꧋ꦮꦢꦤꦲꦶꦁꦝꦶꦓꦸꦭ꧀꧈ꦫꦢꦺꦤ꧀ꦯꦱ꧀ꦠꦿꦤꦒꦫꦩꦂꦠꦺꦴꦱꦏꦼꦤ꧀ꦝꦠꦼꦁꦨꦤ꧀ꦠꦼꦤ꧀ꦨꦺꦴꦝꦼꦧꦶꦭꦶꦃꦱꦥꦸꦤꦶꦏꦏꦮꦺꦴꦤ꧀ꦠꦼꦤꦤꦶꦥꦸꦤ꧀ꦠꦼꦠꦶꦪꦁꦏꦺꦴꦩꦸꦤꦶꦱ꧀ꦲꦶꦁꦏꦁꦚꦩ꧀ꦧꦸꦠ꧀ꦢꦩꦼꦭ꧀ꦲꦶꦁꦞꦶꦒꦸꦭ꧀꧈ꦱꦮꦼꦒ꧀ꦱꦩꦶꦤꦼꦔꦃꦤꦼꦔꦲꦶꦧꦧꦢ꧀ꦮꦤꦠꦸꦮꦶꦤ꧀ꦔꦼꦢꦼꦒꦏꦼꦤ꧀ꦒꦿꦶꦪ꧈ꦥꦸꦤꦥꦢꦼꦤꦼꦢꦩꦼꦭ꧀ꦥꦠꦼꦒꦭꦤ꧀꧉ꦲꦸꦒꦶꦢꦊꦩ꧀ꦥꦏꦩ꧀ꦥꦸꦔꦤ꧀꧈ꦩꦂꦒꦶꦩꦂꦒꦶ꧈ꦠꦸꦮꦶꦤ꧀ꦲꦸꦮꦺꦴꦢ꧀ꦲꦸꦮꦺꦴꦢ꧀꧉ꦯꦒꦼꦢ꧀ꦲꦸꦒꦶꦧꦺꦴꦠꦼꦤ꧀ꦢꦔꦸꦩꦭꦶꦃꦲꦶꦁꦞꦶꦒꦸꦭ꧀ꦧꦝꦼꦢꦢꦺꦴꦱ꧀ꦝꦸꦱꦸꦤ꧀꧉ꦥꦫꦠꦼꦠꦶꦪꦁꦏꦺꦴꦩꦸꦤꦶꦱ꧀ꦲꦁꦒꦺꦤꦶꦥꦸꦤ꧀ꦚꦩ꧀ꦧꦸꦠ꧀ꦢꦩꦼꦭ꧀ꦏꦤ꧀ꦛꦶꦒꦩ꧀ꦧꦶꦫꦤꦶꦁꦩꦤꦃ꧈ꦱꦠꦸꦁꦒꦭ꧀ꦠꦸꦁꦒꦭꦶꦁꦠꦶꦪꦁꦱꦩꦶꦲꦺꦁꦒꦊꦁꦒꦭꦤ꧀ꦉꦧꦠꦤ꧀ꦫꦸꦩꦶꦪꦶꦤ꧀ꦲꦁꦒꦺꦤꦶꦥꦸꦤ꧀ꦔꦿꦩ꧀ꦥꦸꦔꦏꦼꦤ꧀꧉ꦲꦮꦤꦶꦥꦸꦤ꧀ꦧꦼꦤ꧀ꦠꦺꦂ꧈ꦠꦸꦮꦶꦤ꧀ꦱꦶꦠꦶꦤꦶꦥꦸꦤ꧀ꦧꦺꦴꦠꦼꦤ꧀ꦥꦠꦺꦴꦱ꧀ꦱꦲꦼ꧉
꧋ꦏꦮꦂꦠꦺꦴꦱꦏꦼꦤ꧀꧈ꦠꦶꦪꦁꦤꦩꦦꦢ꧀ꦩꦱꦥꦸꦠꦿ꧈ꦎꦥ꧀ꦱꦶꦤꦼꦂꦲꦶꦁꦥꦼꦏꦼꦤ꧀ꦝꦸꦱꦸꦤ꧀ꦧꦮꦃꦓꦫꦸꦠ꧀꧈ꦚꦭꦶꦁꦏꦸꦲꦏꦼꦤ꧀ꦲꦂꦠꦭꦁꦏꦸꦁ f 2000꧉ꦱꦫꦺꦃꦤꦶꦁꦠꦏ꧀ꦱꦶꦃꦏꦸꦭꦮꦂꦒꦧꦸꦥꦠꦶ꧈ꦧꦝꦼꦏꦥꦿꦶꦏ꧀ꦱꦲꦶꦁꦪꦸꦱ꧀ꦠꦶꦱꦶ꧉꧋ꦩꦸꦲꦩꦢꦶꦪꦃꦲꦶꦁꦦꦱꦸꦫꦸꦮꦤ꧀ꦢꦶꦥꦸꦤ꧀ꦮꦂꦠꦺꦴꦱꦏꦼꦤ꧀ꦧꦝꦼꦔꦼꦢꦭꦏꦼꦤ꧀ꦏꦭꦮꦂꦠꦶꦮꦸꦭꦤꦤ꧀ꦏꦁꦒꦼꦩꦶꦪꦫꦏꦼꦤ꧀ꦲꦒꦩꦶꦆꦱ꧀ꦭꦩ꧀꧉ꦏꦭꦮꦂꦠꦶꦮꦲꦸꦢꦶꦥꦸꦤ꧀ꦤꦩꦏꦏꦼꦤ꧀ Al-Fatechah꧉ꦭꦤ꧀ꦩꦭꦶꦃ Al-Noer ꦏꦭꦮꦂꦠꦶꦲꦺꦴꦂꦒꦤꦶꦥꦸꦤ꧀ꦪꦺꦴꦁꦆꦱ꧀ꦭꦩꦶꦡꦼꦤ꧀ꦧꦺꦴꦤ꧀꧈ꦧꦝꦼꦏꦮꦼꦢꦭꦏꦼꦤ꧀ꦲꦶꦁꦧꦱꦮꦭꦤ꧀ꦢꦶꦭꦤ꧀ꦩꦭꦪꦸ꧉ꦱꦮꦼꦒ꧀ꦏꦉꦩ꧀ꦧꦒ꧀ꦏꦕꦶꦛꦏ꧀ꦲꦶꦁꦨꦠꦮꦶ꧈ꦢꦶꦥꦸꦤ꧀ꦥꦤ꧀ꦝꦼꦒꦤꦶꦠꦸꦮꦤ꧀ꦯꦭꦶꦩ꧀꧉
꧋ꦲꦶꦁꦱꦧꦼꦤ꧀ꦮꦺꦴꦤ꧀ꦠꦼꦤ꧀ꦏꦺꦴꦁꦒꦿꦺꦱ꧀ꦱꦮꦂꦤꦶꦤꦶꦁꦥꦏꦼꦩ꧀ꦥꦭꦤ꧀ꦥꦿꦶꦧꦸꦩꦶ꧈ꦏꦢꦺꦴꦱ꧀ꦠ꧇ꦪꦺꦴꦁꦪꦥ꧈ꦪꦺꦴꦁꦆꦱ꧀ꦭꦩꦶꦡꦼꦤ꧀ꦧꦺꦴꦤ꧀꧈ꦲꦸꦠꦮꦶꦦꦼꦩꦸꦝꦆꦤ꧀ꦝꦺꦴꦤꦼꦱꦶꦪꦃ꧈ꦏꦮꦺꦴꦤ꧀ꦠꦼꦤꦤꦶꦥꦸꦤ꧀ꦏꦼꦠꦶꦔꦭ꧀ꦒꦸꦪꦸꦧ꧀꧉ꦢꦼꦤꦼꦲꦶꦁꦏꦁꦏꦁꦒꦼꦥꦮꦶꦕꦤ꧀ꦠꦼꦤꦤ꧀ꦔꦁꦒꦼꦧꦱꦩ꧀ꦭꦪꦸ꧉ꦩꦶꦭꦥꦏꦼꦩ꧀ꦥꦭꦤ꧀ꦥꦏꦼꦩ꧀ꦥꦭꦤ꧀ꦮꦲꦸꦱꦩꦶꦲꦶꦃꦠꦶꦪꦂꦧꦝꦼꦢꦩꦼꦭ꧀ꦏꦸꦂꦱꦸꦱ꧀ꦧꦱꦩꦭꦪꦸ꧈ꦩꦏꦠꦼꦤ꧀ꦲꦸꦒꦶꦲꦶꦁꦠꦼꦩ꧀ꦧꦼꦱꦏꦛꦲꦶꦁꦏꦭꦮꦂꦠꦶꦲꦶꦁꦒꦶꦃꦔꦁꦒꦼꦧꦱꦩꦭꦪꦸ꧈ꦏꦁꦒꦼꦧꦱꦆꦤ꧀ꦝꦺꦴꦤꦼꦱꦶꦪꦃ꧉
꧋ꦮꦶꦮꦶꦠ꧀ꦮꦸꦭꦤ꧀ꦥꦸꦤꦶꦏꦥꦫꦩꦸꦝꦯꦸꦩꦠꦿꦲꦶꦁꦏꦁꦠꦏ꧀ꦱꦶꦃꦱꦶꦤꦲꦸꦲꦸꦠꦮꦶꦲꦩꦺꦴꦁꦢꦒꦁꦮꦺꦴꦤ꧀ꦠꦼꦤ꧀ꦲꦶꦁꦔꦪꦺꦴꦒꦾ꧈ꦔꦼꦢꦭꦏꦼꦤ꧀ꦏꦭꦮꦂꦠꦶꦱꦮꦸꦭꦤ꧀ꦩꦼꦢꦭ꧀ꦏꦥꦶꦁꦏꦭꦶꦃ꧈ꦤꦩ Nibras ꦩꦮꦶꦝꦼꦝꦱꦂꦆꦱ꧀ꦭꦩ꧀꧈ꦢꦶꦥꦸꦤ꧀ꦥꦤ꧀ꦝꦼꦒꦤꦶꦡꦸꦮꦤ꧀ꦩꦏ꧀ꦩꦸꦂꦯꦭꦶꦩ꧀꧈ꦠꦸꦮꦶꦤ꧀ꦱꦤꦺꦱ꧀ꦱꦤꦺꦱꦶꦥꦸꦤ꧀꧉ꦆꦁꦤꦺꦴꦩꦼꦂꦲꦶꦁꦏꦁꦱꦩ꧀ꦥꦸꦤ꧀ꦩꦼꦢꦭ꧀꧈ꦏꦼꦠꦶꦔꦭ꧀ꦥꦔ꧀ꦭꦮꦤꦶꦥꦸꦤ꧀ꦝꦠꦼꦁꦦꦼꦂꦒꦼꦫꦏꦤ꧀ꦄꦃꦩꦢꦶꦪꦃꦲꦶꦁꦭꦲꦺꦴꦉ꧉
꧋ꦗꦼꦗꦏꦤꦩꦬꦩꦶꦤ꧀ꦲꦶꦁꦝꦸꦱꦸꦤ꧀ꦔꦱꦶꦤꦤ꧀ꦔꦪꦺꦴꦒꦾ꧈ꦱꦧꦼꦤ꧀ꦢꦶꦤ꧀ꦠꦼꦤ꧀ꦥꦢꦩꦼꦭꦤꦶꦥꦸꦤ꧀ꦥꦢꦺꦴꦱ꧀ꦒꦩ꧀ꦥꦶꦁꦝꦠꦼꦁꦉꦢꦶꦱꦕꦼꦭꦏꦶꦥꦸꦤ꧀ꦔꦿꦶꦏꦸ꧈ꦥꦩꦼꦤ꧀ꦝꦼꦠꦶꦥꦸꦤ꧀ꦱꦫꦤꦔꦼꦱꦺꦴꦁ꧉ꦣꦶꦭꦭꦃꦤꦭꦶꦏꦬꦩꦶꦤ꧀ꦱꦮꦼꦒ꧀ꦩꦊꦧꦼꦠ꧀ꦭꦗꦼꦁꦏꦸꦫꦸꦒꦤ꧀꧈ꦲꦩꦂꦒꦶꦱꦶꦠꦶꦤꦶꦥꦸꦤ꧀ꦲꦶꦁꦔꦶꦁꦒꦶꦭ꧀ꦗꦸꦒꦿꦸꦒ꧀ꦗꦭꦫꦤ꧀ꦱꦏꦶꦁꦲꦼꦩ꧀ꦥꦸꦏ꧀ꦩꦼꦤ꧀ꦠꦱ꧀ꦏꦼꦗꦮꦲꦤ꧀꧉ꦑꦚ꧀ꦕꦏꦚ꧀ꦕꦤꦶꦥꦸꦤ꧀ꦱꦩꦶꦠꦼꦠꦸꦭꦸꦁ꧈ꦤꦔꦶꦁꦬꦩꦶꦤ꧀ꦱꦩ꧀ꦥꦸꦤ꧀ꦏꦼꦭꦗꦼꦁꦔꦗꦭ꧀꧉
꧋ꦥꦩꦉꦤ꧀ꦠꦃꦧꦝꦼꦲꦩ꧀ꦧꦶꦏꦏ꧀ꦒꦿꦶꦪꦥꦒꦤ꧀ꦠꦺꦴꦱꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦉꦱꦶꦝꦼꦤꦤ꧀ꦦꦊꦩ꧀ꦧꦁ꧈ꦲꦶꦁꦒꦶꦃꦥꦸꦤꦶꦏ꧇ꦦꦊꦩ꧀ꦧꦁ 1꧈ꦩꦸꦮꦫꦌꦤꦶꦩ꧀ 1꧉ꦦꦉꦱꦶꦝꦼꦤꦤ꧀ꦨꦼꦁꦏꦸꦊꦤ꧀꧇ꦨꦼꦁꦏꦸꦊꦤ꧀ 1꧈ꦥꦲꦶꦪꦁ 1꧈ꦖꦸꦫꦸꦥ꧀ 1꧈ꦩꦸꦮꦫꦄꦩꦤ꧀ 1 ꦠꦸꦮꦶꦤ꧀ꦑꦿꦸꦮꦼ 1꧉ꦆꦁꦯꦸꦩꦠꦿꦮꦼꦠꦤ꧀ꦲꦥ꧀ꦝꦺꦭꦶꦁꦯꦼꦂꦝꦁ 1꧉
꧋ꦥꦩ꧀ꦧꦤ꧀ꦠꦸꦏꦗꦮꦺꦤ꧀ꦲꦶꦁꦦꦸꦂꦮꦉꦗꦩꦂꦠꦺꦴꦱꦏꦼꦤ꧀꧇ꦎꦠꦺꦴꦧꦶꦱ꧀ꦦꦸꦂꦮꦉꦗꦑꦸꦛꦲꦂꦗꦠꦸꦩ꧀ꦧꦸꦏꦤ꧀ꦱꦩꦶꦎꦠꦺꦴ꧈ꦲꦶꦁꦏꦁꦱꦠꦸꦁꦒꦭ꧀ꦱꦺꦴꦥꦶꦫꦶꦥꦸꦤ꧀ꦠꦶꦮꦱ꧀꧈ꦱꦠꦸꦁꦒꦭꦶꦥꦸꦤ꧀ꦲꦶꦁꦏꦁꦤꦸꦩ꧀ꦥꦏ꧀ꦏꦛꦃꦲꦶꦁꦏꦁꦏꦠꦠꦺꦴꦤ꧀꧉ꦮꦺꦴꦤ꧀ꦠꦼꦤ꧀ꦠꦶꦪꦁꦲꦺꦱ꧀ꦠꦿꦶꦲꦶꦁꦝꦸꦱꦸꦤ꧀ꦓꦿꦧꦒ꧀꧈ꦤꦤ꧀ꦝꦁꦠꦠꦸ꧈ꦩꦊꦧꦼꦠ꧀ꦲꦶꦁꦒꦿꦶꦪꦱꦏꦶꦠ꧀ꦲꦶꦁꦦꦸꦂꦮꦉꦗ꧉ꦲꦶꦁꦏꦁꦗꦊꦂꦤꦸꦮꦺꦤꦶ꧈ꦱꦉꦁꦱꦸꦩꦼꦉꦥ꧀ꦠꦠꦸꦤꦶꦥꦸꦤ꧀ꦲꦶꦁꦏꦁꦲꦺꦱ꧀ꦠꦿꦶ꧈ꦱꦔꦼꦠ꧀ꦏꦒꦺꦠ꧀꧈ꦱꦮꦁꦱꦸꦭꦶꦥꦸꦤ꧀ꦭꦗꦼꦁꦢꦢꦺꦴꦱ꧀ꦱꦏꦶꦠ꧀꧈ꦮꦸꦱꦤꦔꦗꦭ꧀꧉ꦱꦉꦁꦲꦶꦁꦏꦁꦲꦺꦱ꧀ꦠꦿꦶꦱꦩ꧀ꦥꦸꦤ꧀ꦱꦫꦱ꧀꧈ꦩꦤ꧀ꦠꦸꦏ꧀꧈ꦮꦸꦱꦤꦱꦉꦁꦩꦶꦉꦁꦲꦶꦁꦏꦁꦗꦊꦂꦱꦩ꧀ꦥꦸꦤ꧀ꦔꦗꦭ꧀꧈ꦭꦗꦼꦁꦢꦢꦺꦴꦱ꧀ꦱꦏꦶꦠ꧀ꦭꦤ꧀ꦲꦤ꧀ꦢꦢꦺꦴꦱꦏꦼꦤ꧀ꦗꦭꦫꦤ꧀ꦲꦶꦁꦲꦗꦭꦶꦥꦸꦤ꧀꧉
꧋ꦲꦶꦁꦩꦢꦸꦫꦥꦸꦤꦶꦏꦱꦤꦢꦾꦤ꧀ꦧꦺꦴꦠꦼꦤ꧀ꦩꦗꦼꦁꦲꦶꦁꦧꦧ꧀ꦠꦼꦠꦤꦺꦤ꧀ꦠꦸꦮꦶꦤ꧀ꦤꦼꦤꦤꦼꦩ꧀꧈ꦤꦔꦶꦁꦲꦶꦁꦧꦧ꧀ꦥꦩꦶꦪꦫꦤ꧀ꦫꦗꦏꦪꦩꦗꦼꦁꦱꦔꦼꦠ꧀꧉ꦩꦶꦠꦸꦫꦸꦠ꧀ꦥꦼꦂꦱ꧀ꦭꦃꦠꦲꦸꦤꦤ꧀ꦱꦏꦶꦁ Burg. Veeartsnijkundigen Dienst꧈ꦲꦶꦁꦩꦢꦸꦫꦲꦁꦒꦝꦲꦶꦩ꧀ꦧꦸ 628,522 ꦩꦺꦃꦱꦥꦫꦒꦁꦱꦭꦶꦁꦥꦩꦶꦪꦫꦤ꧀ꦱꦆꦤ꧀ꦝꦶꦪ꧉ꦲꦶꦁꦠꦲꦸꦤ꧀ 1926 ꦔꦼꦢꦭꦏꦼꦤ꧀ꦊꦩ꧀ꦧꦸꦱꦏꦶꦁꦔꦿꦶꦏꦸ 75,058꧈ꦲꦶꦁꦒꦶꦃꦥꦸꦤꦶꦏꦮꦺꦴꦤ꧀ꦠꦼꦤ꧀ 12 ½ꦥꦽꦱꦺꦤ꧀ꦱꦏꦶꦁꦥꦩꦶꦪꦫꦤ꧀ꦱꦢꦪ꧈ꦢꦼꦤꦼꦲꦶꦁꦲꦸꦤ꧀ꦮ 1925 ꦮꦺꦴꦤ꧀ꦠꦼꦤ꧀ 52,264 ꧉ꦲꦶꦁꦠꦼꦱ꧀ꦥꦁꦒꦼꦤꦤ꧀ꦮꦼꦢꦭꦶꦁꦫꦗꦏꦪꦲꦸꦢꦶꦥꦸꦤ꧀ꦠꦶꦠꦶꦱꦔꦼꦠ꧀꧈ꦠꦸꦮꦶꦤ꧀ꦢꦶꦥꦸꦤ꧀ꦚꦠꦏꦏꦼꦤ꧀ꦢꦼꦤꦶꦁ B.G.D. ꦮꦼꦏꦱꦤ꧀ꦱꦒꦼꦢ꧀ꦚꦼꦒꦃꦠꦸꦮꦸꦲꦶꦁꦱꦼꦱꦏꦶꦠ꧀ꦫꦗꦏꦪ꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦲꦶꦁꦨꦠꦮꦶꦮꦺꦴꦤ꧀ꦠꦼꦤ꧀ꦥꦒꦸꦪꦸꦧꦤ꧀ꦲꦶꦁꦏꦁꦤꦼꦢꦾꦲꦢꦩꦼꦭ꧀ꦒꦿꦶꦪꦥꦩꦺꦴꦤ꧀ꦝꦺꦴꦏꦤ꧀ꦏꦁꦒꦼꦥꦫꦥꦼꦂꦥ꧀ꦭꦺꦒꦼꦂ꧈ꦧꦝꦼꦢꦶꦥꦸꦤ꧀ꦊꦏ꧀ꦱꦤꦤꦶꦱꦊꦧꦼꦠꦶꦥꦸꦤ꧀ꦠꦲꦸꦤ꧀ꦥꦸꦤꦶꦏ꧉
꧋ꦏꦮꦂꦠꦺꦴꦱꦏꦼꦤ꧀꧈ꦠꦸꦮꦤ꧀ꦄꦲꦺꦴꦭꦶꦪ Ind. Arts꧈ꦲꦶꦁꦏꦁꦤꦶꦤ꧀ꦢꦏꦏꦼꦤ꧀ꦥꦢꦩꦼꦭꦤ꧀ꦲꦶꦁꦦꦉ꧈ꦱꦩ꧀ꦥꦸꦤ꧀ꦢꦸꦩꦸꦒꦶꦲꦶꦁꦨꦠꦮꦶ꧈ꦧꦝꦼꦧꦶꦝꦭ꧀ꦲꦔ꧀ꦭꦗꦼꦔꦏꦼꦤ꧀ꦥꦱꦶꦤꦲꦺꦴꦤꦶꦥꦸꦤ꧀ꦝꦠꦼꦁꦌꦫꦺꦴꦥꦃ꧉
ꦥꦮꦂꦠꦺꦴꦱ꧀ꦱꦏꦶꦁꦉꦝꦏ꧀ꦱꦶ
꧋ꦠꦸꦮꦤ꧀ꦩꦸꦭꦾꦢꦶꦮꦂꦤꦲꦶꦁꦑꦸꦛꦒꦼꦝꦼ꧈I ꦲꦶꦁꦏꦁꦱꦒꦼꦢ꧀ꦲꦩ꧀ꦧꦼꦏ꧀ꦠꦊꦁꦒꦤꦤ꧀ꦲꦸ 4 ꦥꦸꦤꦶꦏꦏꦼꦢꦃꦱꦮꦂꦤꦶ꧈ꦦꦚ꧀ꦗꦶꦦꦸꦱ꧀ꦠꦏꦠꦮꦶꦑꦗꦮꦺꦤ꧀꧈ꦱꦭꦃꦱꦠꦸꦁꦒꦭ꧀꧈II ꦭꦩꦶꦤꦶꦁꦲꦁꦒꦺꦤꦶꦥꦸꦤ꧀ꦊꦁꦒꦤꦤ꧀ꦏꦼꦢꦃꦱꦩꦶ꧉
꧋ꦱꦮꦼꦤꦺꦲꦶꦁꦊꦁꦒꦤꦤ꧀ꦏꦗꦮꦺꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦒꦝꦃꦥꦤꦼꦝꦱꦸꦥꦢꦺꦴꦱ꧀ꦲꦶꦁꦏꦗꦮꦺꦤ꧀ꦔꦼꦮꦿꦠ꧀ꦥꦼꦂꦱ꧀ꦭꦃꦫꦢ꧀ꦏꦮꦸꦭ꧉ꦥꦸꦤꦶꦏꦏꦗꦮꦺꦤ꧀ꦥꦚ꧀ꦕꦺꦤ꧀ꦱꦩ꧀ꦥꦸꦤ꧀ꦒꦝꦃꦱꦼꦢꦾꦩꦏꦠꦼꦤ꧀꧈ꦧꦝꦼꦏꦮꦶꦮꦶꦠꦤ꧀ꦱꦩꦁꦱꦱꦩ꧀ꦥꦸꦤ꧀ꦊꦁꦒꦃꦥꦉꦥꦠꦤ꧀꧉
꧋ꦧꦧ꧀ꦏꦮꦺꦴꦤ꧀ꦠꦼꦤꦤꦶꦁꦧꦸꦏꦸ
꧋ꦉꦝꦏ꧀ꦱꦶꦏꦗꦮꦺꦤ꧀ꦩꦼꦤ꧀ꦠꦱ꧀ꦤꦩ꧀ꦥꦺꦤꦶꦧꦸꦏꦸꦱꦏꦶꦁ Boekh. S.M.꧉ꦣꦶꦮꦂꦤ꧈ꦤꦩꦬꦼꦁꦒꦱꦸꦪꦱ꧉ꦱꦸꦫꦲꦺꦴꦱꦶꦥꦸꦤ꧀ꦧꦸꦏꦸꦮꦲꦸꦩꦂꦱꦶꦠꦏꦏꦼꦤ꧀ꦫꦫꦱꦶꦥꦸꦤ꧀ꦠꦶꦪꦁꦲꦩꦼꦁꦏꦸꦧꦊꦒꦿꦶꦪ꧈ꦩꦮꦶꦱꦶꦤꦮꦸꦁꦱꦼꦏꦂꦩꦕꦥꦠ꧀꧈ꦉꦒꦶꦤꦶꦥꦸꦤ꧀ꦤꦩꦸꦁ f 0.25 ꦱꦼꦫꦠ꧀ꦮꦲꦸꦥꦤ꧀ꦠꦼꦱ꧀ꦢꦢꦺꦴꦱ꧀ꦮꦲꦺꦴꦱꦤꦶꦥꦸꦤ꧀ꦥꦫꦤꦼꦤꦼꦩꦤ꧀꧉ꦉꦝꦏ꧀ꦱꦶꦏꦗꦮꦺꦤ꧀ꦩꦠꦸꦂꦤꦸꦮꦸꦤ꧀꧉
