꧋ꦧꦺꦚ꧀ꦗꦶꦁꦱꦊꦧꦼꦠ꧀ꦠꦶꦥꦸꦤ꧀ꦮꦸꦭꦤ꧀ꦤꦺꦴꦥꦺꦩ꧀ꦧꦼꦂꦲꦶꦁꦔꦗꦼꦁꦥꦸꦤꦶꦏ꧈ꦲꦸꦥ꧀ꦧꦼꦱ꧀ꦠꦶꦂꦩꦸꦃꦲꦩ꧀ꦩꦢꦶꦪꦃꦧꦝꦺꦪꦱꦥꦩꦸꦭꦁꦔꦤ꧀ H.I.S. ꦮꦺꦴꦤ꧀ꦠꦼꦤ꧀ꦲꦶꦁꦮꦭꦶꦑꦸꦏꦸꦤ꧀꧈ꦱꦕꦼꦭꦏ꧀ꦏꦶꦥꦸꦤ꧀ꦏꦶꦛꦔꦮꦶꦲꦶꦁꦒꦶꦃꦥꦸꦤꦶꦏꦲꦔ꧀ꦭꦼꦏ꧀ꦱꦤꦤ꧀ꦤꦶꦥꦤꦼꦝꦤ꧀ꦤꦶꦥꦸꦤ꧀ꦠꦶꦠꦶꦪꦁꦔꦿꦶꦏꦸ꧉
꧋ꦱꦼꦫꦠ꧀ꦏꦧꦂ A.I.D. ꦩꦶꦉꦁꦥꦮꦂꦠꦺꦴꦱ꧀꧈ꦧꦶꦭꦶꦃꦲꦶꦁꦔꦪꦺꦴꦓꦾꦏꦂꦠꦧꦝꦺꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦆꦤ꧀ꦠꦼꦂꦤꦠ꧀ꦠꦸꦩꦿꦥ꧀ꦥꦫꦏꦼꦚꦢꦫꦃꦦꦏꦸꦄꦭꦩ꧀ꦩꦤ꧀꧉ꦩꦏ꧀ꦱꦸꦢ꧀ꦲꦶꦁꦏꦁꦩꦏꦠꦼꦤ꧀ꦮꦲꦸꦧꦝꦺꦏꦧꦤ꧀ꦠꦸꦢꦺꦤꦶꦁꦚꦺꦴꦚꦃ Van der Linde ꦲꦶꦁꦢꦼꦩꦏ꧀ꦲꦶꦗꦺꦴ꧉ꦲꦶꦁꦆꦤ꧀ꦠꦼꦂꦤꦠ꧀ꦥꦸꦤꦶꦏꦧꦝꦺꦏꦮꦸꦭꦁꦥꦚꦼꦥꦼꦁꦔꦶꦥꦸꦤ꧀ꦧꦭꦺꦒꦿꦶꦪ꧈ꦲꦶꦁꦏꦁꦏꦠꦩ꧀ꦥꦶꦲꦶꦁꦆꦤ꧀ꦠꦼꦂꦤꦠ꧀ꦥꦸꦤꦶꦏꦲꦶꦁꦏꦁꦏꦥꦼꦂꦭꦺꦴꦏ꧀ꦲꦏꦼꦤ꧀ꦫꦸꦩꦶꦪꦶꦤ꧀ꦥꦫꦏꦼꦚꦢꦫꦃꦦꦏꦸꦄꦭꦩ꧀ꦩꦤ꧀꧈ꦢꦺꦤꦺꦩꦤꦮꦶꦮꦺꦴꦤ꧀ꦠꦼꦤ꧀ꦥꦁꦒꦺꦤ꧀ꦤꦤ꧀ꦥꦫꦏꦼꦚꦱꦤꦺꦱ꧀ꦱꦶꦥꦸꦤ꧀ꦲꦸꦒꦶꦱꦒꦼꦢ꧀ꦏꦠꦩ꧀ꦥꦶ꧈ꦲꦤꦔꦶꦁꦲꦱꦺꦴꦂꦲꦱꦺꦴꦂꦫꦶꦥꦸꦤ꧀ꦏꦼꦢꦃꦲꦁꦒꦝꦃꦲꦶꦱꦱꦼꦧꦸꦠ꧀ꦠꦤ꧀꧇ꦫꦢꦺꦤ꧀ꦲꦗꦼꦁ꧉
꧋ꦔꦶꦁꦒꦶꦭ꧀ꦥꦸꦤꦶꦏꦥꦔꦚ꧀ꦗꦸꦂꦫꦶꦁꦗꦸꦫꦸꦩꦧꦸꦂꦧꦺꦴꦁꦱꦮꦭꦤ꧀ꦢꦶꦠꦶꦠꦶꦒ꧈ꦲꦶꦁꦏꦁꦢꦺꦫꦺꦁꦢꦔꦸꦥꦸꦤꦶꦏꦮꦁꦱꦸꦭ꧀ꦩꦭꦶꦃꦝꦠꦼꦁꦤꦒꦫꦶꦮꦭꦤ꧀ꦢꦶ꧈ꦲꦶꦁꦒꦶꦃꦥꦸꦤꦶꦏꦱꦏꦶꦁꦏꦶꦮꦩꦤꦼꦔꦼꦤ꧀꧇ꦠꦸꦮꦤ꧀ G.M.H. Frijns꧈ꦭꦶꦢ꧀ꦤꦤ꧀ L.A. Koppen ꦠꦸꦮꦶꦤ꧀ꦠꦸꦮꦤ꧀ S. Elleman꧉ ꦱꦏꦶꦁꦏꦶꦛꦄꦩ꧀ꦱꦼꦠꦼꦂꦝꦩ꧀(ꦤꦒꦫꦶꦮꦭꦤ꧀ꦢꦶ)ꦢꦸꦩꦸꦒꦶꦲꦶꦁꦨꦠꦮꦶꦤꦩꦸꦁꦢꦶꦥꦸꦤ꧀ꦭꦩ꧀ꦥꦃꦲꦶ 10 ꦢꦶꦤ꧀ꦠꦼꦤ꧀꧉ꦲꦶꦁꦩꦺꦴꦁꦏꦩꦤꦮꦶꦤꦸꦩ꧀ꦥꦏ꧀ꦧꦲꦶꦠꦱꦏꦶꦁꦤꦒꦫꦶꦮꦭꦤ꧀ꦢꦶꦢꦸꦩꦸꦒꦶꦤꦶꦁꦨꦠꦮꦶꦥꦸꦤꦶꦏꦭꦩ꧀ꦥꦃꦲꦤ꧀ꦏꦶꦫꦁꦭꦁꦏꦸꦁꦱꦮꦸꦭꦤ꧀꧈ꦢꦢꦺꦴꦱ꧀ꦫꦶꦏꦠ꧀ꦠꦶꦁꦭꦩ꧀ꦥꦃꦲꦶꦥꦸꦤ꧀ꦩꦱꦶꦤ꧀ꦩꦧꦸꦂꦥꦸꦤꦶꦏꦠꦶꦏꦼꦭ꧀ꦠꦶꦒꦠꦶꦤꦶꦩ꧀ꦧꦁꦧꦲꦶꦠꦏꦥꦭ꧀꧉ꦗꦸꦫꦸꦩꦧꦸꦂꦠꦶꦠꦶꦒꦮꦲꦸ꧈ꦲꦔꦗꦼꦁꦲꦗꦼꦁꦮꦁꦱꦸꦭ꧀ꦭꦶꦥꦸꦤ꧀ꦝꦠꦼꦁꦤꦒꦫꦶꦮꦭꦤ꧀ꦢꦶꦱꦒꦼꦢ꧀ꦢꦭꦶꦤꦩ꧀ꦥꦃꦲꦤ꧀ 10 ꦢꦶꦤ꧀ꦠꦼꦤ꧀꧉
꧋ꦠꦸꦩꦿꦥ꧀ꦥꦤꦶꦠꦶꦥꦿꦶꦏ꧀ꦱꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦲꦶꦁꦏꦩ꧀ꦥꦸꦁꦏꦩ꧀ꦥꦸꦁꦲꦶꦁꦏꦶꦛꦨꦠꦮꦶ꧈ꦯꦼꦩꦫꦁ꧈ꦯꦸꦫꦧꦪ꧈ꦕꦶꦉꦨꦺꦴꦤ꧀꧈ꦨꦺꦴꦒꦺꦴꦂꦭꦤ꧀ꦩꦑꦱꦂ꧈ꦤꦒꦫꦶꦱꦩꦁꦏꦺꦲꦚꦼꦝꦶꦪꦤ꧀ꦤꦶꦲꦂꦠꦏꦛꦃꦲꦶꦥꦸꦤ꧀ F 60.000,- ꦱꦏꦶꦁꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦁꦥꦤꦶꦠꦶꦥꦿꦶꦏ꧀ꦱꦮꦲꦸ꧈ꦱꦭꦗꦼꦁꦔꦶꦥꦸꦤ꧀ꦤꦸꦤ꧀ꦠꦼꦤ꧀ꦧꦝꦺꦲꦩ꧀ꦧꦸꦢꦶꦢꦪꦏꦢꦺꦴꦱ꧀ꦥꦸꦤ꧀ꦢꦶꦕꦫꦕꦫꦤꦶꦥꦸꦤ꧀ꦲꦚꦲꦺꦏ꧀ꦲꦏꦼꦤ꧀ꦏꦩ꧀ꦥꦸꦁꦏꦩ꧀ꦥꦸꦁꦮꦲꦸ꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦏꦺꦴꦤ꧀ꦠꦿꦺꦴꦭꦶꦂꦲꦒꦿꦫꦶꦱꦼꦱꦏꦼꦤ꧀ꦲꦶꦁꦔꦪꦺꦴꦒꦾꦏꦂꦠ꧈ꦠꦸꦮꦤ꧀ Samethini ꦢꦶꦥꦸꦤ꧀ꦊꦥꦱ꧀ꦱꦏꦶꦁꦥꦁꦏꦠ꧀ꦠꦶꦥꦸꦤ꧀ꦲꦩꦂꦒꦶꦏꦢꦏ꧀ꦮꦱꦩ꧀ꦥꦸꦤ꧀ꦤꦩ꧀ꦥꦶꦲꦂꦠꦧꦼꦱꦼꦭ꧀꧈ꦥꦸꦤꦥꦊꦥꦱ꧀ꦱꦶꦥꦸꦤ꧀ꦮꦲꦸꦏꦤ꧀ꦛꦶꦲꦸꦂꦩꦠ꧀ꦲꦸꦠꦮꦶꦧꦺꦴꦠꦼꦤ꧀꧈ꦥꦸꦤꦶꦏꦧꦝꦺꦏꦠꦼꦩ꧀ꦠꦺꦴꦏ꧀ꦲꦏꦼꦤ꧀ꦲꦶꦁꦠꦼꦩ꧀ꦧꦺ꧉
꧋N.V. Volkshuisvesting ꦲꦶꦁꦨꦠꦮꦶ꧈ꦲꦶꦁꦒꦶꦃꦥꦸꦤꦶꦏꦱꦠꦸꦁꦒꦶꦭ꧀ꦭꦶꦁꦧꦺꦧꦢꦤ꧀ꦲꦶꦁꦏꦁꦲꦧꦸꦢꦶꦢꦪꦲꦔꦼꦢꦼꦒ꧀ꦒꦏꦼꦤ꧀ꦒꦿꦶꦪꦒꦿꦶꦪꦠꦸꦩꦿꦥ꧀ꦠꦶꦠꦶꦪꦁꦏꦶꦛꦏꦱ꧀ꦧꦸꦠ꧀꧈ꦠꦸꦩꦿꦥ꧀ꦠꦶꦠꦶꦪꦁꦥꦿꦶꦧꦸꦩꦶꦱꦸꦩꦼꦢꦾꦔꦼꦢꦼꦒ꧀ꦒꦏꦼꦤ꧀ꦒꦿꦶꦪꦒꦿꦶꦪꦲꦸꦫꦸꦠ꧀ꦠꦶꦥꦸꦤ꧀ꦩꦂꦒꦶꦠꦿꦺꦩ꧀꧉ꦱꦩꦁꦏꦺꦲꦶꦁꦦꦼꦠꦗꦆꦭꦶꦂꦱꦮꦼꦒ꧀ꦮꦶꦮꦶꦠ꧀ꦢꦶꦥꦸꦤ꧀ꦪꦱꦤ꧀ꦤꦶꦒꦿꦶꦪ 24꧈ꦏꦗꦮꦶꦥꦸꦤꦶꦏꦲꦸꦒꦶꦪꦱꦒꦿꦶꦪꦭꦗꦸꦂꦫꦤ꧀ꦏꦛꦃꦲꦶꦥꦸꦤ꧀ 8 ꦭꦤ꧀ꦩꦭꦶꦃꦲꦶꦁꦏꦁꦥꦽꦤꦃꦲꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦺꦴꦗꦺꦴꦏ꧀ꦏꦶꦁꦩꦂꦒꦶ꧈ꦲꦶꦁꦏꦁꦧꦝꦺꦏꦱꦺꦮꦏ꧀ꦲꦏꦼꦤ꧀ꦏꦁꦒꦺꦔꦼꦢꦼꦒ꧀ꦒꦏꦼꦤ꧀ꦠꦺꦴꦏꦺꦴ꧉ꦱꦺꦮꦤꦶꦥꦸꦤ꧀ꦒꦿꦶꦪꦒꦿꦶꦪꦮꦲꦸꦮꦺꦴꦤ꧀ꦠꦼꦤ꧀ꦲꦶꦁꦏꦁ f 2.50꧈ f 6.50꧈ f 11.50꧈ꦔꦤ꧀ꦠꦺꦴꦱ꧀ f 17.50꧉ꦲꦶꦁꦢꦊꦩ꧀ꦱꦮꦸꦭꦤ꧀ꦮꦸꦭꦤ꧀ꦤꦶꦥꦸꦤ꧀꧉ꦮꦿꦒꦢ꧀ꦢꦶꦥꦸꦤ꧀ꦲꦔꦼꦢꦼꦒ꧀ꦒꦏꦼꦤ꧀ꦒꦿꦶꦪꦒꦿꦶꦪꦮꦲꦸꦢꦭꦃꦱꦶꦠꦶꦤꦶꦥꦸꦤ꧀ꦥꦶꦱꦤ꧀ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦮꦺꦴꦤ꧀ꦠꦼꦤ꧀ f 100.000.-꧉
꧋ꦏꦗꦮꦶꦥꦸꦤꦶꦏꦱꦩ꧀ꦥꦸꦤ꧀ꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦫꦚ꧀ꦕꦁꦔꦤ꧀ꦧꦝꦺꦪꦱꦒꦿꦶꦪꦥꦺꦴꦤ꧀ꦝꦺꦴꦏ꧀ꦏꦤ꧀ꦕꦕꦃꦲꦶꦥꦸꦤ꧀ 258 ꦭꦤ꧀ꦒꦿꦶꦪꦭꦗꦸꦂꦫꦤ꧀ 36꧈ꦩꦼꦁꦒꦃꦥꦽꦭꦸꦤꦶꦥꦸꦤ꧀ꦧꦝꦺꦏꦁꦒꦺꦚꦺꦴꦧꦶꦥꦸꦤꦥꦒꦿꦶꦪꦒꦿꦶꦪꦲꦶꦁꦏꦁꦩꦏꦠꦼꦤ꧀ꦮꦲꦸꦱꦩ꧀ꦥꦸꦤ꧀ꦲꦚꦼꦏꦥ꧀ꦥꦶꦠꦸꦩꦿꦥ꧀ꦏꦧꦼꦠꦃꦲꦤ꧀ꦤꦶꦥꦸꦤ꧀ꦠꦶꦠꦶꦪꦁꦥꦿꦶꦧꦸꦩꦶ꧉ꦢꦺꦤꦺꦮꦿꦒꦢ꧀ꦢꦶꦥꦸꦤ꧀ꦏꦲꦺꦠꦁꦏꦭꦶꦪꦤ꧀ꦱꦶꦠꦶꦤꦶꦥꦸꦤ꧀ꦥꦶꦱꦤ꧀ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦮꦺꦴꦤ꧀ꦠꦼꦤ꧀ f 160.000꧉ꦥꦥꦤ꧀ꦤꦶꦥꦸꦤ꧀ꦒꦿꦶꦪꦒꦿꦶꦪꦮꦲꦸꦮꦺꦴꦤ꧀ꦠꦼꦤ꧀ꦲꦶꦁꦱꦕꦼꦭꦏ꧀ꦏꦶꦥꦸꦤ꧀ꦭꦺꦥꦺꦤ꧀ꦏꦿꦸꦏꦸꦠ꧀꧈ꦭꦗꦼꦁꦔꦤ꧀ꦤꦶꦥꦸꦤ꧀ꦭꦤ꧀ꦠꦿꦸꦥ꦳ꦺꦭ꧀ꦭꦶ꧉
꧋ꦥꦏꦼꦩ꧀ꦥꦭ꧀ꦭꦤ꧀ꦩꦸꦝꦏꦿꦶꦱ꧀ꦠꦼꦤ꧀ꦗꦮꦶ꧈ꦲꦶꦁꦒꦶꦃꦥꦸꦤꦶꦏꦥꦏꦼꦩ꧀ꦥꦭ꧀ꦭꦤ꧀ꦤꦶꦥꦸꦤ꧀ꦥꦫꦱꦝꦺꦫꦺꦏ꧀ꦗꦮꦶꦥꦿꦺꦴꦠꦺꦱ꧀ꦠꦤ꧀꧈ꦮꦶꦮꦶꦠ꧀ꦧꦺꦚ꧀ꦗꦶꦁꦗꦤꦸꦮꦫꦶꦔꦗꦼꦁꦥꦸꦤꦶꦏ꧈ꦧꦝꦺꦔꦼꦢꦭ꧀ꦭꦏꦼꦤ꧀ꦱꦼꦫꦠ꧀ꦏꦧꦂꦩꦮꦶꦧꦱꦗꦮꦶ꧈ꦩ꧀ꦭꦗꦼꦁꦱꦂꦠꦮ꧀ꦭꦤ꧀ꦢꦶ꧉
