ꦪꦃ꧈ꦲꦶꦁꦒꦶꦃꦥꦸꦤꦶꦏꦥꦫꦮꦂꦒꦤꦶꦁ Perhimpoenan Indonesia ꦪꦃ꧈ꦲꦶꦁꦒꦶꦃꦥꦸꦤꦶꦏꦥꦫꦮꦂꦒꦤꦶꦁꦦꦺꦂꦲꦶꦩ꧀ꦥꦺꦴꦮꦺꦤꦤ꧀ꦆꦤ꧀ꦢꦺꦴꦤꦺꦱꦶꦪꦲꦶꦁꦤꦒꦫꦶꦮꦭꦤ꧀ꦢꦶ꧈ꦢꦶꦥꦸꦤ꧀ꦲꦸꦫꦸꦱ꧀ꦥꦿꦏꦮꦶꦱ꧀ꦱꦶꦥꦸꦤ꧀꧉ꦧꦧ꧀ꦥꦸꦤꦶꦏꦥꦿꦪꦺꦴꦒꦶꦱꦩ꧀ꦥꦸꦤ꧀ꦏꦉꦩ꧀ꦧꦒ꧀ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦶꦫꦸꦩꦶꦪꦶꦤ꧀꧉ꦢꦺꦤꦺꦩꦤꦮꦶꦥꦔꦢꦶꦭ꧀ꦭꦤ꧀ꦪꦸꦱ꧀ꦠꦶꦱꦶꦱꦩ꧀ꦥꦸꦤ꧀ꦫꦩ꧀ꦥꦸꦁꦥꦩꦿꦶꦏ꧀ꦱꦤ꧀ꦤꦶꦥꦸꦤ꧀꧈ꦲꦶꦁꦏꦁꦮꦶꦕꦏ꧀ꦱꦟꦱꦒꦃꦲꦩꦁꦒꦭꦶꦃ꧈ꦱꦸꦥꦢꦺꦴꦱ꧀ꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦁꦥꦥꦿꦶꦏ꧀ꦱꦤ꧀ꦮꦲꦸꦏꦒꦶꦪꦂꦫꦏꦼꦤ꧀꧉
꧋ꦕꦕꦃꦲꦶꦁꦭꦶꦢ꧀ꦥꦺꦴꦊꦏ꧀ꦱꦿꦢ꧀ꦥꦿꦶꦧꦸꦩꦶꦭꦁꦏꦸꦁꦏꦛꦃ꧉ꦲꦭꦁꦔꦤ꧀ꦲꦭꦁꦔꦤ꧀ꦠꦸꦩꦿꦥ꧀ꦥꦿꦤꦠꦤ꧀ꦤꦶꦁꦦꦥꦿꦺꦤ꧀ꦠꦲꦤ꧀ꦲꦶꦤ꧀ꦢꦶꦪ꧈ꦧꦧ꧀ꦧꦝꦺꦲꦺꦮꦃꦲꦶꦥꦸꦤ꧀ꦥꦺꦴꦊꦏ꧀ꦱꦿꦢ꧀꧈ꦱꦩꦁꦏꦺꦱꦮꦼꦒ꧀ꦏꦠꦶꦠꦶꦥꦿꦶꦏ꧀ꦱ꧉
꧋ꦏꦶꦏꦶꦫꦁꦔꦤ꧀ꦤꦶꦥꦸꦤ꧀ꦄꦩ꧀ꦠꦼꦤꦂꦥꦔꦿꦺꦃꦥꦿꦗ꧉ꦧꦧ꧀ꦥꦸꦤꦶꦏꦥꦚ꧀ꦕꦺꦤ꧀ꦔꦸꦮꦠꦺꦴꦱ꧀ꦱꦏꦼꦤ꧀꧉ꦩꦶꦠꦸꦫꦸꦠ꧀ꦥꦔꦤ꧀ꦢꦶꦏꦢꦊꦩ꧀ꦲꦶꦁꦏꦁꦮꦶꦕꦏ꧀ꦱꦟ꧈ꦩꦶꦭꦲꦶꦁꦒꦶꦃꦮꦺꦴꦤ꧀ꦠꦼꦤ꧀ꦊꦉꦱ꧀ꦱꦶꦥꦸꦤ꧀꧈ꦲꦤꦔꦶꦁꦏꦏꦶꦫꦁꦔꦤ꧀ꦤꦶꦥꦸꦤ꧀ꦮꦲꦸꦤꦩꦸꦁꦠꦸꦩꦿꦥ꧀ꦄꦩ꧀ꦠꦼꦤꦂꦄꦩ꧀ꦠꦼꦤꦂꦲꦶꦁꦏꦁꦱꦩ꧀ꦥꦸꦤ꧀ꦥꦲꦩ꧀ꦝꦠꦼꦁꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀꧉ꦱꦩꦁꦏꦺꦱꦮꦼꦒ꧀ꦏꦉꦩ꧀ꦧꦒ꧀ꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦿꦤꦠꦤ꧀꧈ꦏꦢꦺꦴꦱ꧀ꦥꦸꦤ꧀ꦢꦶꦏꦢꦢꦺꦴꦱ꧀ꦱꦤ꧀ꦤꦶꦥꦸꦤ꧀ꦲꦶꦁꦠꦼꦩ꧀ꦧꦺꦱꦒꦼꦢ꧀ꦏꦱꦸꦩꦼꦉꦥ꧀ꦥꦤ꧀꧉
꧋ꦥꦭꦥꦸꦂꦫꦤ꧀ꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦁꦥꦥꦿꦶꦏ꧀ꦱꦤ꧀ꦲꦶꦁꦨꦤ꧀ꦠꦼꦤ꧀꧉ꦧꦧ꧀ꦥꦸꦤꦶꦏꦧꦺꦴꦠꦼꦤ꧀ꦮꦠꦮꦶꦱ꧀ꦢꦔꦸꦱꦒꦼꦢ꧀ꦏꦒꦶꦪꦂꦫꦏꦼꦤ꧀꧈ꦱꦩꦁꦏꦺꦏꦤ꧀ꦠꦸꦤ꧀ꦔꦼꦤ꧀ꦠꦺꦴꦱ꧀ꦱꦶꦄꦢ꧀ꦥꦶꦱ꧀ꦱꦶꦥꦸꦤ꧀ꦥꦢꦸꦏꦠꦸꦮꦤ꧀ꦒꦸꦥꦽꦤꦸꦂꦗꦮꦶꦏꦶꦭꦺꦤ꧀꧉ꦱꦠꦸꦁꦒꦭ꧀ꦱꦠꦸꦁꦒꦭ꧀ꦭꦶꦁꦥꦸꦂꦱ꧀ꦠꦺꦭ꧀ꦲꦶꦁꦏꦁꦏꦮꦿꦠ꧀ꦲꦶꦁꦱꦼꦫꦠ꧀ꦥꦭꦥꦸꦂꦫꦤ꧀ꦮꦲꦸ꧈ꦢꦶꦥꦸꦤ꧀ꦠꦶꦠꦶꦥꦿꦶꦏ꧀ꦱꦥꦶꦪꦩ꧀ꦧꦏ꧀ꦥꦶꦪꦩ꧀ꦧꦏ꧀꧈ꦱꦊꦧꦼꦠ꧀ꦠꦶꦥꦸꦤ꧀ꦤꦶꦠꦶꦥꦿꦶꦏ꧀ꦱꦮꦲꦸꦲꦶꦁꦒꦶꦃꦭꦗꦼꦁꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦿꦤꦠꦤ꧀ꦥꦿꦤꦠꦤ꧀ꦱꦮꦠꦮꦶꦱ꧀꧉ꦧꦧ꧀ꦧꦧ꧀ꦲꦶꦁꦏꦁꦥꦽꦭꦸꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀꧈ꦱꦩꦁꦏꦺꦱꦮꦼꦒ꧀ꦢꦶꦥꦸꦤ꧀ꦠꦶꦠꦶꦥꦿꦶꦏ꧀ꦱꦢꦺꦤꦶꦁꦝꦺꦥꦂꦠꦼꦩꦺꦤ꧀ꦲꦶꦁꦏꦁꦏꦮꦗꦶꦧ꧀ꦧꦤ꧀ꦥꦸꦤꦶꦏ꧉
꧋ꦧꦧ꧀ꦲꦺꦮꦃꦲꦺꦮꦃꦲꦤꦶꦁꦥꦿꦤꦠꦤ꧀ꦒꦸꦫꦸ꧉ꦧꦧ꧀ꦥꦸꦤꦶꦏꦧꦝꦺꦠꦸꦩꦸꦤ꧀ꦠꦼꦤ꧀ꦏꦲꦼꦕꦏ꧀ꦏꦏꦼꦤ꧀꧈ꦏꦤ꧀ꦛꦶꦏꦠꦿꦁꦔꦤ꧀ꦏꦠꦿꦁꦔꦤ꧀ꦲꦶꦁꦏꦁꦕꦼꦏꦥ꧀꧈ꦱꦩ꧀ꦥꦸꦤ꧀ꦏꦠꦼꦠꦼꦥ꧀ꦥꦏꦼꦤ꧀ꦥꦿꦤꦠꦤ꧀ꦥꦿꦤꦠꦤ꧀ꦠꦸꦩꦿꦥ꧀ꦧꦧ꧀ꦱꦭꦏꦶꦫꦧꦶꦏꦼꦭꦫꦺꦤꦼꦤ꧀꧈ꦧꦧ꧀ꦤꦶꦁꦏꦃꦲꦤ꧀꧈ꦧꦧ꧀ꦏꦱ꧀ꦩꦼꦱ꧀ꦗꦶꦢ꧀꧈ꦭꦤ꧀ꦱꦥꦤꦸꦁꦒꦶꦭ꧀ꦭꦤ꧀ꦤꦶꦥꦸꦤ꧀꧈ꦲꦶꦁꦏꦁꦱꦸꦮꦲꦸꦤꦶꦥꦸꦤ꧀ꦢꦢꦺꦴꦱ꧀ꦥꦿꦢꦺꦴꦤ꧀ꦢꦶꦤꦶꦥꦸꦤ꧀ꦥꦫꦏꦲꦸꦩ꧀ꦩꦸꦱ꧀ꦭꦶꦩꦶꦤ꧀꧉ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦥꦿꦤꦠꦤ꧀ꦥꦸꦤꦶꦏꦧꦺꦴꦠꦼꦤ꧀ꦗꦭꦂꦫꦤ꧀ꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦄꦢ꧀ꦥꦶꦱꦸꦂ Inl. Zaken ꦲꦢꦩꦼꦭ꧀ꦏꦺꦴꦤ꧀ꦥꦼꦫꦺꦤ꧀ꦱꦶꦏꦭꦶꦪꦤ꧀ꦥꦫꦥꦔꦚ꧀ꦗꦸꦂꦫꦶꦁꦥꦏꦼꦩ꧀ꦥꦭ꧀ꦭꦤ꧀ꦧꦺꦴꦁꦱꦩꦸꦱ꧀ꦭꦶꦩ꧀꧉ꦢꦺꦤꦺꦲꦶꦁꦏꦁꦢꦶꦥꦸꦤ꧀ꦏꦗꦼꦁꦔꦏꦼꦤ꧀ꦏꦺꦴꦤ꧀ꦥꦼꦫꦺꦤ꧀ꦱꦶꦮꦲꦸ꧈ꦤꦩꦸꦁꦱꦒꦼꦢ꧀ꦢꦲꦁꦱꦭ꧀ꦮꦮꦱ꧀ꦱꦤ꧀ꦱꦠꦸꦁꦒꦭ꧀ꦭꦤ꧀ꦱꦠꦸꦁꦒꦭ꧀ꦭꦶꦥꦸꦤ꧀꧉
꧋ꦥꦤ꧀ꦢꦩꦼꦭ꧀ꦭꦶꦥꦸꦤ꧀ꦱꦼꦫꦠ꧀ꦏꦧꦂꦲꦶꦁꦏꦁꦲꦩ꧀ꦧꦼꦧꦪꦤ꧀ꦤꦶ꧉ꦲꦺꦮꦃꦲꦺꦮꦃꦲꦤ꧀ꦧꦧ꧀ꦲꦁꦒꦼꦂꦏꦸꦏꦸꦩ꧀꧈ꦲꦶꦁꦏꦁꦱꦼꦢꦾꦤꦶꦥꦸꦤ꧀ꦱꦸꦥꦢꦺꦴꦱ꧀ꦲꦔꦶꦤ꧀ꦝꦑꦏꦼꦤ꧀ꦝꦠꦼꦁꦠꦶꦤ꧀ꦢꦏ꧀ꦏꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦲꦶꦁꦏꦁꦲꦩ꧀ꦧꦼꦧꦪꦤ꧀ꦤꦶ꧈ꦱꦩꦁꦏꦺꦱꦮꦼꦒ꧀ꦢꦶꦥꦸꦤ꧀ꦠꦭꦶꦠꦶꦢꦺꦤꦶꦁꦥꦺꦴꦏꦿꦸꦭ꧀ꦗꦺꦤ꧀ꦝꦿꦭ꧀꧉ꦦꦩꦫꦺꦤ꧀ꦠꦃꦱꦩꦁꦏꦺꦱꦮꦼꦒ꧀ꦲꦔꦼꦤ꧀ꦠꦺꦴꦱ꧀ꦱꦶꦏꦠꦿꦁꦔꦤ꧀ꦥꦶꦏꦤ꧀ꦠꦸꦏ꧀ꦏꦶꦁꦥꦺꦉꦱ꧀ꦏꦺꦴꦤ꧀ꦥꦼꦫꦺꦤ꧀ꦱꦶꦱꦢꦸꦚꦲꦶꦁꦯꦼꦤꦺꦥꦼ (Geneve)꧈ꦩꦸꦫꦶꦃꦱꦒꦼꦢ꧀ꦲꦔꦺꦮꦃꦲꦶꦲꦁꦒꦼꦂꦮꦼꦮꦼꦤꦁꦔꦶꦥꦸꦤ꧀ꦥꦫꦗꦸꦫꦸꦔꦫꦁ꧈ꦥꦽꦭꦸꦤꦶꦥꦸꦤ꧀ꦱꦒꦼꦢ꧀ꦢꦲꦔꦪꦺꦴꦩ꧀ꦩꦶꦝꦠꦼꦁꦥꦮꦂꦠꦺꦴꦱ꧀ꦥꦮꦂꦠꦺꦴꦱ꧀ꦲꦶꦁꦱꦼꦫꦠ꧀ꦱꦼꦫꦠ꧀ꦏꦧꦂ꧉
