KRONIEK
꧋ꦏꦧꦂꦮꦂꦤꦶꦮꦂꦤꦶ
꧋ꦥꦼꦛꦶꦏ꧀ꦏꦤ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦱꦤꦺꦱ꧀꧈
꧋ꦱꦼꦫꦠ꧀ꦏꦧꦂꦢꦂꦩꦏꦺꦴꦤ꧀ꦝꦩꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦠꦸꦮꦤ꧀ꦯꦸꦧꦾꦂꦠ꧈ꦲꦤꦏ꧀ꦏꦶꦥꦸꦤ꧀ꦩꦱ꧀ꦔꦧꦺꦲꦶꦮꦶꦫꦯꦸꦩꦂꦱ꧈ꦲꦧ꧀ꦢꦶꦢꦊꦩ꧀ꦩꦤ꧀ꦠꦿꦶꦏꦢꦶꦥꦠꦺꦤ꧀ꦲꦤꦺꦴꦩ꧀ꦲꦶꦁꦯꦸꦫꦏꦂꦠ꧈ꦲꦶꦁꦏꦁꦱꦶꦤꦲꦸꦮꦺꦴꦤ꧀ꦠꦼꦤ꧀ꦥꦩꦸꦭꦁꦔꦤ꧀ꦲꦶꦁꦒꦶꦭ꧀ꦠꦠꦤꦺꦤ꧀ꦲꦶꦁꦮꦒꦼꦤꦶꦁꦔꦼꦤ꧀꧈ꦤꦒꦫꦶꦮꦭꦤ꧀ꦢꦶ꧈ꦩꦼꦤ꧀ꦠꦱ꧀ꦥꦸꦠꦸꦱ꧀ꦌꦏ꧀ꦱꦩꦼꦤ꧀ꦤꦶꦥꦸꦤ꧀ꦥꦸꦁꦏꦱ꧀ꦱꦤ꧀꧈ꦱꦂꦠꦲꦁꦱꦭ꧀ꦱꦱꦼꦧꦸꦠ꧀ꦠꦤ꧀꧇ꦆꦤ꧀ꦱꦶꦚꦸꦂꦠꦠꦤꦺꦤ꧀꧉
꧋ꦱꦼꦫꦠ꧀ꦏꦧꦂꦯꦼꦢꦾꦠꦩꦩꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦆꦤ꧀ꦠꦼꦂꦤꦠ꧀ꦧꦸꦢꦶꦲꦸꦠꦩꦲꦶꦁꦔꦪꦺꦴꦓꦾꦏꦂꦠ꧈ꦱꦩ꧀ꦥꦸꦤ꧀ꦏꦲꦶꦢꦺꦤ꧀ꦲꦶꦁꦓꦸꦥꦽꦩꦺꦤ꧀꧈ꦏꦮꦿꦠ꧀ꦏꦏꦚ꧀ꦕꦶꦁꦔꦤ꧀ꦠꦁꦒꦭ꧀ 14 ꦎꦏ꧀ꦠꦺꦴꦧꦼꦂ 1927 ꦎꦁꦏ 26꧉
꧋ꦗꦭꦂꦫꦤ꧀ꦧꦝꦺꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦥꦉꦥꦠ꧀ꦠꦤ꧀ꦏꦧꦁꦱꦤ꧀ꦲꦶꦁꦨꦤ꧀ꦝꦸꦁꦧꦺꦚ꧀ꦗꦶꦁꦮꦸꦭꦤ꧀ꦝꦺꦱꦺꦩ꧀ꦧꦼꦂꦲꦶꦁꦔꦗꦼꦁꦥꦸꦤꦶꦏ꧈ꦥꦔꦿꦺꦃ P.S.I. ꦒꦿꦸꦥ꧀ꦔꦪꦺꦴꦓꦾꦏꦂꦠ꧈ꦤꦼꦝꦱꦸꦥꦢꦺꦴꦱ꧀ꦲꦁꦒꦺꦤ꧀ꦤꦶꦥꦸꦤ꧀ꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦉꦥꦠ꧀ꦠꦤ꧀ꦮꦲꦸꦏꦥꦶꦤ꧀ꦝꦃꦝꦠꦼꦁꦔꦪꦺꦴꦓꦾ꧈ꦩꦶꦠꦸꦫꦸꦠ꧀ꦥꦮꦂꦠꦺꦴꦱ꧀ꦱꦼꦢꦾꦠꦩ꧈ꦥꦤꦼꦝꦤ꧀ꦤꦶꦥꦸꦤ꧀ꦥꦔꦿꦺꦃ P.S.I. ꦲꦶꦁꦔꦪꦺꦴꦓꦾꦧꦺꦴꦠꦼꦤ꧀ꦏꦕꦺꦴꦤ꧀ꦝꦺꦴꦁꦔꦤ꧀꧈ꦲꦮꦶꦠ꧀ꦥꦉꦥꦠ꧀ꦠꦤ꧀ꦲꦶꦁꦨꦤ꧀ꦝꦸꦁꦥꦸꦤꦶꦏꦥꦽꦭꦸꦤꦶꦥꦸꦤ꧀ꦲꦚꦼꦭꦏ꧀ꦏꦶꦭꦶꦢ꧀ꦭꦶꦢ꧀ꦥꦺꦴꦊꦏ꧀ꦱꦿꦢ꧀꧈ꦱꦂꦠꦧꦺꦴꦁꦱꦆꦤ꧀ꦠꦼꦭꦺꦏ꧀ꦏꦛꦃꦲꦶꦁꦨꦤ꧀ꦝꦸꦁ꧈ꦢꦢꦺꦴꦱ꧀ꦲꦸꦥꦩꦶꦮꦺꦴꦤ꧀ꦠꦼꦤ꧀ꦲꦶꦁꦔꦪꦺꦴꦓꦾꦏꦛꦃꦏꦮꦿꦠ꧀ꦠꦤ꧀ꦤꦶꦥꦸꦤ꧀꧉
꧋ꦩꦶꦠꦸꦫꦸꦠ꧀ꦮꦫꦮꦫ꧈ꦮꦶꦮꦶꦠ꧀ꦎꦏ꧀ꦠꦺꦴꦧꦼꦂꦥꦸꦤꦶꦏꦠꦶꦪꦁꦲꦶꦁꦏꦁꦧꦝꦺꦤꦸꦩ꧀ꦥꦏ꧀ꦱꦼꦥꦸꦂꦏ꧀ꦭꦱ꧀ I ꦲꦸꦠꦮꦶꦏ꧀ꦭꦱ꧀ II ꦱꦩꦶꦏꦺꦔꦶꦁꦩꦼꦭꦶꦁꦥꦥꦤ꧀ꦫꦸꦩꦶꦪꦶꦤ꧀꧉ꦩꦸꦫꦶꦃꦩꦼꦱ꧀ꦛꦶꦲꦁꦱꦭ꧀ꦭꦶꦥꦸꦤ꧀ꦥꦥꦤ꧀ꦲꦶꦁꦏꦁꦭꦁꦏꦸꦁꦱꦏꦺꦕ꧈ꦢꦸꦩꦸꦒꦶꦠꦼꦔꦃꦲꦤ꧀ꦤꦶꦥꦸꦤ꧀ꦮꦸꦭꦤ꧀ꦥꦸꦤꦶꦏ꧈ꦠꦸꦩꦿꦥ꧀ꦥꦶꦥꦸꦤ꧀ꦩꦂꦒꦶꦱꦼꦥꦸꦂꦲꦶꦁꦏꦁꦱꦶꦱꦶꦃꦏꦶꦭꦺꦤ꧀꧈ꦲꦶꦁꦏꦁꦱꦩꦶꦩꦼꦭꦶꦁꦥꦥꦤ꧀ꦫꦸꦩꦶꦪꦶꦤ꧀꧈ꦲꦶꦁꦏ꧀ꦭꦱ꧀ I - 100꧈ꦲꦶꦁꦏꦁꦏ꧀ꦭꦱ꧀ II - 232꧉
꧋ꦲꦶꦁꦡꦸꦒꦸ꧈ꦔꦪꦺꦴꦓꦾꦏꦂꦠꦮꦺꦴꦤ꧀ꦠꦼꦤ꧀ꦥꦏꦼꦩ꧀ꦥꦭ꧀ꦭꦤ꧀ꦏꦼꦛꦺꦴꦥꦿꦏ꧀ꦧꦺꦴꦁꦱꦡꦶꦪꦺꦴꦁꦲ꧀ꦮ꧈ꦲꦶꦁꦏꦁꦤꦩꦏꦿꦶꦝꦤꦶꦁꦕꦶꦥ꧀ꦠꦏꦮꦼꦝꦂ꧈ꦏꦧꦂꦫꦶꦥꦸꦤ꧀ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦮꦼꦏꦱ꧀ꦱꦤ꧀ꦤꦶꦁꦮꦸꦭꦤ꧀ꦎꦏ꧀ꦠꦺꦴꦧꦼꦂꦥꦸꦤꦶꦏ꧈ꦥꦏꦼꦩ꧀ꦥꦭ꧀ꦭꦤ꧀ꦮꦲꦸꦧꦝꦺꦢꦩꦼꦭ꧀ꦠꦶꦠꦶꦔꦭ꧀ꦭꦤ꧀ꦢꦂꦩꦮꦺꦴꦤ꧀ꦠꦼꦤ꧀ꦲꦶꦁꦒꦼꦝꦺꦴꦁꦏꦸꦩꦶꦝꦶꦓꦺꦴꦤ꧀ꦢꦩꦤꦤ꧀꧉ꦢꦺꦤꦺꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦥꦸꦤ꧀ꦉꦱꦶꦏ꧀ꦲꦶꦁꦏꦁ 40 ꦥꦽꦱꦺꦤ꧀ꦧꦝꦺꦏꦢꦂꦩꦏ꧀ꦲꦏꦼꦤ꧀ꦝꦠꦼꦁꦥꦩꦸꦭꦁꦔꦤ꧀ꦠꦶꦪꦺꦴꦁꦲ꧀ꦮꦃꦮꦺꦏ꧀ꦮꦤ꧀꧈ꦲꦶꦁꦏꦁ 40 ꦥꦽꦱꦺꦤ꧀ꦩꦭꦶꦃꦩꦊꦧꦼꦠ꧀ꦏꦱ꧀ꦱꦶꦥꦸꦤ꧀ꦥꦶꦪꦩ꧀ꦧꦏ꧀꧈ꦲꦶꦁꦏꦁ 20 ꦥꦽꦱꦺꦤ꧀ꦝꦠꦼꦁꦒꦿꦶꦪꦩꦶꦱ꧀ꦏꦶꦤ꧀ꦔꦪꦺꦴꦓꦾ꧉
꧋ꦮꦺꦴꦤ꧀ꦠꦼꦤ꧀ꦏꦧꦂ꧈ꦧꦶꦭꦶꦃꦥꦤ꧀ꦢꦩꦼꦭ꧀ꦭꦶꦥꦸꦤ꧀ꦥꦤ꧀ꦢꦔꦺꦴꦤ꧀ꦥꦔꦺꦴꦤꦤ꧀ꦏꦁꦒꦺꦗꦁꦏꦼꦥ꧀ꦥꦶꦥꦶꦫꦤ꧀ꦠꦺꦴꦱ꧀ꦱꦶꦥꦸꦤ꧀ꦲꦩ꧀ꦧꦸꦕꦭ꧀ꦝꦺꦴꦏ꧀ꦠꦼꦂꦕꦶꦥ꧀ꦠꦩꦔꦸꦤ꧀ꦏꦸꦱꦸꦩ꧇ꦱꦩ꧀ꦥꦸꦤ꧀ꦫꦩ꧀ꦥꦸꦁ꧈ꦱꦂꦠꦱꦩ꧀ꦥꦸꦤ꧀ꦏꦭꦢꦺꦴꦱ꧀ꦱꦏꦼꦤ꧀ꦝꦠꦼꦁꦫꦢ꧀ꦥꦤ꧀ꦲꦶꦤ꧀ꦢꦶ꧉ꦧꦝꦺꦏꦠꦶꦠꦶꦥꦿꦶꦏ꧀ꦱꦥꦽꦭꦸꦤꦶꦥꦸꦤ꧀ꦫꦸꦩꦶꦪꦶꦤ꧀꧉
꧋ꦩꦤꦮꦶꦲꦸꦱꦸꦭ꧀ꦱꦏꦶꦁꦥꦸꦭꦶꦱꦶꦨꦤ꧀ꦝꦸꦁ꧈ꦝꦺꦴꦏ꧀ꦠꦼꦂꦕꦶꦥ꧀ꦠꦱꦸꦥꦢꦺꦴꦱ꧀ꦏꦧꦸꦕꦭ꧀ꦭꦝꦠꦼꦁꦝꦶꦓꦸꦭ꧀꧈ꦤꦔꦶꦁꦦꦫꦺꦤ꧀ꦠꦃꦧꦺꦴꦠꦼꦤ꧀ꦚꦺꦴꦤ꧀ꦝꦺꦴꦁꦔꦶ꧉ꦝꦠꦼꦁꦥꦸꦤ꧀ꦢꦶꦝꦺꦴꦏ꧀ꦠꦼꦂꦕꦶꦥ꧀ꦠꦲꦁꦒꦺꦤ꧀ꦤꦶꦥꦸꦤ꧀ꦧꦝꦺꦏꦧꦸꦕꦭ꧀꧈ꦱꦩꦁꦏꦺꦢꦺꦫꦺꦁꦏꦱꦸꦩꦼꦉꦥ꧀ꦥꦤ꧀꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦥꦸꦤ꧀ꦪꦂꦩꦉꦏ꧀ꦲꦶꦁꦡꦼꦒꦭ꧀ꦱꦊꦧꦼꦠ꧀ꦠꦶꦥꦸꦤ꧀ꦒꦁꦱꦭ꧀ꦢꦶꦤ꧀ꦠꦼꦤ꧀ꦭꦁꦏꦸꦁ f 850,-꧈ꦠꦶꦤꦶꦩ꧀ꦧꦁꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦥꦸꦤ꧀ꦪꦂꦩꦉꦏ꧀ꦏꦭꦲꦶꦁꦠꦲꦸꦤ꧀ 1925꧉ꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦥꦸꦤ꧀ꦲꦶꦁꦠꦼꦔꦃꦠꦼꦔꦃꦲꦤ꧀ꦤꦶꦁꦪꦂꦩꦉꦏ꧀ꦏꦭꦲꦶꦁꦠꦲꦸꦤ꧀ 1925 ꦮꦺꦴꦤ꧀ꦠꦼꦤ꧀ f 8515.65꧈ꦲꦶꦁꦩꦺꦴꦁꦏꦲꦶꦁꦠꦼꦔꦃꦠꦼꦔꦃꦲꦤ꧀ꦤꦶꦁꦪꦂꦩꦉꦏ꧀ꦲꦶꦁꦠꦲꦸꦤ꧀ 1927 ꦮꦺꦴꦤ꧀ꦠꦼꦤ꧀ f 9378.06꧉
꧋ꦢꦺꦫꦺꦁꦢꦔꦸꦥꦸꦤꦶꦏꦥꦺꦭ꧀ꦥꦸꦭꦶꦱꦶꦲꦶꦁꦨꦽꦧꦼꦱ꧀ꦮꦺꦴꦤ꧀ꦠꦼꦤ꧀ꦲꦶꦁꦨꦭꦥꦸꦭꦁꦚꦼꦥꦼꦁꦠꦶꦭꦱ꧀ꦲꦸꦥ꧀ꦩꦤ꧀ꦝꦺꦴꦂꦒꦼꦮꦺꦱ꧀ꦠꦼꦊꦏꦼꦮꦺꦂꦏꦼꦤ꧀ꦲꦶꦁꦏꦁꦢꦺꦫꦺꦁꦮꦠꦮꦶꦱ꧀ꦭꦩꦶꦥꦸꦤꦶꦏꦩꦶꦫꦸꦢꦏꦤ꧀ꦛꦶꦲꦩ꧀ꦧꦼꦏ꧀ꦠꦲꦂꦠ f 1200,-꧈ꦲꦶꦁꦒꦶꦃꦥꦸꦤꦶꦏꦲꦂꦠꦥꦽꦭꦸꦏꦁꦒꦺꦲꦩ꧀ꦧꦪꦂꦫꦶꦏꦸꦭꦶ꧉
꧋Aneta ꦩꦂꦠꦺꦴꦱ꧀ꦱꦏꦼꦤ꧀ꦱꦏꦶꦁꦩꦺꦝꦤ꧀꧈ꦧꦶꦭꦶꦃꦥꦸꦭꦶꦱꦶꦉꦱꦺꦂꦱꦺꦮꦺꦴꦤ꧀ꦠꦼꦤ꧀ꦲꦶꦁꦧꦲꦶꦠꦏꦥꦭ꧀ Van Heutsz ꦲꦶꦁꦏꦁꦏꦭꦥꦸꦤꦶꦏꦭꦧꦸꦃꦮꦺꦴꦤ꧀ꦠꦼꦤ꧀ꦲꦶꦁꦥꦭꦧꦸꦃꦲꦤ꧀ꦧꦼꦭꦮꦤ꧀꧈ꦲꦔꦿꦩ꧀ꦥꦱ꧀ꦕꦤ꧀ꦢꦸꦥꦼꦠꦼꦁꦏꦛꦃꦲꦶꦥꦸꦤ꧀ 1200 ꦠꦲꦆꦭ꧀꧉
꧋Aneta ꦩꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦮꦺꦴꦤ꧀ꦠꦼꦤ꧀ꦲꦶꦁꦯꦸꦧꦁꦥꦸꦭꦶꦱꦶꦱꦩ꧀ꦥꦸꦤ꧀ꦚꦼꦥꦼꦁꦠꦶꦭꦱ꧀ꦥꦸꦁꦒꦮꦥꦒꦤ꧀ꦠꦺꦴꦱ꧀ꦱꦤ꧀ꦒꦸꦥꦽꦩꦺꦤ꧀ꦤꦩ꧇ꦩꦂꦡꦱꦼꦚ꧀ꦗꦪ꧈ꦲꦶꦁꦏꦁꦏꦊꦥꦠ꧀ꦠꦤ꧀ꦱꦩ꧀ꦥꦸꦤ꧀ꦲꦚꦭꦶꦁꦏꦸꦃꦲꦏꦼꦤ꧀ꦲꦂꦠꦒꦸꦥꦽꦩꦺꦤ꧀ꦏꦭꦲꦚꦩ꧀ꦧꦸꦠ꧀ꦢꦩꦼꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦒꦤ꧀ꦠꦺꦴꦱ꧀ꦱꦤ꧀ꦒꦸꦥꦽꦩꦺꦤ꧀ꦲꦶꦁꦨꦔꦶꦭ꧀꧈ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ 3 ꦠꦲꦸꦤ꧀ꦱꦥꦿꦶꦏꦶ꧉
꧋ꦢꦺꦫꦺꦁꦢꦔꦸꦥꦸꦤꦶꦏꦥꦸꦭꦶꦱꦶꦲꦶꦁꦨꦠꦮꦶꦚꦼꦥꦼꦁꦱꦠꦸꦁꦒꦶꦭ꧀ꦭꦶꦁꦠꦶꦪꦁꦡꦶꦪꦺꦴꦁꦲ꧀ꦮ꧈ꦲꦶꦁꦏꦁꦏꦊꦉꦱ꧀ꦔꦶꦁꦒꦃꦲꦏꦼꦤ꧀ꦱꦠꦸꦁꦒꦶꦭ꧀ꦭꦶꦁꦥꦼꦛꦶꦲꦶꦱꦶꦕꦤ꧀ꦢꦸꦥꦼꦠꦼꦁ 100 ꦠꦲꦆꦭ꧀꧉ꦕꦤ꧀ꦢꦸꦤꦶꦥꦸꦤ꧀ꦤꦸꦤ꧀ꦠꦼꦤ꧀ꦏꦫꦩ꧀ꦥꦱ꧀꧈ꦢꦺꦤꦺꦧꦺꦴꦁꦱꦡꦶꦪꦺꦴꦁꦲ꧀ꦮꦮꦲꦸꦭꦗꦼꦁꦏꦠꦲꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦏꦸꦚ꧀ꦗꦫꦤ꧀꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦲꦶꦁꦏꦁꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦄꦗꦸꦁꦠꦿꦤ꧀ꦱ꧀ꦭꦠꦸꦂꦲꦶꦁꦔꦪꦺꦴꦓꦾꦏꦂꦠ꧈ꦲꦁꦒꦼꦤ꧀ꦠꦺꦴꦱꦶꦫꦢꦺꦤ꧀ ꦯꦸꦗꦤꦡꦶꦂꦠꦏꦸꦱꦸꦩ꧈ꦲꦶꦁꦏꦁꦏꦮꦶꦱꦸꦝꦢꦢꦺꦴꦱ꧀ꦠꦿꦤ꧀ꦱ꧀ꦭꦠꦸꦂ꧈ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦱ꧀ꦧꦸꦠ꧀ꦲꦶꦁꦏꦗꦮꦺꦤ꧀ꦲꦶꦁꦏꦁꦫꦸꦩꦶꦪꦶꦤ꧀꧈ꦲꦶꦁꦒꦶꦃꦥꦸꦤꦶꦏ꧇ꦠꦸꦮꦤ꧀ ꦑꦸꦱ꧀ꦤꦤ꧀ ꦯꦱ꧀ꦠꦿꦢꦶꦥꦿꦗ꧈ꦲꦶꦁꦏꦁꦱꦸꦮꦲꦸꦭꦶꦂꦭꦶꦁꦠꦿꦤ꧀ꦱ꧀ꦭꦠꦸꦂ꧉
꧋ꦱꦏꦶꦁꦧꦸꦢꦶꦢꦪꦤꦶꦥꦸꦤ꧀ꦠꦸꦮꦤ꧀꧈ꦦꦂꦠꦲꦩꦶꦱꦺꦤ꧈ꦏꦺꦴꦩꦶꦱ꧀ꦧꦸꦮꦺꦤ꧀ꦲꦶꦁꦡꦁꦒꦼꦫꦁ꧈ꦏꦭꦩꦊꦩ꧀ꦱꦼꦭꦱꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦲꦶꦁꦏꦩꦂꦧꦺꦴꦭꦃꦡꦁꦒꦼꦫꦁꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦉꦥꦠ꧀ꦠꦤ꧀꧈ꦲꦶꦁꦏꦁꦱꦼꦢꦾꦤꦶꦥꦸꦤ꧀ꦲꦔꦽꦩ꧀ꦧꦒ꧀ꦧꦧ꧀ꦲꦢꦼꦒ꧀ꦒꦶꦥꦸꦤ꧀ꦥꦩꦸꦭꦁꦔꦤ꧀ H.I.S ꦱꦢꦪꦲꦶꦁꦏꦁꦱꦩꦶꦲꦚ꧀ꦗꦼꦤꦼꦁꦔꦶꦥꦉꦥꦠ꧀ꦠꦤ꧀ꦮꦲꦸ꧈ꦱꦩꦶꦲꦤꦺꦴꦕꦺꦴꦒ꧀ꦒꦶꦝꦠꦼꦁꦱꦼꦢꦾꦲꦶꦁꦏꦁꦱꦏ꧀ꦭꦁꦏꦸꦁꦲꦸꦠꦩꦶꦥꦸꦤꦶꦏ꧈ꦱꦂꦠꦱꦸꦩꦼꦢꦾꦚꦸꦮꦸꦤ꧀ꦢꦂꦩꦝꦠꦼꦁꦥꦸꦤ꧀ꦢꦶꦥꦸꦤ꧀ꦢꦶ꧈ꦩꦏꦠꦼꦤ꧀ꦲꦸꦒꦶꦦꦩꦫꦺꦤ꧀ꦠꦃꦱꦩ꧀ꦥꦸꦤ꧀ꦲꦔꦶꦢꦶꦤ꧀ꦤꦶꦥꦔꦶꦤ꧀ꦠꦸꦤ꧀ꦤꦶꦥꦸꦤ꧀ꦮꦫꦮꦫꦚꦸꦮꦸꦤ꧀ꦲꦂꦠꦢꦂꦩꦝꦠꦼꦁꦱꦏꦛꦃꦲꦶꦁꦎꦤ꧀ꦢꦼꦂꦝꦶꦱ꧀ꦠꦿꦶꦏ꧀꧉
