ꦢꦸꦩꦸꦒꦶꦤꦶꦥꦸꦤ꧀ꦠꦲꦸꦤ꧀ 1921 ꦲꦶꦁꦏꦁꦱꦭꦩꦶꦭꦩꦶꦤꦶꦥꦸꦤ꧀ꦠꦤ꧀ꦱꦃꦲꦔ꧀ꦭꦧꦼꦠ꧀ꦠꦶꦝꦠꦼꦁꦥꦒꦼꦫꦏ꧀ꦏꦤ꧀ꦤꦶꦥꦸꦤ꧀ꦠꦶꦪꦁꦥꦿꦶꦧꦸꦩꦶ꧈ꦏꦢꦺꦴꦱ꧀ꦥꦸꦤꦶꦏꦱꦩ꧀ꦥꦸꦤ꧀ꦱꦠꦸꦁꦒꦶꦭ꧀ꦭꦶꦁꦥꦱꦼꦏ꧀ꦱꦺꦤ꧀꧈ꦧꦶꦭꦶꦃꦠꦸꦮꦤ꧀ Baars ꦥꦸꦤꦶꦏꦢꦼꦢꦼꦧꦁꦱꦤꦶꦁꦮꦭꦤ꧀ꦢꦶꦲꦶꦁꦏꦁꦔꦼꦩꦺꦴꦃꦲꦔꦼꦩꦺꦴꦃꦲꦶꦝꦠꦼꦁꦥꦥꦤ꧀ꦤꦶꦁꦠꦶꦪꦁꦥꦿꦶꦧꦸꦩꦶꦥꦸꦤꦥꦩꦼꦱ꧀ꦛꦶꦤꦶꦥꦸꦤ꧀꧉ꦤꦭꦶꦏꦠꦸꦮꦤ꧀ Baars ꦒꦝꦃꦥꦔꦶꦤ꧀ꦠꦼꦤ꧀꧈ꦧꦶꦭꦶꦃꦤꦩꦸꦁꦫꦶꦱꦏ꧀ꦱꦲꦲꦺꦮꦃꦲꦶꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦲꦶꦁꦱꦩꦁꦏꦼꦥꦸꦤꦶꦏꦲꦶꦁꦏꦁꦱꦒꦼꦢ꧀ꦔꦶꦕꦭ꧀ꦭꦏꦼꦤ꧀ꦱꦢꦪꦲꦶꦁꦏꦁꦧꦺꦴꦠꦼꦤ꧀ꦲꦢꦶꦭ꧀ꦲꦸꦠꦮꦶꦲꦶꦁꦏꦁꦱꦮꦼꦤꦁꦮꦼꦤꦁ꧈ꦠꦸꦮꦤ꧀ Baars ꦲꦶꦁꦒꦶꦃꦧꦺꦴꦠꦼꦤ꧀ꦱꦼꦩꦁꦱꦼꦩꦁꦲꦚꦺꦴꦫꦃꦲꦏꦼꦤ꧀ꦥꦩꦁꦩꦁꦒꦶꦃꦲꦶꦥꦸꦤ꧀ꦲꦶꦁꦏꦁꦧꦺꦴꦠꦼꦤ꧀ꦢꦶꦥꦸꦤ꧀ꦕꦺꦴꦤ꧀ꦝꦺꦴꦁꦔꦶꦢꦼꦤꦶꦁꦱꦏꦛꦃꦲꦶꦁꦠꦶꦪꦁ꧈ꦲꦤꦔꦶꦁꦲꦶꦁꦏꦁꦏꦩꦤꦃꦱꦠꦸꦁꦒꦶꦭ꧀ꦭꦶꦁꦩꦂꦒꦶꦲꦶꦁꦏꦁꦕꦼꦭꦏ꧀ꦥꦶꦪꦩ꧀ꦧꦏ꧀ꦱꦒꦼꦢ꧀ꦢꦶꦥꦸꦤ꧀ꦲꦁꦱꦭ꧀ꦥꦁꦒꦼꦱꦁꦔꦤ꧀ꦲꦶꦁꦏꦁꦲꦸꦠꦩꦶ꧉ꦩꦏꦠꦼꦤ꧀ꦲꦸꦒꦶꦠꦸꦮꦤ꧀ Baars ꦲꦚꦫꦶꦪꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦏꦠꦽꦱ꧀ꦤꦤ꧀ꦤꦶꦥꦸꦤ꧀ꦝꦠꦼꦁꦠꦶꦠꦶꦪꦁꦲꦶꦤ꧀ꦢꦶꦪꦲꦶꦁꦒꦶꦃꦠꦏ꧀ꦱꦶꦃꦲꦗꦼꦒ꧀ꦏꦼꦩꦮꦺꦴꦤ꧀꧈ꦭꦤ꧀ꦢꦸꦩꦸꦒꦶꦤꦶꦁꦱꦩꦁꦏꦼꦲꦶꦁꦒꦶꦃꦠꦏ꧀ꦱꦶꦃꦲꦁꦒꦝꦃꦲꦶꦥꦩꦁꦒꦶꦃ꧈ꦧꦶꦭꦶꦃꦥꦥꦤ꧀ꦤꦶꦥꦸꦤ꧀ꦠꦶꦪꦁꦥꦿꦶꦧꦸꦩꦶꦥꦸꦤꦶꦏꦏꦼꦢꦃꦭꦁꦏꦸꦁꦲꦶꦁꦒꦶꦭ꧀ꦠꦶꦤꦶꦩ꧀ꦧꦁꦲꦶꦁꦏꦁꦱꦩ꧀ꦥꦸꦤ꧀ꦏꦕꦼꦥꦼꦁꦲꦶꦁꦱꦩꦁꦏꦼ꧈ꦲꦶꦁꦒꦶꦃꦩꦶꦠꦸꦫꦸꦠ꧀ꦏꦱꦒꦼꦢ꧀ꦢꦤ꧀ꦠꦸꦮꦶꦤ꧀ꦏꦧꦸꦢꦪꦤ꧀ꦤꦶꦥꦸꦤ꧀꧉ꦲꦤꦔꦶꦁꦥꦸꦤꦥꦲꦶꦁꦏꦁꦢꦶꦥꦸꦤ꧀ꦱꦸꦩꦼꦉꦥ꧀ꦥꦶꦢꦼꦤꦶꦁꦠꦸꦮꦤ꧀ Baars ꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦫꦸꦱ꧀꧈ꦥꦸꦤꦶꦏꦠꦼꦠꦼꦭꦢꦼꦢꦼꦩꦂꦒꦶꦤꦶꦥꦸꦤ꧀ꦠꦸꦩꦿꦥ꧀ꦠꦶꦠꦶꦪꦁꦲꦶꦤ꧀ꦢꦶꦪꦩꦸꦫꦶꦃꦱꦒꦼꦢ꧀ꦢꦶꦥꦸꦤ꧀ꦏꦭꦩ꧀ꦥꦃꦲꦤ꧀ꦥꦸꦤꦥꦲꦶꦁꦏꦁꦏꦱꦼꦢꦾꦏ꧀ꦲꦏꦼꦤ꧀꧉ꦩꦼꦁꦒꦃꦱꦼꦢꦾꦤꦶꦥꦸꦤ꧀ꦠꦸꦮꦤ꧀ Baars ꦲꦔ꧀ꦭꦲꦶꦂꦫꦏꦼꦤ꧀ꦥꦩꦁꦒꦶꦃꦲꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦤꦒꦤꦒꦫꦶꦫꦸꦱ꧀ꦲꦶꦁꦱꦼꦫꦠ꧀ꦏꦧꦂꦥꦸꦤꦶꦏ꧈ꦱꦸꦥꦢꦺꦴꦱ꧀ꦠꦶꦠꦶꦪꦁꦥꦿꦶꦧꦸꦩꦶꦱꦩꦶꦤꦼꦧꦶꦃꦲꦤꦝꦠꦼꦁꦠꦶꦤ꧀ꦢꦏ꧀ꦲꦶꦁꦏꦁꦧꦺꦴꦠꦼꦤ꧀ꦲꦢꦩꦼꦭ꧀ꦏꦩꦂꦢꦶꦏꦤ꧀ꦱꦲꦩꦭꦶꦃꦱꦲꦼꦤꦶꦁꦥꦁꦒꦼꦱꦁꦔꦤ꧀ꦤꦶꦥꦸꦤ꧀꧈ꦲꦤꦔꦶꦁꦩꦤꦮꦶꦱꦼꦢꦾꦤꦶꦥꦸꦤ꧀ꦮꦲꦸꦱꦒꦼꦢ꧀ꦏꦶꦤꦧꦸꦭ꧀ꦭꦏꦼꦤ꧀꧈ꦠꦤ꧀ꦱꦃꦧꦝꦼꦏꦼꦢꦸꦮꦸꦁꦲꦶꦁꦱꦭꦩꦶꦭꦩꦶꦤꦶꦥꦸꦤ꧀꧉
꧋ꦠꦸꦮꦤ꧀ Baars ꦲꦚꦫꦶꦪꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦱꦼꦢꦾꦤꦶꦥꦸꦤ꧀ꦮꦲꦸꦧꦺꦴꦠꦼꦤ꧀ꦧꦝꦼꦲꦔꦫꦁꦧꦸꦏꦸꦧꦧ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦤꦒꦫꦶꦫꦸꦱ꧀꧈ꦲꦶꦁꦏꦁꦧꦝꦼꦏꦕꦫꦶꦪꦺꦴꦱ꧀ꦱꦏꦼꦤ꧀ꦮꦲꦸꦢꦼꦢꦼꦧꦫꦁꦮꦢꦺꦴꦱ꧀꧈ꦲꦤꦔꦶꦁꦥꦮꦂꦠꦺꦴꦱ꧀ꦥꦮꦂꦠꦺꦴꦱ꧀ꦥꦩꦉꦤ꧀ꦠꦃꦱꦺꦴꦥ꦳ꦾꦺꦠ꧀ꦲꦶꦁꦱꦧꦼꦤ꧀ꦢꦶꦤ꧀ꦠꦼꦤ꧀ꦲꦶꦁꦏꦁꦏꦥꦕꦏ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦏꦺꦴꦩ꧀ꦩꦸꦤꦶꦱ꧀꧉ꦩꦼꦁꦒꦃꦲꦶꦁꦏꦁꦧꦝꦼꦏꦕꦫꦶꦪꦺꦴꦱ꧀ꦱꦏꦼꦤ꧀ꦩꦶꦠꦸꦫꦸꦠ꧀ꦥꦩꦁꦒꦶꦃꦲꦶꦥꦸꦤ꧀ꦥꦶꦪꦩ꧀ꦧꦏ꧀꧈ꦥꦸꦤꦶꦏꦥꦶꦏꦗꦼꦁꦔꦶꦥꦸꦤ꧀ꦤꦩꦸꦁꦧꦝꦼꦲꦢꦩꦼꦭ꧀ꦱꦲꦼꦠꦼꦠꦼꦩ꧀ꦧꦸꦁꦔꦤ꧀ꦤꦶꦁꦥꦮꦂꦠꦺꦴꦱ꧀ꦥꦮꦂꦠꦺꦴꦱ꧀ꦮꦲꦸ꧈ꦲꦶꦁꦏꦁꦱꦗꦠꦺꦴꦱ꧀ꦱꦶꦥꦸꦤ꧀ꦧꦺꦴꦠꦼꦤ꧀ꦲꦤꦼꦁꦱꦼꦩ꧀ꦩꦏꦼꦤ꧀꧉ꦠꦸꦮꦤ꧀ Baars ꦠꦤ꧀ꦱꦃꦲꦩꦸꦩꦸꦗꦶ꧈ꦩꦸꦒꦶꦩꦸꦒꦶꦥꦚꦼꦫꦠ꧀ꦠꦶꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦲꦶꦁꦤꦒꦫꦶꦫꦸꦱ꧀ꦲꦶꦁꦏꦁꦱꦗꦠꦶ꧈ꦏꦢꦺꦴꦱ꧀ꦢꦼꦤꦼꦲꦶꦁꦏꦁꦱꦩ꧀ꦥꦸꦤ꧀ꦢꦶꦥꦸꦤ꧀ꦱꦸꦩꦼꦉꦥ꧀ꦥꦶꦲꦶꦁꦠꦶꦪꦁꦲꦶꦁꦏꦁꦱꦩ꧀ꦥꦸꦤ꧀ꦩꦁꦒꦺꦤ꧀ꦭꦩꦶꦲꦶꦁꦔꦿꦶꦏ꧈ꦱꦒꦼꦢ꧀ꦢꦲꦩꦿꦤꦤ꧀ꦤꦶꦝꦠꦼꦁꦠꦶꦠꦶꦪꦁ꧈ꦲꦶꦁꦏꦁꦏꦤ꧀ꦛꦶꦒꦽꦁꦱꦼꦁꦔꦶꦁꦩꦤꦃꦱꦩꦶꦥꦶꦠꦢꦺꦴꦱ꧀ꦝꦠꦼꦁꦱꦲꦼꦱꦲꦊꦉꦱ꧀ꦱꦶꦁꦥꦿꦤꦠꦤ꧀ꦥꦿꦤꦠꦤ꧀ꦏꦺꦴꦩ꧀ꦩꦸꦤꦶꦱ꧀ꦲꦶꦁꦤꦒꦫꦶꦫꦸꦱ꧀꧈ꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦗꦮꦶꦏꦱꦺꦴꦫꦃꦲꦏꦼꦤ꧀ꦱꦏ꧀ꦭꦁꦏꦸꦁꦱꦲꦼꦭꦤ꧀ꦲꦤꦼꦁꦱꦼꦩ꧀ꦩꦏꦼꦤ꧀ꦮꦲꦸ꧉ꦲꦶꦁꦔꦿꦶꦏꦸꦠꦸꦮꦤ꧀ Baars ꦧꦺꦴꦠꦼꦤ꧀ꦱꦸꦩꦼꦢꦾꦲꦔꦤ꧀ꦝꦂꦫꦏꦼꦤ꧀꧈ꦥꦸꦤꦥꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦥꦩ꧀ꦧꦿꦺꦴꦤ꧀ꦠꦏ꧀ꦏꦤ꧀ꦲꦶꦁꦤꦒꦫꦶꦫꦸꦱ꧀ꦥꦸꦤꦶꦏꦲꦢꦶꦭ꧀꧈ꦲꦸꦠꦮꦶꦩꦭꦶꦃꦥꦸꦤꦥꦲꦶꦁꦏꦁꦲꦔꦸꦮꦲꦺꦴꦱ꧀ꦱꦶꦥꦿꦗꦲꦶꦁꦱꦩꦁꦏꦼꦥꦸꦤꦶꦏꦱꦩ꧀ꦥꦸꦤ꧀ꦩꦼꦱ꧀ꦛꦶꦤꦶꦥꦸꦤ꧀꧈ꦗꦭꦂꦫꦤ꧀ꦲꦶꦁꦏꦁꦩꦏꦠꦼꦤ꧀ꦮꦲꦸꦥꦿꦏꦮꦶꦱ꧀ꦱꦶꦥꦸꦤ꧀ꦥꦫꦏꦮꦸꦭꦲꦶꦁꦤꦒꦫꦶꦫꦸꦱ꧀ꦥꦶꦪꦩ꧀ꦧꦏ꧀꧉ꦩꦏꦠꦼꦤ꧀ꦲꦸꦒꦶꦠꦸꦮꦤ꧀ Baars ꦧꦺꦴꦠꦼꦤ꧀ꦧꦝꦼꦲꦔꦤ꧀ꦝꦂꦫꦏꦼꦤ꧀ꦏꦢꦺꦴꦱ꧀ꦢꦼꦤꦼꦕꦫꦤꦶꦁꦧꦧꦺꦴꦁꦱꦏꦺꦴꦩ꧀ꦩꦸꦤꦶꦱ꧀꧈ꦲꦶꦁꦒꦶꦃꦥꦸꦤꦶꦏꦲꦩ꧀ꦧꦸꦢꦶꦢꦪꦩꦸꦫꦶꦃꦱꦢꦪꦧꦺꦴꦁꦱꦥꦸꦤꦶꦏꦥꦸꦫꦸꦤ꧀ꦤꦩꦶꦠꦸꦫꦸꦠ꧀ꦥꦸꦤꦥꦲꦶꦁꦏꦁꦢꦶꦥꦸꦤ꧀ꦏꦗꦼꦁꦔꦏꦼꦤ꧀꧈ꦲꦶꦁꦩꦿꦶꦏꦶꦤꦩꦸꦁꦧꦝꦼꦚꦫꦶꦪꦺꦴꦱ꧀ꦱꦏꦼꦤ꧀꧈ꦥꦸꦤꦥꦤꦒꦫꦶꦫꦸꦱ꧀ꦭꦤ꧀ꦥꦿꦤꦠꦤ꧀ꦤꦶꦥꦸꦤ꧀ꦲꦔꦗꦼꦁꦔꦏꦼꦤ꧀ꦏꦮꦸꦭꦥꦸꦤꦶꦏꦥꦤ꧀ꦠꦼꦱ꧀ꦏꦠꦶꦫꦸꦢꦼꦤꦶꦁꦏꦮꦸꦭꦆꦤ꧀ꦝꦺꦴꦤꦼꦱꦶꦪꦃꦔꦿꦶꦏꦶ꧉
