ꦮꦺꦴꦱ꧀ꦥꦗꦼꦁꦔꦤ꧀ꦤꦶꦁꦥꦤ꧀ꦠꦸꦤ꧀ꦮꦲꦸ꧈ꦱꦧꦒꦼꦪꦤ꧀ꦲꦒꦼꦁꦲꦶꦁꦒꦶꦃꦩ꧀ꦭꦼꦧꦼꦠ꧀ꦝꦠꦼꦁꦱꦸꦩ꧀ꦧꦁꦔꦤ꧀꧉ꦭꦃ꧈ꦥꦸꦤꦶꦏꦲꦶꦁꦏꦁꦤꦼꦭꦱ꧀ꦤꦼꦭꦱ꧀ꦱꦏꦼꦤ꧀ꦮꦺꦴꦱ꧀꧉ꦠꦂꦏꦝꦁꦮꦺꦴꦱ꧀ꦱꦩ꧀ꦥꦸꦤ꧀ꦠꦼꦭꦱ꧀꧈ꦠꦏ꧀ꦱꦶꦃꦏꦛꦃꦠꦶꦪꦁꦒꦝꦃꦢꦩꦼꦭ꧀꧈ꦭꦃꦭꦗꦼꦁꦏꦥꦼꦏ꧀ꦱꦔꦼꦭꦺꦴꦁꦒꦥ꧀ꦭꦺꦏ꧀꧉ꦩꦺꦴꦁꦏꦥꦸꦤꦶꦏꦲꦶꦁꦏꦁꦧꦏꦸꦠꦤ꧀ꦝꦺꦴꦤ꧀ꦠꦼꦝ꧉
꧋ꦗꦭꦂꦫꦤ꧀ꦱꦏꦶꦁꦥꦸꦤꦶꦏ꧈ꦱꦒꦼꦢ꧀ꦲꦸꦒꦶꦠꦤ꧀ꦝꦺꦴꦤ꧀ꦤꦶꦥꦸꦤ꧀ꦒꦥ꧀ꦭꦺꦏ꧀ꦠꦼꦭꦱ꧀ꦱꦢꦺꦫꦺꦁꦔꦶꦥꦸꦤ꧀ꦥꦤꦺꦤ꧀ꦗꦒꦸꦁꦲꦸꦠꦮꦶꦥꦤ꧀ꦠꦸꦤ꧀꧈ꦥꦸꦤꦥꦲꦶꦁꦒꦶꦃꦤꦿꦶꦩꦃꦧꦝꦼꦧꦺꦴꦠꦼꦤ꧀ꦤꦼꦝ꧈ꦠꦔꦺꦃꦏꦭꦩ꧀ꦥꦃꦲꦤ꧀ꦤꦶꦥꦸꦤ꧀꧉ꦲꦩꦶꦠ꧀ꦲꦁꦒꦼꦂꦠꦏ꧀ꦱꦶꦃꦒꦼꦱꦁꦏꦼꦩꦮꦺꦴꦤ꧀꧈ꦲꦶꦁꦒꦶꦃꦠꦏ꧀ꦱꦶꦃꦲꦩ꧀ꦧꦼꦠꦃꦲꦏꦼꦤ꧀ꦠꦼꦝ꧈ꦭꦒꦺꦏ꧀ꦝꦠꦼꦁꦥꦸꦤ꧀ꦢꦶꦥꦢꦺꦴꦱ꧀ꦱꦶꦥꦸꦤ꧀꧉ꦱꦩꦶꦉꦁꦏꦸꦭ꧈ꦧꦺꦴꦠꦼꦤ꧀ꦥꦠꦺꦴꦱ꧀ꦏꦛꦃꦠꦶꦪꦁꦔꦶꦗꦼꦩ꧀ꦩꦏꦼꦤ꧀꧈ꦤꦔꦶꦁꦱꦩꦶꦥꦢꦺꦴꦱ꧀ꦱꦩ꧀ꦧꦸꦠ꧀ꦠꦤ꧀ꦲꦂꦠꦏꦤ꧀ꦛꦶꦱꦉꦩ꧀ꦩꦤ꧀ꦏꦛꦃ꧉ꦮꦃ꧈ꦥꦚ꧀ꦕꦺꦤ꧀ꦲꦶꦁꦒꦶꦃꦲꦮꦿꦠ꧀ꦱꦲꦺꦱ꧀ꦠꦸ꧈ꦠꦶꦪꦁꦧꦝꦼꦔꦶꦱꦺꦤ꧀ꦤꦶꦏꦤ꧀ꦛꦺꦴꦁꦥꦸꦤꦶꦏ꧉
꧋ꦩꦶꦭꦏꦸꦭꦧꦶꦔꦃꦱꦪꦼꦏ꧀ꦠꦺꦴꦱ꧀꧈ꦢꦺꦤꦺꦱꦩ꧀ꦥꦸꦤ꧀ꦮꦠꦮꦶꦱ꧀ꦱꦠꦲꦸꦤ꧀ꦭꦁꦏꦸꦁ꧈ꦲꦶꦁꦱꦭꦃꦱꦠꦸꦁꦒꦶꦭ꧀ꦭꦶꦁꦥꦁꦒꦼꦤ꧀ꦤꦤ꧀ꦮꦺꦴꦤ꧀ꦠꦼꦤ꧀ꦥꦏꦼꦩ꧀ꦥꦭ꧀ꦭꦤ꧀ꦤꦶꦥꦸꦤ꧀ꦥꦫꦥꦿꦶꦪꦤ꧀ꦠꦸꦤ꧀꧈ꦲꦶꦁꦏꦁꦢꦩꦼꦭ꧀ Crediet꧇ꦥꦿꦤꦠꦤꦶꦥꦸꦤ꧀ꦱꦲꦺꦩ꧀ꦥꦼꦂ Crediet ꦲꦶꦁꦏꦁꦭꦶꦩꦿꦃ꧉ꦥꦏꦼꦩ꧀ꦥꦭ꧀ꦭꦤ꧀ꦮꦲꦸꦒꦝꦃꦏꦥꦶꦠꦭ꧀ꦏꦭꦶꦃꦠꦼꦔꦃꦲꦺꦮꦺꦴꦤ꧀ꦤꦤ꧀꧉ꦥꦸꦤꦶꦏꦲꦶꦁꦏꦁꦱꦒꦼꦢ꧀ꦩꦶꦠꦸꦭꦸꦁꦔꦶꦝꦠꦼꦁꦥꦫꦧꦏꦸꦭ꧀꧉ꦱꦧꦼꦤ꧀ꦮꦚ꧀ꦕꦶꦤꦶꦥꦸꦤ꧀ꦏꦧꦶꦏꦏ꧀(ꦥꦼꦏꦼꦤ꧀ꦤꦤ꧀)ꦏꦸꦩꦿꦸꦪꦸꦏ꧀ꦲꦶꦁꦏꦁꦚꦩ꧀ꦧꦸꦠ꧀꧈ꦭꦤ꧀ꦲꦶꦁꦏꦁꦤꦶꦕꦶꦭ꧀꧉ꦢꦢꦺꦴꦱ꧀ꦭꦗꦼꦁꦱꦸꦢꦕꦕꦃꦲꦶꦥꦸꦤ꧀ꦲꦶꦁꦏꦁꦚꦩ꧀ꦧꦸꦠ꧀ꦩꦼꦤ꧀ꦢꦿꦶꦁ꧉ꦱꦤꦗꦤ꧀ꦧꦺꦴꦠꦼꦤ꧀ꦲꦚ꧀ꦗꦫꦒ꧀ꦢꦩꦼꦭ꧀ Antiwoeker ꧈ꦤꦔꦶꦁꦲꦶꦁꦒꦶꦃꦫꦒꦶ Antiwoeker (ꦥꦏꦼꦩ꧀ꦥꦭ꧀ꦭꦤ꧀ꦲꦶꦁꦏꦁꦱꦼꦢꦾꦤꦶꦥꦸꦤ꧀ꦲꦤꦁꦒꦸꦭꦁꦔꦶꦥꦤ꧀ꦢꦩꦼꦭ꧀ꦭꦶꦁꦭꦶꦤ꧀ꦠꦃꦝꦫꦠ꧀)ꦱꦏꦼꦝꦶꦏ꧀꧉ꦤꦶꦭꦱꦲꦼꦱꦔꦼꦠ꧀ꦲꦸꦥꦩꦶꦏꦲꦒꦼꦔꦏꦼꦤ꧀ꦏꦥꦶꦠꦭ꧀ꦭꦶꦥꦸꦤ꧀꧉
꧋ꦏꦸꦭꦠꦤ꧀ꦱꦃꦩꦸꦩꦸꦗꦶ꧈ꦩꦸꦒꦶꦩꦸꦒꦶ Crediet ꦲꦶꦁꦏꦁꦱꦩ꧀ꦥꦸꦤ꧀ꦢꦔꦸꦲꦢꦼꦒ꧀ꦒꦶꦥꦸꦤ꧀꧈ꦭꦤ꧀ꦏꦠꦶꦔꦭ꧀ꦱꦲꦼꦮꦲꦸ꧈ꦱꦒꦼꦢ꧀ꦢꦊꦱ꧀ꦠꦤ꧀ꦠꦸꦤ꧀ꦠꦤ꧀ꦥꦱꦧꦼꦏꦭ꧉ꦲꦮꦶꦠ꧀ꦥꦚ꧀ꦕꦺꦤ꧀ꦏꦛꦃꦥꦶꦠꦸꦭꦸꦁꦔꦤ꧀ꦤꦶꦥꦸꦤ꧀ꦝꦠꦼꦁꦲꦶꦁꦏꦁꦏꦕꦶꦁꦏꦿꦁꦧ꧀ꦒꦤ꧀꧉ꦩꦭꦃꦫꦸꦩꦶꦪꦶꦤ꧀ꦱꦩ꧀ꦥꦸꦤ꧀ꦤꦠꦼꦔꦿꦚ꧀ꦕꦁꦧꦝꦼꦢꦩꦼꦭ꧀ꦧꦁꦠꦤꦶ꧈ꦲꦶꦁꦒꦶꦃꦥꦸꦤꦶꦏꦚꦩ꧀ꦧꦸꦠ꧀ꦠꦏꦼꦤ꧀ꦪꦠꦿꦝꦠꦼꦁꦠꦶꦪꦁꦠꦤꦶ꧈ꦲꦁꦒꦺꦤ꧀ꦤꦶꦥꦸꦤ꧀ꦚꦲꦸꦂꦲꦶꦁꦩꦺꦴꦁꦱꦥꦤꦺꦤ꧀꧉ꦩꦸꦒꦶꦩꦸꦒꦶꦏꦊꦏ꧀ꦱꦤ꧀ꦤꦤ꧀꧉
꧋ꦲꦶꦁꦒꦶꦃꦱꦿꦤꦲꦢꦼꦒ꧀ꦒꦶꦁꦧꦁꦠꦤꦶꦮꦲꦸ꧈ꦏꦸꦭꦏꦶꦤ꧀ꦠꦼꦤ꧀ꦠꦶꦪꦁꦠꦤꦶꦧꦝꦼꦱꦸꦢꦲꦁꦒꦺꦤ꧀ꦤꦶꦥꦸꦤ꧀ꦉꦩꦼꦤ꧀ꦚꦢꦼꦤꦶꦲꦸꦮꦺꦴꦱ꧀꧉
꧋ꦪꦺꦤ꧀ꦱꦩ꧀ꦥꦸꦤ꧀ꦱꦩꦶꦧꦺꦴꦠꦼꦤ꧀ꦥꦸꦫꦸꦤ꧀ꦚꦢꦼꦮꦺꦴꦱ꧀꧈ꦠꦼꦒꦼꦱ꧀ꦱꦶꦥꦸꦤ꧀꧇ꦮꦺꦴꦱ꧀ꦏꦱꦶꦩ꧀ꦥꦼꦤ꧀꧈ꦏꦁꦒꦼꦏꦥꦽꦭꦸꦮꦤ꧀ꦤꦶꦥꦸꦤ꧀ꦥꦶꦪꦩ꧀ꦧꦏ꧀꧉ꦭꦤ꧀ꦱꦩꦺꦴꦁꦱꦠꦶꦪꦁꦠꦤꦶꦱꦒꦼꦢ꧀ꦚꦶꦩ꧀ꦥꦼꦤ꧀ꦮꦺꦴꦱ꧀ꦱꦪꦼꦏ꧀ꦠꦺꦴꦱ꧀꧈ꦢꦢꦺꦴꦱ꧀ꦫꦒꦶꦕꦼꦏꦥ꧀꧈ꦏꦼꦔꦶꦁꦏꦮꦱ꧀ꦠꦤ꧀ꦤꦤ꧀ꦩꦶꦤ꧀ꦝꦏ꧀ꦥꦁꦒꦼꦱꦁꦔꦤ꧀ꦤꦶꦥꦸꦤ꧀꧉ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦤꦩꦸꦁꦤꦿꦶꦩꦃꦤꦼꦝꦒꦥ꧀ꦭꦺꦏ꧀꧉ꦮꦃ꧈ꦲꦺꦩꦤ꧀ꦲꦺꦩꦤ꧀ꦤꦝꦠꦼꦁꦮꦺꦴꦱ꧀ꦱꦶꦥꦸꦤ꧀꧉
꧋ꦮꦱꦤꦥꦸꦁꦏꦱꦤ꧀ꦤꦶꦁꦲꦠꦸꦂꦏꦸꦭ꧈ꦏꦸꦭꦱꦼꦱꦼꦭ꧀ꦭꦶꦥꦶꦠꦏꦼꦤ꧀ꦤꦤ꧀ꦩꦏꦠꦼꦤ꧀꧇ꦧꦼꦚ꧀ꦗꦶꦁꦥꦸꦤꦥ꧈ꦱꦒꦼꦢ꧀ꦢꦶꦥꦸꦤ꧀ꦒꦥ꧀ꦭꦺꦏ꧀ꦩꦭꦶꦃꦢꦢꦺꦴꦱ꧀ꦮꦺꦴꦱ꧀꧉ꦭꦤ꧀ꦧꦼꦚ꧀ꦗꦶꦁꦥꦸꦤꦥꦱꦒꦼꦢ꧀ꦢꦶꦥꦸꦤ꧀ꦚꦤ꧀ꦝꦼꦠ꧀ꦠꦶ vracht auto ꦲꦶꦁꦏꦁꦏꦼꦱꦃ꧈ꦭꦤ꧀ꦩꦺꦴꦩꦺꦴꦠ꧀ꦠꦤ꧀ꦤꦶꦥꦸꦤ꧀ꦏꦊꦧꦼꦠ꧀ꦠꦏꦼꦤ꧀ꦲꦶꦁꦭꦸꦩ꧀ꦧꦸꦁꦔꦶꦥꦸꦤ꧀ꦠꦶꦪꦁꦗꦮꦶ꧉
R. S. ꦏꦂꦠꦮꦂꦢꦪ꧉
