FEUILLETON
꧋ꦭꦭꦩ꧀ꦥꦃꦲꦤ꧀ꦤꦶꦥꦸꦤ꧀ꦦꦿꦧꦸ Tristan ꦭꦤ꧀ꦥꦸꦠꦿꦶ Isolde꧉
꧇꧒꧔꧇
꧋ꦠꦽꦏꦝꦁꦒꦸꦭꦸꦤꦶꦥꦸꦤ꧀ꦏꦠꦶꦔꦭ꧀ꦥꦼꦛꦏ꧀ꦏꦢꦺꦴꦱ꧀ꦏꦥꦸꦏ꧀ꦲꦶꦁꦏꦁꦢꦶꦥꦸꦤ꧀ꦮꦸꦱꦺꦴꦤ꧀ꦤꦶ꧉ꦩꦤꦮꦶꦏꦱꦮꦁꦱꦏꦶꦁꦮꦶꦁꦏꦶꦁꦏꦠꦶꦔꦭ꧀ꦭꦶꦥꦸꦤ꧀ꦲꦶꦗꦼꦩ꧀ꦫꦺꦴꦪꦺꦴꦫꦺꦴꦪꦺꦴꦏꦢꦺꦴꦱ꧀ꦭꦸꦔꦶꦁꦫꦺꦴꦤꦿꦺꦴꦤ꧀ꦤꦤ꧀ꦲꦶꦁꦏꦁꦏꦱꦺꦴꦫꦺꦴꦠ꧀ꦠꦤ꧀ꦱꦸꦂꦪꦲꦶꦁꦮꦚ꧀ꦕꦶꦲꦺꦚ꧀ꦗꦶꦁ꧉ꦩꦤꦮꦶꦏꦱꦮꦁꦱꦏꦶꦁꦔꦶꦫꦶꦁꦔꦤ꧀ꦏꦠꦶꦔꦭ꧀ꦲꦧꦿꦶꦠ꧀꧉ꦱꦏꦶꦁꦲꦶꦫꦶꦁꦱꦤꦺꦱ꧀ꦱꦶꦥꦸꦤ꧀ꦏꦠꦶꦔꦭ꧀ꦗꦼꦤꦺ꧉ꦮꦼꦠꦼꦁꦔꦶꦥꦸꦤ꧀ꦧꦶꦫꦸ꧈ꦒꦼꦒꦼꦂꦫꦶꦥꦸꦤ꧀ꦲꦧꦿꦶꦠ꧀꧉ꦤꦔꦶꦁꦩꦤꦮꦶꦢꦶꦥꦸꦤ꧀ꦱꦮꦁꦱꦏꦼꦝꦥ꧀ꦏꦺꦩꦮꦺꦴꦤ꧀ꦫꦸꦥꦶꦤꦶꦥꦸꦤ꧀ꦩꦺꦴꦭꦃꦩꦭꦶꦃꦲꦤ꧀ꦠꦮꦶꦱ꧀ꦱꦶꦥꦸꦤ꧀꧇ꦥꦼꦛꦏ꧀꧈ꦲꦶꦗꦼꦩ꧀꧈ꦗꦼꦤꦺ꧈ꦧꦶꦫꦸ꧈ꦲꦧꦿꦶꦠ꧀ꦱꦂꦠꦒꦶꦭꦥ꧀꧉ꦱꦒꦮꦺꦴꦤ꧀ꦮꦲꦸꦏꦶꦤꦭꦸꦁꦔꦤ꧀ꦫꦤ꧀ꦠꦺꦲꦼꦩꦱ꧀꧈ꦒꦶꦤꦤ꧀ꦠꦸꦁꦔꦤ꧀ꦗꦩ꧀ꦮꦱꦶꦪꦠ꧀ꦲꦶꦁꦏꦁꦲꦸꦔꦼꦭ꧀ꦭꦶꦥꦸꦤ꧀ꦏꦢꦺꦴꦱ꧀ꦎꦂꦒꦼꦭ꧀꧈ꦱꦏꦺꦕꦱꦔꦼꦠ꧀ꦢꦶꦥꦸꦤ꧀ꦩꦶꦉꦁꦔꦏꦼꦤ꧀꧉ꦱꦉꦁꦦꦿꦧꦸ Tristan ꦩꦶꦉꦁꦱ꧀ꦮꦫꦤꦶꦁꦗꦩ꧀ꦮꦱꦶꦪꦠ꧀ꦥꦸꦤꦶꦏ꧈ꦱꦤꦭꦶꦏꦭꦶꦥꦸꦂꦥꦁꦒꦭꦶꦃꦲꦶꦥꦸꦤ꧀꧈ꦧꦺꦴꦠꦼꦤ꧀ꦏꦺꦔꦼꦠ꧀ꦠꦤ꧀ꦝꦠꦼꦁꦏꦱꦸꦱꦃꦲꦤ꧀ꦤꦶꦥꦸꦤ꧀꧈ꦥꦸꦤꦥꦩꦭꦶꦃꦲꦁꦒꦺꦤ꧀ꦤꦶꦥꦸꦤ꧀ꦒꦤ꧀ꦢꦿꦸꦁꦝꦠꦼꦁꦯꦁꦥꦸꦠꦿꦶ Isolde ꦲꦶꦁꦒꦶꦃꦱꦒꦼꦢ꧀꧈ꦧ꧀ꦭꦱ꧀ꦲꦶꦕꦭ꧀ꦱꦤꦭꦶꦏ꧉ꦩꦏꦠꦼꦤ꧀ꦏꦱꦶꦪꦠ꧀ꦠꦶꦥꦸꦤ꧀ꦗꦩ꧀ꦮꦱꦶꦪꦠ꧀ꦮꦲꦸ꧉ꦏꦭꦱꦩꦤ꧀ꦠꦼꦤ꧀ꦦꦿꦧꦸ Tristan ꦲꦔꦼꦭꦸꦱ꧀ꦲꦼꦭꦸꦱ꧀ꦒꦼꦒꦼꦂꦫꦶꦥꦸꦤ꧀ Petit Cru꧈ꦮꦸꦭꦸꦤꦶꦥꦸꦤ꧀ꦲꦭꦸꦱ꧀ꦱꦔꦼꦠ꧀ꦔꦤ꧀ꦠꦺꦴꦱ꧀ꦏꦢꦺꦴꦱ꧀ꦧꦭꦸꦢꦿꦸ꧉ꦲꦶꦁꦔꦿꦶꦏꦸꦦꦿꦧꦸ Tristan ꦭꦗꦼꦁꦠꦸꦮꦸꦃꦥꦁꦒꦭꦶꦃꦲꦶꦥꦸꦤ꧀ꦧꦶꦭꦶꦃ Petit Cru ꦥꦸꦤꦶꦏꦲꦸꦠꦩꦶꦱꦔꦼꦠ꧀ꦩꦤꦮꦶꦏꦥꦫꦶꦁꦔꦏꦼꦤ꧀ꦝꦠꦼꦁꦯꦁꦥꦸꦠꦿꦶ Isolde ꦱꦸꦥꦢꦺꦴꦱ꧀ꦱꦩ꧀ꦥꦸꦤ꧀ꦤꦤ꧀ꦝꦁꦥꦿꦶꦲꦠꦺꦴꦱ꧀ꦲꦸꦠꦮꦶꦮꦸꦪꦸꦁꦏꦢꦺꦴꦱ꧀ꦱꦫꦶꦫꦤꦶꦥꦸꦤ꧀꧈ꦱꦢꦺꦫꦺꦁꦔꦶꦥꦸꦤ꧀ꦩꦶꦉꦁꦔꦏꦼꦤ꧀ꦱꦸꦮꦫꦤꦶꦁꦗꦩ꧀ꦮꦱꦶꦪꦠ꧀ꦥꦸꦤꦶꦏ꧈ꦱꦂꦠꦱꦲꦶꦧꦧꦶꦔꦃꦲꦶꦁꦥꦁꦒꦭꦶꦃꦲꦶꦥꦸꦤ꧀ꦱꦁꦥꦸꦠꦿꦶ꧈ꦩꦤꦮꦶꦠꦩ꧀ꦥꦶꦏꦶꦤ꧀ꦠꦸꦤ꧀ꦤꦤ꧀ꦢꦺꦴꦭꦤ꧀ꦤꦤ꧀ꦲꦶꦁꦏꦁꦱꦲꦺꦱ꧀ꦠꦸꦤꦶꦥꦸꦤ꧀ꦲꦶꦁꦒꦶꦃꦝꦱꦂꦱꦲꦺꦠꦶꦤꦶꦔꦭ꧀ꦭꦤ꧀ꦥꦸꦤꦶꦏ꧉ꦤꦔꦶꦁꦏꦢꦺꦴꦱ꧀ꦥꦸꦤ꧀ꦢꦶꦱꦒꦼꦢ꧀ꦢꦶꦥꦸꦤ꧀ꦏꦭꦩ꧀ꦥꦃꦲꦤ꧀꧈ꦲꦮꦶꦠ꧀ꦲꦺꦂꦠꦺꦴꦃ Gilain ꦲꦱꦶꦃꦱꦔꦼꦠ꧀ꦝꦠꦼꦁ Petit Cru ꦥꦸꦤꦶꦏ꧈ꦩꦤꦮꦶꦢꦶꦥꦸꦤ꧀ꦥꦸꦤ꧀ꦝꦸꦠ꧀ꦱꦲꦺꦱ꧀ꦠꦸꦧꦺꦴꦠꦼꦤ꧀ꦧꦝꦺꦏꦥꦫꦶꦁꦔꦏꦼꦤ꧀꧉
꧋ꦲꦤꦸꦗꦸꦱꦠꦸꦁꦒꦶꦭ꧀ꦭꦶꦁꦢꦶꦤ꧀ꦠꦼꦤ꧀꧈ꦦꦿꦧꦸ Tristan ꦩꦠꦸꦂꦝꦠꦼꦁꦲꦺꦂꦠꦺꦴꦃ Gilain ꦥꦔꦤ꧀ꦢꦶꦏꦤꦶꦥꦸꦤ꧀꧇ꦲꦺꦂꦠꦺꦴꦃ꧈ꦩꦤꦮꦶꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦱꦒꦼꦢ꧀ꦲꦩꦼꦗꦃꦲꦶꦯꦁ Urgan de Wildeman ꦢꦶꦠꦾꦲꦶꦁꦏꦁꦠꦤ꧀ꦱꦃꦩꦼꦏ꧀ꦱꦝꦠꦼꦁꦥꦢꦸꦏꦤꦼꦝꦧꦸꦭꦸꦧꦼꦏ꧀ꦠꦶꦥꦸꦤꦶꦏꦧꦝꦺꦥꦢꦸꦏꦥꦫꦶꦁꦔꦶꦒꦚ꧀ꦗꦂꦫꦤ꧀ꦥꦸꦤꦥ꧉
꧋ꦲꦺꦂꦠꦺꦴꦃ Gilain ꦲꦩꦁꦱꦸꦭ꧀ꦭꦶ꧇ꦱꦠꦿꦶꦪ꧈ꦩꦤꦮꦶꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦱꦒꦼꦢ꧀ꦔꦮꦺꦴꦤ꧀ꦤꦏꦼꦤ꧀ꦢꦶꦠꦾꦥꦸꦤꦶꦏ꧈ꦧꦝꦺꦏꦸꦭꦥꦸꦫꦶꦃꦲꦩꦶꦭꦶꦃꦧꦫꦁꦧꦫꦁꦢꦂꦧꦺꦏ꧀ꦏꦸꦭꦲꦶꦁꦏꦁꦮꦺꦴꦤ꧀ꦠꦼꦤ꧀ꦱꦊꦧꦼꦠ꧀ꦠꦶꦁꦏꦫꦠꦺꦴꦤ꧀ꦲꦸꦠꦮꦶꦤꦒꦫꦶꦏꦸꦭꦥꦸꦤꦶꦏ꧈ꦲꦤꦔꦶꦁꦏꦸꦕꦶꦮꦤꦶꦥꦸꦤ꧀ꦔꦤ꧀ꦠꦺꦴꦱ꧀ꦱꦥꦿꦶꦏꦶꦢꦺꦫꦺꦁꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦮꦤꦶꦲꦤꦁꦒꦸꦭꦁꦔꦶꦥꦼꦫꦁꦔꦶꦥꦸꦤ꧀꧉
꧋ꦦꦿꦧꦸ Tristan ꦔꦤ꧀ꦢꦶꦏꦩꦭꦶꦃ꧇ꦲꦺꦂꦠꦺꦴꦃ꧈ꦒꦚ꧀ꦗꦂꦫꦤ꧀ꦲꦶꦁꦏꦁꦥꦢꦸꦏꦝꦮꦸꦃꦲꦏꦼꦤ꧀ꦥꦸꦤꦶꦏꦩꦺꦔꦶꦤ꧀ꦤꦏꦼꦤ꧀ꦱꦔꦼꦠ꧀꧉ꦱꦪꦏ꧀ꦠꦺꦴꦱ꧀ꦱꦶꦥꦸꦤ꧀ꦤꦩꦸꦁꦱꦠꦿꦶꦪꦲꦶꦁꦏꦁꦧꦺꦂꦲꦶꦁꦏꦮꦤꦺꦤ꧀ꦲꦶꦁꦏꦁꦱꦒꦼꦢ꧀ꦲꦢꦩꦼꦭ꧀ꦮꦶꦭꦸꦗꦼꦁꦠꦸꦮꦶꦤ꧀ꦱꦤ꧀ꦠꦺꦴꦱꦤꦶꦁꦤꦒꦫꦶ꧉ꦱꦪꦏ꧀ꦠꦺꦴꦱꦶꦥꦸꦤ꧀ꦏꦸꦭꦏꦼꦥꦺꦔꦶꦤ꧀ꦱꦔꦼꦠ꧀ꦲꦩꦼꦗꦃꦲꦶꦢꦶꦠꦾꦲꦶꦁꦏꦁꦗꦲꦶꦭ꧀ꦥꦩ꧀ꦧꦼꦏꦤ꧀ꦤꦶꦥꦸꦤ꧀ꦥꦸꦤꦶꦏ꧉ꦱꦤꦗꦤ꧀ꦱꦲꦸꦥꦩꦶꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦧꦝꦺꦚꦸꦏꦏ꧀ꦲꦏꦼꦤ꧀ꦱꦢꦪꦥꦩꦼꦢꦭ꧀ꦭꦶꦁꦲꦼꦩꦱ꧀ꦲꦶꦁ Milan ꦤꦔꦶꦁꦲꦔꦭꦁꦲꦭꦁꦔꦶꦲꦁꦒꦺꦤ꧀ꦏꦸꦭꦧꦝꦺꦲꦤꦁꦒꦸꦭꦁꦔꦶꦢꦶꦠꦾꦥꦸꦤꦶꦏ꧈ꦱꦲꦺꦱ꧀ꦠꦸꦧꦺꦴꦠꦼꦤ꧀ꦧꦝꦺꦮꦤ꧀ꦢꦺꦱꦼꦢꦾꦏꦸꦭꦮꦲꦸ꧉
꧋ꦲꦺꦂꦠꦺꦴꦃ Gilain ꦚꦩ꧀ꦧꦸꦁꦔꦶꦥꦔꦤ꧀ꦢꦶꦏ꧇ꦱꦠꦿꦶꦪ꧈ꦱꦺꦴꦏꦸꦂꦱꦔꦼꦠ꧀ꦥꦢꦸꦏꦏꦒꦸꦁꦔꦤ꧀ꦏꦂꦱꦩꦏꦠꦼꦤ꧀꧈ꦏꦸꦭꦤꦩꦸꦁꦲꦩꦼꦩꦸꦗꦶꦝꦠꦼꦁꦲꦶꦁꦏꦁꦩꦲꦏꦮꦱ꧈ꦩꦸꦒꦶꦏꦂꦱꦲꦲꦚ꧀ꦗꦒꦶꦲꦶꦁꦱꦫꦶꦫꦥꦢꦸꦏ꧈ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦩꦁꦒꦶꦃꦠꦶꦮꦱ꧀꧉
꧋ꦏꦕꦫꦶꦪꦺꦴꦱ꧀ꦦꦿꦧꦸ Tristan ꦲꦔ꧀ꦭꦸꦫꦸꦒ꧀ꦒꦶꦢꦶꦠꦾ Urgan de Wildeman ꦝꦠꦼꦁꦲꦶꦁꦥꦢꦸꦤꦸꦁꦔꦤ꧀ꦤꦶꦥꦸꦤ꧀꧈ꦭꦗꦼꦁꦲꦥꦿꦁꦠꦤ꧀ꦝꦶꦁꦫꦩꦺꦱꦔꦼꦠ꧀꧉ꦱꦤꦗꦤ꧀ꦢꦶꦠꦾꦮꦲꦸꦏꦶꦏꦶꦪꦠ꧀ꦠꦤ꧀ꦤꦶꦥꦸꦤ꧀ꦲꦔꦸꦁꦒꦸꦭ꧀ꦭꦶꦦꦿꦧꦸ Tristan ꦱꦲꦲꦢꦼꦢꦩꦼꦭ꧀ꦏꦼꦤ꧀ꦛꦺꦱ꧀ꦲꦒꦼꦁꦱꦔꦼꦠ꧀꧈ꦤꦔꦶꦁꦏꦮꦺꦴꦤ꧀ꦕꦸꦏꦠ꧀ꦏꦭꦶꦪꦤ꧀ꦦꦿꦧꦸ Tristan꧉ꦦꦿꦧꦸ Tristan ꦮꦱꦶꦱ꧀ꦱꦔꦼꦠ꧀ꦲꦩꦲꦶꦤ꧀ꦤꦏꦼꦤ꧀ꦥꦼꦝꦁꦔꦶꦥꦸꦤ꧀꧈ꦱꦠꦼꦩꦃꦢꦤꦮꦮꦲꦸꦏꦠꦩꦤ꧀ꦥꦼꦝꦁꦔꦤ꧀ꦠꦺꦴꦱ꧀ꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦥꦼꦗꦃꦲꦶꦥꦸꦤ꧀꧉ꦠꦔꦤꦶꦥꦸꦤ꧀ꦲꦶꦁꦏꦁꦠꦼꦔꦼꦤ꧀ꦭꦗꦼꦁꦠꦶꦤꦶꦒꦱ꧀ꦢꦺꦤꦶꦁꦦꦿꦧꦸ Tristan ꦤꦸꦤ꧀ꦠꦼꦤ꧀ꦏꦧꦼꦏ꧀ꦠꦱꦺꦴꦮꦤ꧀ꦝꦠꦼꦁꦲꦺꦂꦠꦺꦴꦃ Gilain ꦱꦂꦠꦏꦲꦠꦸꦂꦫꦏꦼꦤ꧀꧈ꦩꦶꦤꦺꦴꦁꦏꦥꦱꦏ꧀ꦱꦺꦤ꧀ꦤꦶꦥꦸꦤ꧀ꦲꦁꦒꦺꦤ꧀ꦤꦶꦥꦸꦤ꧀ꦱꦩ꧀ꦥꦸꦤ꧀ꦲꦩꦼꦗꦃꦲꦶꦢꦤꦮꦮꦲꦸ꧈ꦲꦠꦸꦂꦫꦶꦥꦸꦤ꧀꧇ꦲꦺꦂꦠꦺꦴꦃ꧈ꦩꦶꦤꦺꦴꦁꦏꦲꦺꦥꦃꦲꦶꦥꦸꦤ꧀ꦲꦁꦒꦺꦤ꧀ꦏꦸꦭꦱꦩ꧀ꦥꦸꦤ꧀ꦲꦩꦼꦗꦓꦶꦯꦁ Urgan ꦩꦸꦒꦶꦥꦢꦸꦏꦏꦂꦱꦲꦩꦫꦶꦁꦔꦏꦼꦤ꧀ꦏꦒꦸꦁꦔꦤ꧀ꦥꦢꦸꦏꦱꦒꦮꦺꦴꦤ꧀ꦥꦸꦤ꧀ Petit-Cru ꦥꦸꦤꦶꦏ꧉
꧋ꦲꦺꦂꦠꦺꦴꦃ Gilain ꦲꦩꦁꦱꦸꦭ꧀ꦭꦶ꧇ꦱꦝꦺꦫꦺꦏ꧀꧈ꦏꦸꦭꦧꦺꦴꦠꦼꦤ꧀ꦱꦒꦼꦢ꧀ꦔꦠꦸꦂꦫꦏꦼꦤ꧀ꦥꦸꦤ꧀ Petit-Cru꧉ꦩꦸꦒꦶꦥꦢꦸꦏꦏꦂꦱꦲꦤꦩ꧀ꦥꦶꦲꦝꦶꦏꦸꦭꦲꦺꦱ꧀ꦠꦿꦶ꧈ꦢꦢꦺꦴꦱꦒꦂꦮꦱꦩ꧀ꦥꦺꦪꦤ꧀꧈ꦱꦂꦠꦱꦥꦭꦶꦃꦲꦶꦁꦤꦒꦫꦶꦏꦸꦭ꧉ꦱꦩ꧀ꦥꦸꦤ꧀ꦩꦸꦤ꧀ꦝꦸꦠ꧀ꦏꦺꦮꦤ꧀ꦲꦶꦁꦏꦁꦱꦏꦭꦁꦏꦸꦁꦏꦸꦭꦠꦽꦱ꧀ꦤꦤ꧀ꦤꦶꦥꦸꦤꦶꦏ꧉
꧋ꦦꦿꦧꦸ Tristan ꦔꦤ꧀ꦢꦶꦏꦩꦭꦶꦃ꧇ꦲꦺꦂꦠꦺꦴꦃ꧈ꦏꦸꦭꦩꦠꦸꦂꦤꦸꦮꦸꦤ꧀ꦢꦺꦤꦺꦥꦢꦸꦏꦧꦝꦺꦩꦫꦶꦁꦔꦏꦼꦤ꧀ꦱꦥꦭꦶꦃꦲꦶꦁꦤꦒꦫꦶꦥꦢꦸꦏꦱꦲꦧꦝꦺꦲꦩꦫꦶꦁꦔꦏꦼꦤ꧀ꦲꦶꦁꦏꦁꦫꦪꦶ꧈ꦤꦔꦶꦁꦩꦸꦒꦶꦏꦮꦸꦤꦶꦁꦔꦤ꧀ꦤ꧈ꦧꦶꦭꦶꦃꦏꦸꦭꦧꦺꦴꦠꦼꦤ꧀ꦒꦝꦃꦱꦼꦢꦾꦩꦏꦠꦼꦤ꧀꧉ꦱꦲꦺꦱ꧀ꦠꦸꦤꦶꦥꦸꦤ꧀ꦥꦿꦩꦶꦭꦏꦸꦭꦤꦺꦏꦠ꧀ꦲꦤꦁꦒꦸꦭꦁꦔꦶꦢꦤꦮꦮꦲꦸ꧈ꦏꦸꦭꦥꦚ꧀ꦕꦺꦤ꧀ꦏꦼꦥꦺꦔꦶꦤ꧀ꦝꦠꦼꦁ Petit-Cru ꦥꦸꦤꦶꦏ꧉ꦏꦗꦮꦶꦥꦸꦤꦶꦏꦩꦸꦒꦶꦥꦢꦸꦏꦏꦂꦱꦲꦤꦼꦠꦼꦥ꧀ꦥꦶꦗꦁꦗꦶ꧉ꦧꦶꦭꦶꦃꦠꦶꦪꦁꦲꦶꦁꦏꦁꦱꦒꦼꦢ꧀ꦲꦩꦼꦗꦃꦲꦶꦢꦤꦮꦮꦲꦸ꧈ꦏꦺꦔꦶꦁꦲꦩꦶꦭꦶꦃꦧꦫꦁꦧꦫꦁꦏꦒꦸꦁꦔꦤ꧀ꦥꦢꦸꦏꦲꦶꦁꦱꦊꦧꦼꦠ꧀ꦠꦶꦁꦏꦫꦠꦺꦴꦤ꧀ꦲꦸꦠꦮꦶꦤꦒꦫꦶ꧉
꧋ꦲꦺꦂꦠꦺꦴꦃ Gilain ꦩꦁꦱꦸꦭ꧀ꦭꦶ꧇ꦩꦤꦮꦶꦩꦏꦠꦼꦤ꧀ꦏꦂꦱꦥꦢꦸꦏ꧈ꦲꦶꦁꦒꦶꦃꦱꦸꦩꦺꦴꦁꦒ꧉Petit-Cru ꦏꦸꦭꦲꦠꦸꦂꦫꦏꦼꦤ꧀꧈ꦤꦔꦶꦁꦩꦸꦒꦶꦲꦤ꧀ꦢꦢꦺꦴꦱ꧀ꦤꦏꦲꦸꦤꦶꦁꦔꦤ꧀꧈ꦧꦶꦭꦶꦃꦥꦢꦸꦏꦲꦩꦸꦤ꧀ꦝꦸꦠ꧀ꦧꦫꦁꦲꦶꦁꦏꦁꦱꦒꦼꦢ꧀ꦲꦢꦩꦼꦭ꧀ꦧꦶꦔꦃꦲꦶꦁꦩꦤꦃꦏꦸꦭ꧉
꧋ꦏꦕꦫꦶꦪꦺꦴꦱ꧀꧈ꦱꦒꦮꦺꦴꦤ꧀ꦮꦲꦸꦢꦺꦤꦶꦁꦦꦿꦧꦸ Tristan ꦢꦶꦥꦸꦤ꧀ꦠꦶꦠꦶꦥ꧀ꦥꦏꦼꦤ꧀ꦝꦠꦼꦁꦠꦸꦏꦁꦱꦸꦭꦥ꧀ꦱꦏꦶꦁꦲꦶꦁ Wales꧈ꦲꦶꦁꦏꦁꦥꦸꦫꦸꦤ꧀ꦔꦠꦸꦂꦫꦏꦼꦤ꧀ꦝꦠꦼꦁꦯꦁꦦꦿꦩꦺꦱ꧀ꦮꦫꦶ Isolde ꦲꦶꦁ Cornwallis꧉ꦱꦉꦁꦢꦸꦩꦸꦒꦶꦲꦶꦁ Tintagel ꦠꦸꦏꦁꦱꦸꦭꦥ꧀ꦮꦲꦸꦤꦸꦤ꧀ꦠꦼꦤ꧀ꦲꦩ꧀ꦧꦸꦢꦶꦢꦪꦱꦒꦼꦢ꧀ꦢꦶꦥꦸꦤ꧀ꦏꦥꦁꦒꦶꦃꦏꦭꦶꦪꦤ꧀ꦲꦧ꧀ꦢꦶ
