼꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦢꦢꦺꦴꦱ꧀ꦗꦸꦫꦸꦥꦩꦸꦭꦱꦫ꧉ꦲꦶꦁꦱꦮꦠꦮꦶꦱ꧀ꦩꦺꦴꦁꦱꦢꦢꦺꦴꦱ꧀ꦥꦗꦒꦺꦤꦶꦁꦉꦱꦺꦂꦱꦼ꧉
꧋ꦥꦸꦭꦶꦱꦶꦩꦼꦤ꧀ꦠꦱ꧀ꦚꦼꦥꦼꦁꦠꦶꦪꦁꦤꦩꦯꦺꦴꦩꦭꦶꦮꦺꦴꦤ꧀ꦠꦼꦤ꧀ꦲꦶꦁꦥꦼꦏꦼꦤ꧀ꦖꦶꦥꦫꦲꦶ꧈ꦲꦩꦂꦒꦶꦏꦺꦴꦤꦔꦤ꧀ꦲꦁꦒꦺꦤꦶꦥꦸꦤ꧀ꦲꦩ꧀ꦧꦭꦶꦧꦸꦏꦏꦼꦤ꧀ꦲꦂꦠꦫꦶꦁꦒꦶꦠꦤ꧀ꦠꦸꦮꦶꦤ꧀ꦫꦸꦥꦶꦪꦃꦥꦭ꧀ꦱꦸ꧉ꦱꦉꦁꦏꦥꦿꦶꦏ꧀ꦱꦔꦏꦼꦤ꧀ꦧꦶꦭꦶꦃꦲꦁꦒꦺꦤꦶꦥꦸꦤ꧀ꦢꦩꦼꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦤꦶꦥꦸꦤ꧀ꦥꦶꦪꦩ꧀ꦧꦏ꧀ꦲꦶꦁꦖꦶꦏꦩ꧀ꦥꦺꦏ꧀꧉ꦥꦸꦭꦶꦱꦶꦠꦼꦫꦸꦱ꧀ꦒꦊꦝꦃꦝꦠꦼꦁꦲꦶꦁꦒꦿꦶꦪꦤꦶꦥꦸꦤ꧀ꦠꦶꦪꦁꦮꦲꦸ꧈ꦲꦩꦁꦒꦶꦃꦧꦸꦠꦩꦭ꧀ꦗꦁꦏꦼꦥ꧀꧉
꧋ꦥꦫꦩꦸꦫꦶꦢ꧀ꦥꦩꦸꦭꦔꦤ꧀ꦲꦺꦴꦁꦏꦏꦭꦶꦃꦲꦶꦁꦄꦥ꧀ꦝꦺꦭꦶꦁꦔꦪꦺꦴꦓꦾꦱꦶꦱꦶꦃꦏꦶꦢꦸꦭ꧀꧈ꦱꦩꦶꦢꦂꦩꦮꦶꦱꦠꦝꦠꦼꦁꦥꦩꦸꦭꦔꦤ꧀ꦠꦸꦏꦁꦲꦶꦁꦭ꧀ꦭꦼꦩ꧀ꦥꦸꦪꦔꦤ꧀꧈ꦩꦸꦫꦶꦃꦭꦉꦭꦉꦱꦩꦶꦚꦸꦩꦼꦉꦥꦶꦝꦠꦼꦁꦭꦩ꧀ꦥꦲꦶꦁꦏꦒꦸꦤꦤ꧀꧉
꧋ꦲꦸꦥ꧀ꦲꦒꦺꦤ꧀ꦤꦩꦑꦩꦸ꧈ꦲꦶꦁꦏꦁꦤꦸꦩ꧀ꦥꦏ꧀ꦩꦺꦴꦠꦺꦴꦂꦥꦶꦠ꧀ꦤꦸꦧꦿꦸꦏ꧀ꦱꦝꦺꦴ꧈ꦲꦶꦁꦏꦁꦔꦤ꧀ꦠꦺꦴꦱ꧀ꦲꦢꦩꦼꦭ꧀ꦠꦶꦮꦱꦶꦁꦏꦸꦱꦶꦫꦶꦥꦸꦤ꧀꧈ꦏꦫꦩ꧀ꦥꦸꦔꦤ꧀ꦲꦶꦁꦥꦔꦢꦶꦭꦤ꧀ꦪꦸꦱ꧀ꦠꦶꦱꦶꦲꦶꦁꦯꦸꦫꦧꦪ꧈ꦏꦲꦸꦏꦸꦩ꧀ꦏꦸꦚ꧀ꦗꦫ 6 ꦮꦸꦭꦤ꧀꧉
