ꦤꦶꦥꦸꦤ꧀ꦱꦁꦦꦿꦩꦺꦱ꧀ꦮꦫꦶꦲꦶꦁꦏꦁꦲꦮꦱ꧀ꦠꦨꦿꦔꦶꦪꦺꦤ꧀ꦥꦸꦤꦶꦏ꧈ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦏꦥꦁꦒꦶꦃꦱꦒꦮꦺꦴꦤ꧀ꦮꦲꦸꦤꦸꦤ꧀ꦠꦼꦤ꧀ꦏꦥꦱꦿꦃꦲꦏꦼꦤ꧀꧈ꦱꦂꦠꦱꦸꦥꦢꦺꦴꦱ꧀ꦏꦲꦠꦸꦂꦫꦏꦼꦤ꧀ꦝꦠꦼꦁꦯꦁꦦꦿꦩꦺꦱ꧀ꦮꦫꦶ꧉ꦩꦶꦭꦯꦁꦥꦸꦠꦿꦶꦧꦶꦔꦃꦱꦔꦼꦠ꧀ꦱꦉꦁꦠꦩ꧀ꦥꦶꦏꦶꦤ꧀ꦠꦸꦤ꧀ꦤꦤ꧀ꦱꦏꦶꦁꦦꦿꦧꦸ Tristan ꦥꦸꦤꦶꦏ꧉ꦠꦸꦏꦁꦱꦸꦭꦥ꧀ꦭꦗꦼꦁꦒꦶꦤꦚ꧀ꦗꦂꦪꦠꦿꦩꦱ꧀ꦱꦢꦱꦩꦉꦏ꧀꧉ꦢꦺꦤꦺꦲꦠꦸꦂꦫꦶꦥꦸꦤ꧀ꦝꦠꦼꦁꦯꦁꦤꦠ꧈ꦱꦒꦮꦺꦴꦤ꧀ꦮꦲꦸꦏꦶꦤ꧀ꦠꦸꦤ꧀ꦤꦤ꧀ꦱꦏꦶꦁꦯꦁꦦꦿꦩꦺꦱ꧀ꦮꦫꦶꦲꦶꦁꦆꦂꦭꦤ꧀꧉ Petit-Cru ꦤꦸꦤ꧀ꦠꦼꦤ꧀ꦏꦢꦩꦼꦭ꧀ꦭꦏꦼꦤ꧀ꦏꦤ꧀ꦝꦁꦱꦲꦺꦱꦔꦼꦠ꧀꧈ꦫꦶꦤꦼꦁꦒꦲꦶꦁꦲꦼꦩꦱ꧀ꦭꦤ꧀ꦱꦺꦴꦱꦺꦴꦠꦾꦲꦢꦶ꧈ꦩꦶꦤꦺꦴꦁꦏꦥꦔꦺꦔꦼꦠ꧀ꦲꦺꦔꦼꦠ꧀ꦝꦠꦼꦁꦱꦁꦏꦶꦤꦱꦶꦃ꧈ꦱꦧꦼꦤ꧀ꦱꦁꦥꦸꦠꦿꦶꦠꦶꦤ꧀ꦢꦏ꧀꧈ꦲꦶꦁꦒꦶꦃꦝꦠꦼꦁꦔꦲꦶꦁꦥꦸꦤ꧀ꦢꦶꦏꦺꦩꦮꦺꦴꦤ꧀ Petit-Cru ꦢꦶꦥꦸꦤ꧀ꦧꦼꦏ꧀ꦠ꧉ꦩꦤꦮꦶꦯꦁꦥꦸꦠꦿꦶꦩꦿꦶꦏ꧀ꦱꦤ꧀ꦤꦶ Petit-Cru ꦱꦲꦩꦶꦉꦁꦔꦏꦼꦤ꧀ꦱ꧀ꦮꦤ꧀ꦠꦼꦤ꧀ꦤꦶꦥꦸꦤ꧀ꦗꦩ꧀ꦮꦱꦶꦪꦠ꧀ꦲꦶꦁꦏꦁꦒꦸꦩꦤ꧀ꦠꦸꦁꦲꦶꦁꦏꦭꦸꦁꦔꦶꦥꦸꦤ꧀ꦥꦸꦤꦶꦏ꧈ꦱꦤꦭꦶꦏꦱꦸꦥꦺꦝꦠꦼꦁꦏꦱꦸꦱꦃꦲꦤ꧀ꦤꦶꦥꦸꦤ꧀꧈ꦩꦏꦠꦼꦤ꧀ꦲꦸꦒꦶꦝꦠꦼꦁꦦꦿꦧꦸ Tristan. ꧉ꦮꦲꦸꦤꦶꦥꦸꦤ꧀ꦱꦁꦥꦸꦠꦿꦶꦧꦺꦴꦠꦼꦤ꧀ꦩꦔꦼꦂꦠꦺꦴꦱ꧀ꦧꦶꦭꦶꦃꦲꦶꦁꦏꦁꦩꦏꦠꦼꦤ꧀ꦮꦲꦸꦱꦏꦶꦁꦢꦪꦤꦶꦥꦸꦤ꧀ꦗꦩ꧀ꦮꦱꦶꦪꦠ꧀ꦥꦸꦤꦶꦏ꧈ꦤꦔꦶꦁꦢꦔꦸꦢꦔꦸꦮꦸꦤꦶꦁꦔ꧈ꦧꦶꦭꦶꦃꦗꦩ꧀ꦥꦸꦤꦶꦏꦒꦝꦃꦢꦪꦱꦒꦼꦢ꧀ꦲꦢꦩꦼꦭ꧀ꦱꦸꦥꦺꦤꦶꦁꦥꦁꦒꦭꦶꦃ꧈ꦱꦠꦼꦩꦃꦯꦁꦥꦸꦠꦿꦶꦭꦗꦼꦁꦏꦢꦺꦴꦱ꧀ꦒꦶꦤꦸꦒꦃꦥꦁꦒꦭꦶꦃꦲꦶꦥꦸꦤ꧀꧈ꦱꦲꦔꦸꦤꦤ꧀ꦢꦶꦏꦩꦏꦠꦼꦤ꧀꧇ꦲꦥꦲꦶꦁꦱꦸꦤ꧀ꦏꦼꦤꦲꦧꦸꦔꦃꦧꦸꦔꦃ꧈ꦩꦤꦮ Tristan ꦠꦤ꧀ꦱꦃꦤꦤ꧀ꦝꦁꦱꦸꦱꦃ꧉ꦱꦠꦼꦩꦼꦤꦺ Tristan ꦲꦺꦴꦫꦏꦸꦢꦸꦲꦔꦶꦫꦶꦩ꧀ꦩꦏꦺ Petit-Cru ꦩꦫꦁꦥꦚ꧀ꦗꦼꦤꦼꦁꦔꦤ꧀ꦤꦶꦁꦱꦸꦤ꧀꧈ꦱꦸꦥꦪꦧꦶꦱꦲꦭꦭꦶꦩꦫꦁꦏꦱꦸꦱꦃꦲꦤ꧀ꦤꦺꦭꦤ꧀ꦱꦸꦥꦪꦲꦗꦠꦤ꧀ꦱꦃꦏꦺꦭꦶꦁꦔꦤ꧀ꦧꦲꦺꦩꦫꦁꦲꦶꦁꦱꦸꦤ꧀꧉ꦤꦔꦶꦁꦱꦏꦶꦁꦠꦽꦱ꧀ꦤꦤꦺꦩꦫꦁꦲꦶꦁꦱꦸꦤ꧀꧈ Petit-Cru ꦢꦶꦏꦶꦫꦶꦩ꧀ꦩꦏꦺꦩꦿꦺꦤꦺ꧈ꦏꦁꦒꦺꦴꦲꦔ꧀ꦭꦼꦭꦶꦥꦸꦂꦥꦁꦒꦭꦶꦃꦲꦶꦁꦱꦸꦤ꧀꧉ꦝꦸꦃ꧈ Tristan ꦱꦭꦩꦶꦤꦶꦥꦸꦤ꧀ꦥꦢꦸꦏꦤꦤ꧀ꦝꦁꦫꦸꦢꦠꦶꦤ꧀꧈ꦏꦸꦭꦤꦼꦢꦾꦧꦺꦭꦱꦸꦁꦏꦮ꧉
꧋ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦩꦁꦒꦭꦶꦃꦩꦏꦠꦼꦤ꧀꧈ꦯꦁꦥꦸꦠꦿꦶꦤꦸꦤ꧀ꦠꦼꦤ꧀ꦩꦸꦤ꧀ꦝꦸꦠ꧀ꦗꦩ꧀ꦮꦱꦶꦪꦠ꧀ꦲꦶꦁꦏꦁꦒꦸꦩꦤ꧀ꦠꦸꦁꦲꦶꦁꦏꦭꦸꦁꦔꦶꦥꦸꦤ꧀ Petit-Cru wau꧉ꦢꦶꦥꦸꦤ꧀ꦩꦶꦉꦁꦔꦏꦼꦤ꧀ꦱ꧀ꦮꦫꦤꦶꦥꦸꦤ꧀ꦱꦏꦼꦝꦥ꧀ꦭꦗꦼꦁꦏꦧꦸꦕꦭ꧀ꦝꦠꦼꦁꦲꦶꦁꦱꦒꦤ꧀ꦠꦼꦤ꧀꧉
꧇꧑꧖꧇
꧋ꦯꦁꦥꦸꦠꦿꦶ Isolde ꦲꦶꦁꦤꦒꦫꦶ Bretagne꧉
꧋ꦏꦕꦫꦶꦪꦺꦴꦱ꧀꧈ꦦꦿꦧꦸ Tristan ꦲꦶꦁꦏꦁꦠꦤ꧀ꦱꦃꦤꦤ꧀ꦝꦁꦫꦸꦢꦃꦲꦶꦁꦥꦁꦒꦭꦶꦃ꧈ꦩꦸꦫꦶꦃꦫꦒꦶꦮꦺꦴꦤ꧀ꦠꦼꦤ꧀ꦤꦩꦼꦤ꧀ꦝꦤ꧀ꦤꦶꦥꦸꦤ꧀꧈ꦲꦶꦁꦏꦁꦏꦁꦒꦺꦲꦔ꧀ꦭꦶꦭꦶꦥꦸꦂꦥꦁꦒꦭꦶꦃꦠꦤ꧀ꦱꦃꦲꦭꦭꦤ꧈ꦲꦚ꧀ꦗꦗꦃꦤꦒꦫꦶꦱꦂꦠꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦥꦸꦭꦺꦴ꧈ꦱꦠꦼꦩꦃꦢꦸꦩꦸꦒꦶꦲꦶꦁꦤꦒꦫꦶ Lonnois꧉ꦲꦶꦁꦔꦿꦶꦏꦸꦦꦿꦧꦸ Tristan ꦢꦶꦥꦸꦤ꧀ꦠꦩ꧀ꦥꦶꦏꦭꦪꦤ꧀ꦧꦶꦔꦃꦲꦶꦁꦩꦤꦃꦢꦺꦤꦶꦁꦲꦶꦁꦏꦁꦫꦩꦲꦁꦏꦠ꧀꧈ꦲꦶꦁꦒꦶꦃꦥꦸꦤꦶꦏꦲꦢꦶꦦꦠꦶ Rohalt ꦲꦶꦁꦏꦁꦗꦸꦩꦼꦤꦼꦁꦤꦠꦲꦶꦁꦤꦒꦫꦶꦮꦲꦸ꧉ꦯꦁꦲꦢꦶꦦꦠꦶꦥꦔꦽꦁꦏꦸꦃꦲꦶꦥꦸꦤ꧀ꦝꦠꦼꦁꦦꦿꦧꦸ Tristan ꦧꦺꦴꦠꦼꦤ꧀ꦲꦺꦮꦃ꧈ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀꧈ꦲꦩꦂꦒꦶꦏꦗꦮꦶꦤꦩꦸꦁꦫꦸꦩꦲꦺꦴꦱ꧀ꦲꦁꦒꦝꦸꦃꦤꦒꦫꦶꦤꦶꦥꦸꦤ꧀꧈ꦲꦶꦁꦒꦶꦃꦥꦚ꧀ꦕꦺꦤ꧀ꦠꦽꦱ꧀ꦤꦱꦔꦼꦠ꧀ꦝꦠꦼꦁꦦꦿꦧꦸ Tristan꧉ꦲꦤꦔꦶꦁꦦꦿꦧꦸ Tristan ꦧꦺꦴꦠꦼꦤ꧀ꦗꦼꦚ꧀ꦗꦼꦩ꧀ꦥꦁꦒꦭꦶꦃꦲꦶꦥꦸꦤ꧀꧈ꦢꦺꦤꦺꦢꦔꦸꦏꦺꦤ꧀ꦢꦼꦭ꧀ꦏꦺꦩꦮꦺꦴꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦤꦶꦥꦸꦤ꧀꧈ꦩꦶꦭꦭꦗꦼꦁꦠꦶꦤ꧀ꦢꦏ꧀ꦲꦭꦭꦤꦩꦭꦶꦃ꧈ꦲꦚ꧀ꦗꦗꦃꦤꦒꦫꦶꦤꦒꦫꦶꦱꦤꦺꦱ꧀ꦱꦶꦥꦸꦤ꧀ꦱꦏꦶꦁ Lonnois ꦔꦤ꧀ꦠꦺꦴꦱ꧀ꦢꦸꦩꦸꦒꦶꦲꦶꦁ Friesland꧈ꦱꦏꦶꦁꦲꦶꦁ Jerman ꦢꦸꦩꦸꦒꦶꦲꦶꦁ Spanye꧉ꦲꦶꦁꦱꦊꦧꦼꦠ꧀ꦠꦶꦥꦸꦤ꧀ꦭꦭꦤꦏꦭꦶꦃꦠꦲꦸꦤ꧀ꦭꦩꦶꦤꦶꦥꦸꦤ꧀꧈ꦦꦿꦧꦸ Tristan ꦲꦱꦸꦮꦶꦠꦝꦠꦼꦁꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦫꦗꦱꦂꦠꦲꦩ꧀ꦧꦶꦪꦤ꧀ꦠꦸꦥꦼꦫꦁꦝꦠꦼꦁꦫꦗꦫꦗꦮꦲꦸ꧈ꦲꦶꦁꦏꦁꦱꦩꦶꦏꦭꦸꦫꦸꦒ꧀ꦒꦤ꧀ꦲꦶꦁꦩꦼꦁꦱꦃꦲꦶꦥꦸꦤ꧀꧉ꦱꦏꦶꦁꦏꦂꦱꦤꦶꦁꦲꦾꦁꦏꦁꦩꦲꦏꦮꦱ꧈ꦮꦺꦴꦤ꧀ꦠꦼꦤ꧀ꦲꦶꦁꦥꦸꦤ꧀ꦢꦶꦥꦸꦤ꧀ꦢꦶꦦꦿꦧꦸ Tristan ꦱꦃꦲꦸꦁꦒꦸꦭ꧀ꦲꦶꦁꦥꦼꦫꦁ꧈ꦔꦤ꧀ꦠꦺꦴꦱ꧀ꦲꦱ꧀ꦩꦤꦶꦥꦸꦤ꧀ꦏꦮꦼꦤ꧀ꦠꦂꦲꦶꦁꦤꦒꦫꦶꦱꦤꦺꦱ꧀꧉ꦲꦺꦮꦱꦩꦤ꧀ꦠꦼꦤ꧀ꦦꦿꦧꦸ Tristan ꦠꦤ꧀ꦱꦃꦤꦤ꧀ꦝꦁꦱꦸꦁꦏꦮ꧈ꦩꦂꦒꦶꦲꦶꦁꦱꦊꦧꦼꦠ꧀ꦠꦶꦥꦸꦤ꧀ꦏꦭꦶꦃꦠꦲꦸꦤ꧀ꦥꦸꦤꦶꦏꦧꦺꦴꦠꦼꦤ꧀ꦩꦶꦉꦁꦮꦂꦠꦺꦴꦱ꧀ꦥꦸꦤꦥꦥꦸꦤꦥꦱꦏꦶꦁꦲꦶꦁ Cornwallis ꦏꦢꦺꦴꦱ꧀ꦥꦸꦤ꧀ꦢꦶꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦱꦁꦦꦿꦩꦺꦱ꧀ꦮꦫꦶ꧉ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦩꦶꦠꦿꦲꦸꦠꦮꦶꦲꦸꦠꦸꦱ꧀ꦱꦤ꧀ꦤꦶꦥꦸꦤ꧀ꦱꦁꦥꦸꦠꦿꦶꦲꦶꦁꦏꦁꦝꦠꦼꦁ꧉ꦮꦸꦱꦤꦦꦿꦧꦸ Tristan ꦲꦩꦁꦒꦭꦶꦃ꧈ꦧꦶꦭꦶꦃꦯꦁꦥꦸꦠꦿꦶꦱꦩ꧀ꦥꦸꦤ꧀ꦏꦱꦸꦥꦺꦤ꧀ꦝꦠꦼꦁꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀꧉
꧋ꦲꦤꦸꦗꦸꦱꦠꦸꦁꦒꦶꦭ꧀ꦭꦶꦁꦢꦶꦤ꧀ꦠꦼꦤ꧀ꦦꦿꦧꦸ Tristan ꦭꦤ꧀ Corneval ꦲꦁꦒꦺꦤ꧀ꦤꦶꦥꦸꦤ꧀ꦲꦭꦭꦤꦲꦚ꧀ꦗꦺꦴꦒ꧀ꦲꦶꦁꦱꦊꦧꦼꦠ꧀ꦠꦶꦁꦤꦒꦫꦶ Bratagne꧉ꦭꦩ꧀ꦥꦃꦲꦶꦥꦸꦤ꧀ꦲꦔ꧀ꦭꦁꦏꦸꦁꦔꦶꦝꦸꦱꦸꦤ꧀ꦝꦸꦱꦸꦤ꧀ꦲꦶꦁꦏꦁꦱꦸꦮꦸꦁꦱꦂꦠꦫꦶꦱꦏ꧀꧈ꦲꦶꦁꦏꦁꦏꦤ꧀ꦠꦸꦤ꧀ꦤꦩꦸꦁꦠꦺꦩ꧀ꦧꦺꦴꦏ꧀ꦠꦺꦩ꧀ꦧꦺꦴꦏ꧀ꦏꦶꦥꦸꦤ꧀ꦏꦺꦩꦮꦺꦴꦤ꧀꧉ꦩꦏꦠꦼꦤ꧀ꦲꦸꦒꦶꦥꦱꦧꦶꦤ꧀ꦤꦤ꧀ꦲꦸꦠꦮꦶꦥꦠꦼꦒꦶꦭ꧀ꦭꦤ꧀ꦲꦶꦁꦱꦏꦶꦮꦠꦼꦔꦼꦤ꧀ꦤꦶꦁꦥꦝꦸꦱꦸꦤ꧀ꦤꦤ꧀ꦮꦲꦸꦱꦩꦶꦫꦶꦱꦏ꧀ꦱꦢꦪ꧈ꦩꦂꦒꦶꦱꦩꦶꦏꦧꦼꦱ꧀ꦩꦶꦢꦺꦤꦶꦁꦩꦼꦁꦱꦃꦲꦶꦁꦏꦁꦲꦔ꧀ꦭꦸꦫꦸꦒ꧀ꦒꦶꦤꦒꦫꦶꦮꦲꦸ꧉ꦲꦶꦁꦔꦿꦶꦏꦸꦦꦿꦧꦸ Tristan ꦲꦩꦁꦒꦭꦶꦃꦩꦏꦠꦼꦤ꧀꧇ꦊꦱꦸꦠꦼꦩꦼꦤ꧀ꦫꦱꦤꦺꦱꦫꦶꦫꦤꦶꦁꦱꦸꦤ꧀꧈ꦲꦥꦥꦼꦂꦭꦸꦤꦺꦏꦩꦯꦸꦂꦫꦤ꧀ꦤꦶꦁꦱꦸꦤ꧀ꦲꦶꦏꦶ꧈ꦩꦤꦮ Isolde ꦏꦏꦱꦶꦃꦏꦸꦲꦢꦺꦴꦃꦥꦁꦒꦺꦴꦤ꧀ꦤꦤꦺ꧈ꦭꦤ꧀ꦲꦺꦴꦫꦧꦏꦭ꧀ꦧꦶꦱꦏꦠꦼꦩꦸꦭꦤ꧀ꦲꦶꦁꦱꦸꦤ꧀ꦩꦤꦺꦃ꧉ꦭꦤ꧀ꦲꦥꦩꦸꦭꦤꦺꦢꦺꦤꦺꦱꦗꦿꦺꦴꦤꦶꦁꦫꦺꦴꦁꦠꦲꦸꦤ꧀ꦲꦶꦏꦶꦯꦁꦥꦸꦠꦿꦶꦲꦺꦴꦫꦲꦸꦠꦸꦱ꧀ꦱꦤ꧀ꦥꦫꦶꦁꦮꦂꦠꦩꦫꦶꦁꦥꦚ꧀ꦗꦼꦤꦼꦁꦔꦤ꧀ꦤꦶꦁꦱꦸꦤ꧀꧉ꦲꦤꦲꦶꦁ Tintagel ꦯꦁꦥꦸꦠꦿꦶꦠꦤ꧀ꦱꦃꦲꦱꦸꦏꦤ꧀ꦱꦸꦏꦤ꧀꧈ꦩꦂꦒꦯꦁꦦꦿꦧꦸ Marc ꦲꦱꦶꦃꦧꦔꦼꦠ꧀ꦩꦫꦁꦱꦫꦶꦫꦤꦺ꧉ꦱꦠꦼꦩꦼꦤꦺꦗꦩ꧀ꦮꦱꦶꦪꦠ꧀ꦲꦶꦏꦸꦩꦤ꧀ꦢꦶꦧꦔꦼꦠ꧀꧉ꦱꦲꦶꦏꦶ Isolde ꦭꦭꦶꦧꦧꦂꦥꦶꦱꦤ꧀ꦩꦫꦁꦥꦚ꧀ꦗꦼꦤꦼꦁꦔꦤ꧀ꦤꦶꦁꦱꦸꦤ꧀꧉ꦲꦺꦴꦫꦏꦺꦭꦶꦁꦔꦤ꧀ꦩꦫꦁꦏꦧꦸꦔꦃꦲꦤ꧀ꦱꦂꦠꦏꦱꦸꦱꦃꦲꦤꦺꦏꦁꦮꦶꦱ꧀ꦭꦶꦤꦏꦺꦴꦤ꧀ꦤꦤ꧀ꦧꦧꦉꦁꦔꦤ꧀ꦏꦫꦺꦴꦥꦚ꧀ꦗꦼꦤꦼꦁꦔꦤ꧀ꦤꦶꦁꦱꦸꦤ꧀꧉ꦲꦥꦲꦶꦁꦱꦸꦤ꧀ꦲꦶꦪꦲꦺꦴꦫꦧꦶꦱꦭꦭꦶꦩꦫꦁꦯꦁꦥꦸꦠꦿꦶ꧉ꦲꦶꦁꦔꦼꦤ꧀ꦢꦶꦲꦤꦥꦸꦠꦿꦶꦏꦁꦧꦶꦱꦚꦶꦂꦤꦏ꧀ꦲꦏꦺꦏꦱꦸꦱꦃꦲꦤ꧀ꦤꦶꦁꦱꦸꦤ꧀꧉
꧋ꦏꦕꦫꦶꦪꦺꦴꦱ꧀꧈ꦏꦭꦶꦃꦢꦶꦤ꧀ꦠꦼꦤ꧀ꦭꦩꦶꦤꦶꦥꦸꦤ꧀ꦦꦿꦧꦸ Tristan ꦏꦝꦺꦫꦺꦏ꧀ꦲꦏꦼꦤ꧀ Corneval ꦤꦶꦠꦶꦃꦠꦶꦠꦶꦃꦲꦤ꧀ꦲꦔ꧀ꦭꦁꦏꦸꦁꦔꦶꦥꦠꦼꦒꦶꦭ꧀ꦭꦤ꧀ꦱꦲꦥꦝꦸꦱꦸꦤ꧀ꦤꦤ꧀꧈ꦤꦔꦶꦁꦧꦺꦴꦠꦼꦤ꧀ꦏꦥꦁꦒꦶꦃꦠꦶꦪꦁꦱꦠꦸꦁꦒꦶꦭ꧀ꦠꦸꦁꦒꦶꦭ꧀ꦭ꧈ꦩꦏꦠꦼꦤ꧀ꦲꦸꦒꦶꦧꦺꦴꦠꦼꦤ꧀ꦩꦶꦉꦁꦏꦭꦸꦫꦸꦏ꧀ꦏꦶꦁꦱꦮꦸꦁꦲꦸꦠꦮꦶꦗꦸꦒꦸꦒ꧀ꦒꦶꦁꦱꦒꦮꦺꦴꦤ꧀꧉ꦱꦢꦪꦥꦁꦒꦺꦤ꧀ꦤꦤ꧀ꦲꦶꦁꦏꦁꦏꦭꦁꦏꦸꦁꦔꦤ꧀ꦮꦲꦸꦱꦼꦥꦶꦩꦩꦿꦶꦁ꧉ꦲꦺꦚ꧀ꦗꦶꦁꦔꦶꦥꦸꦤ꧀ꦦꦿꦧꦸ Tristan ꦲꦔ꧀ꦭꦗꦼꦁꦔꦏꦼꦤ꧀ꦠꦶꦤ꧀ꦢꦏ꧀ꦏꦶꦥꦸꦤ꧀꧉ꦲꦶꦁꦮꦚ꧀ꦕꦶꦤꦶꦥꦸꦤ꧀ꦠꦶꦪꦁꦤꦼꦝꦱꦶꦪꦁ꧈ꦠꦶꦤ꧀ꦢꦏ꧀ꦏꦶꦥꦸꦤ꧀ꦦꦿꦧꦸ Tristan ꦲꦩꦉꦥꦼꦏ꧀ꦏꦶꦥꦸꦤ꧀ꦛꦸꦏ꧀꧉ꦲꦶꦁꦥꦸꦤ꧀ꦛꦸꦏ꧀ꦔꦿꦶꦏꦸꦏꦠꦶꦔꦭ꧀ꦮꦺꦴꦤ꧀ꦠꦼꦤ꧀ꦒꦫꦺꦗꦤꦶꦥꦸꦤ꧀꧈ꦱꦂꦠꦮꦺꦴꦤ꧀ꦠꦼꦤ꧀ꦥꦝꦺꦥꦺꦴꦏ꧀ꦏꦤ꧀ꦤꦶꦥꦸꦤ꧀ꦏꦾꦲꦶꦲꦶꦁꦏꦁꦫꦸꦩꦼꦏ꧀ꦱꦒꦫꦺꦗꦮꦲꦸ꧉ꦏꦭꦱꦩꦤ꧀ꦠꦼꦤ꧀ꦏꦾꦲꦶꦥꦸꦤꦶꦏꦥꦶꦤꦸꦗꦸꦲꦤ꧀ꦢꦼꦢꦺꦴꦁꦔꦝꦠꦼꦁꦲꦶꦁꦏꦁꦩꦲꦏꦮꦱ꧈ꦥꦔꦁꦒꦺꦤ꧀ꦤꦶꦥꦸꦤ꧀ꦮꦕꦸꦕꦭ꧀ꦭꦶꦁꦩꦺꦤ꧀ꦢ꧈ꦤꦩꦸꦁꦲꦶꦁꦒꦼꦒꦼꦂꦫꦶꦥꦸꦤ꧀ꦲꦶꦁꦏꦁꦏꦠꦶꦔꦭ꧀ꦱꦏꦶꦁꦮꦺꦴꦭ꧀꧈ꦤꦔꦶꦁꦱꦩ꧀ꦥꦸꦤ꧀ꦲꦩꦺꦴꦃ꧉ꦱꦉꦁꦱꦸꦩꦼꦉꦥ꧀ꦮꦺꦴꦤ꧀ꦠꦼꦤ꧀ꦠꦩꦸꦱꦠꦿꦶꦪ꧈ꦲꦺꦁꦒꦭ꧀ꦲꦶꦔꦕꦂꦫꦤ꧀ꦭꦸꦩꦼꦧꦼꦠ꧀ꦲꦶꦁꦥꦝꦺꦥꦺꦴꦏ꧀ꦏꦤ꧀ꦤꦶꦥꦸꦤ꧀꧉Corneval ꦤꦸꦤ꧀ꦠꦼꦤ꧀ꦩꦽꦤꦃꦲꦏꦼꦤ꧀ꦏꦥꦭ꧀ꦏꦥꦭ꧀ꦠꦸꦩ꧀ꦥꦏ꧀ꦏꦤ꧀ꦤꦶꦥꦸꦤ꧀ꦥꦸꦤꦶꦏ꧈ꦢꦺꦤꦺꦏꦾꦲꦶꦲꦶꦁꦏꦁꦒꦝꦃꦒꦿꦶꦪꦲꦔ꧀ꦭꦢꦺꦴꦱ꧀ꦱꦶꦦꦿꦧꦸ Tristan ꦭꦸꦏꦂꦥꦔꦁꦒꦺꦏꦱꦠꦿꦶꦪꦤ꧀꧉ꦧꦺꦴꦠꦼꦤ꧀ꦲꦤ꧀ꦠꦮꦶꦱ꧀ꦢꦔꦸꦩꦭꦶꦃꦦꦿꦧꦸ Tristan ꦭꦤ꧀ꦲꦧ꧀ꦢꦶꦤꦶꦥꦸꦤ꧀ꦢꦶꦥꦸꦤ꧀ꦲꦠꦸꦂꦫꦶꦝꦲꦂꦱꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀꧉ꦱꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦱꦢꦺꦫꦺꦁꦔꦶꦥꦸꦤ꧀ꦱꦩꦶꦠꦶꦊꦩ꧀꧈ꦏꦾꦲꦶꦱꦲꦠꦩꦸꦤꦶꦥꦸꦤ꧀ꦱꦩꦶꦔꦤ꧀ꦢꦶꦏꦤ꧀꧈ꦊꦁꦒꦃꦲꦔꦸꦧꦼꦁꦔꦶꦧꦝꦶꦪꦤ꧀꧉ꦦꦿꦧꦸ Tristan ꦲꦤ꧀ꦢꦔꦸꦤꦩꦶꦤꦶꦥꦸꦤ꧀ꦤꦒꦫꦶꦲꦶꦁꦏꦁꦫꦶꦱꦏ꧀ꦥꦸꦤꦶꦏ꧉
